EJRA 1 - ASII LAKDAP Bible (BSI)

Sairas Raq Jehudinok Ka Tsangmung Na Laü Wan Nong Miitu Aming Kuqto

¹ Parsia mung hokhamwe Sairas ka Bebilon mung na hokham jawan pha shaqshaq rawii na, Tati Shiikeawe raq shammiwe Jeremia nübok maq riisham bomtsi chongkuq wantaq kra riikhaqli she tiikupi kuq wanto. Tatiwe raq Jehudinok ka tsangmung na laü wan nong miitu aming kechang nguta hokhamwe Sairas tiima tsantsii na tiishai rai kuqto. Krai mren Sairas raq ara aming lak arshe waiqto. Raüta ara lak arka mungmaiqse ma chiiriim raüta tiikewa miitu aming tatto. Aming ka akha kuqto:

² “Arka Parsia mung langti Hokhamwe Sairas aming. Sanseng Ramungtan Rümti Tati Shiikeawe raq mangjong hiq angu tlotli ara hupkhang wan miitu ngi ka hokham ma shongto. Kiimaq Shiikeawe raq apaiq shomnoq wan miitu Judia wang wa Jerusalem chela na Shomjam sitlaq kra haike wan chang nguta ngi ma arang akekun she.

³ Riita, Shiikeawe ka namshiq apaiq saüsetiim rai adam na misi nga laq. Riita namshiq ka Jerusalem na warong laq. Lanta, asengi raq Jerusalem chela na shomnoq wantlaq Israilnok Tati Shiikeawe Shomjam kriishe tiihea hai wan rong laq.

⁴ Riita Israilnok munglu wansha siwan tlaq kra mungmaiqse phong wa, ümriiti miiwa tsangmung na jang wan nong miitu, tungsea lamsii rongra tlaq jiika, tsangshiq rai adam na siwan damti, chumti chiitibi raq mikhrum kuq laq. Chiiti raq tsangshiq ma, manglaü wan miitu tungsea lamsii, kiimaq khoraki miitu kampho, kiimaq chaq, kiimaq phanrap huknai sam rong raa tlaq thun kra mikuq laq. Kiimaq kra hupsam thun ka thop raüta nyamse ma mitiiho wanlaq. Kriithaq niimin Jerusalem na Shiikeawe Shomjam kiijaq honglu ke wan chang hup asam ka riichom lanta tiiho wan rong laq.”

⁵ Riita, Juda ta kaüwa weraü phan wa phukhu welabi thun kiimaq Benjamin ta kaüwa weraü phan wa phukhu welabi thun, kiimaq ramwebi thun kiimaq Lewinok thun kiimaq Jehudinok phan mungmaiqse ahinti Shiikeawe raq tsangshiq tsan tsii tiichhii wan tlaqti thun ka tarü tsan achhii maq shairang rang raütiishe, tsangmung na laü wan raüta Jerusalem chela wa Tatiwe Shomjam kra tiihea hai wan miitu she chap wanto.

⁶ Tsangshiq jam thoti tarü raq, ara ariq chaq kampho maq atiiq hupsam thun tak apin thun, ta awii hupsam, nyamse thun, kiimaq athii atsin phan kongphiq thun, maq khrum kuqto. Arthun arka tsangshiq tsan tsii maq honglu kuq taq kriithaq niishe kuqto.

⁷ Jerusalem Shomjam wa kok alaq nai tak apin thun ka tsuq wan raüta, Nebukadnejar raq apaiq phra kong shomnoq wan chang jam na thü wanto. Kriithun ka Hokhamwe Sairas raq tiidong lamto.

⁸ Raüta Parsia mung Hokhamwe Sairas raq arthun arka, tsiiqtek rümti ajong cherewe Mithredath jaq niishe kiinong kuqto. Mithredath riishe lam raüta, awea riito. Raüta Juda mung langti we Shash-bajjar jaq niishe kuqbaiqto.

^9-10 Hupsam ka arthun ara riito: honglu kechang chaq takkasetiim ka 30 honglu kechang kampho takkasetiim ka 1,000 phanhin takkasetiim ka 29 aransetiim chaq takkesetiim ka 30 aransetiim kampho takkasetiim ka 410 phanhin tak apin thun ka 1,000

honglu kechang chaq takkasetiim ka

¹¹ Hupsam tlotli chaq nai kampho tak apin romshaq ka 5,400 riito. Kiimaq arthaq niimin hup asam phan hin min pahea asi riito. Arthun hupsam ka Sheshbajjar raq, apaiq rai Israilnok munglu wansha Bebilon mung maq Jerusalem na laü wantaq akhing na howanto.