तीतस 1 - स्युबा

¹ ङाः पावल कोन्ज्योइ लाबु ओःले येशु ख्रीष्टकीइ प्रेरीतकीइरा दी इःगी प्रुःदेरा एः। कोन्ज्योइ ङाःला दाम्सी ओःले खुङगीइ दाम्क्योक मीःक्याइ सेमल्हुक माःङ्बु जोजेला ओःले कोन्ज्योला सेम थेकेन मीःलीला सेन्जेला तेःन्दामगीइ शीक्षा सेच्युजेला खुङक्याला रोः पेःजेला ङाःला दाम्सी।

² दी तेःन्दाम ओःले शीक्षाइ पेःगासुना खुङक्याला नाःमाङ मीसीगेन मीःजी ज्योर्केन रेःवा ज्योर्कुए। नाःमाङ स्योप मीःक्युःर्केन कोन्ज्योइ जाम्बुलीङ सृष्टी पेःजे तोःङ्लारा उःला ओः मीःली तेर्के लाःती ताःम्ज्या पेःदी एःके।

³ ओःले खुङगीइ डीक्पु तीःनामलारा दीखो खुङगीइ याःबु लेःङ्‍गो तेर्सी। दीखोरा याःबु लेःङ्‍गो राःङ्साक्याला लाःचेला उःला थार्च्युगेन कोन्ज्योइ आज्ञा तेर्ती ङाःला तेर्सी।

⁴ ङाः ङीमु चीग्रा खालेइ सेमल्हुक एःक्योक ओःले तेःन्दामरा ङाःइ पुः च्योःङ्‍रा तीतसला दी इःगी प्रुःदेरा एः। आबा कोन्ज्योइ ओःले उःला थार्च्युगेन येशु ख्रीष्टकीइ ख्योला अनुग्रह ओःले खाम्साङ्बु तेर्च्युक।

क्रेटला तीतसकीइ लेःगा

⁵ क्रेटला लीःक्योक उःइ लेःगा छाङच्युज्युक लाःती ओःले ङाःइ आज्ञा तेर्क्योक च्योःङ्‍रारा थाम्जेर क्याःसाला एल्डरक्या दाम्जेला ङाःइ ख्योला क्रेटला पोःर्क्योक इःङे।

⁶ कोःम्साइ एल्डरक्याला सुइयाङ माःताक्पा च्याःङ्माःखुज्युक, खुङगीइदी चीग्रा चीग पेःमे एःक्योक, खुङगीइ पुःपोःमोक्या माःइबा चेपाक्या म्याःक्योक ओःले लाःक्योक ङीःङेन्दी ओःले प्रभुला सेमल्हुक लुगेन्दी ओःङ्‍कोःउए।

⁷ कोःम्साइ तोःङ क्याःप्केन मीःइदी कोन्ज्योइ लेःगाइ जीम्मा लेःङ्क्योक ओःङ्‍कोउए, ओः सोङ्‍गारा, खुङ चीङ माःताक्पा म्याःक्योक मीः ओःङ्‍कोःउए। खुङ घमण्डी, गेबुरा सीःताङ पेःगेन्दी, छ्‍याङ्स्योरे, सेकेन्दी तुप्केन्दी ओःले माःताक्पा लेःगाक्यालाःम्‍ले डेबा जोगेन्दी ओःङ्जे मेःयोङे।

⁸ इःनाङ खुङ डोम्बोक्याला तोःङ्ज्याङ पेःगेन्दी, याःबु लेगा पेःजेला सेम थेकेन्दी, राःङला वशला ज्यागेन्दी, थेका, चाङ्मा ओःले अनुशासन एःक्योक ओःङ्‍कोःउए।

⁹ खुङ नी लोप्क्योक तेःन्दामगीइ लेःङ्‍गोला तेःराकोःउए। ओःन्डुले खुङगीइ राःङ्साक्यालाङ तेःन्दामगीइ तामक्या लोप्‍ती उत्साह तेर्चे खुउए ओःले दी तामक्याला वीरोध पेःगेनक्याइ गल्ती खुङगीइ तेङ्तेर्चे खुउए।

¹⁰ चीलेलाःना माःङ्बुरा मीःक्या कोःम्साइ तोःङ क्याःप्केन मीःइ लाःक्योक तामला मीःङीङेनक्या एः, लेःगा म्याःक्योक तामक्या लाःकेनक्या ओःले स्योप क्युःर्केनक्या एः। खास पेःदी एःन्डुबा ताम लाःकेनक्या नाःङ्ला थार्चेला खतना पेःराःकोःउए लाःकेनक्या इःङे।

¹¹ खुङक्याइ खाला खाप्च्यु माःक्याःप्‍पा मेःयोङे चीलेलाःना खुङक्याइ नी लोप्चेरा मेःयोङेन तामक्या लोप्‍ती थाम्जेर खीम फेबेक्याइ लुक्योक सेमल्हुकला नोङ्देरा एः। खुङक्याइ एःन्डुबा लेःगा डेबा जोजेला चीग्रा पेःक्योक इःङे।

¹² क्रेटकीइ मेःन्दा चीग छ्‍योम्बो लोबेनगीइ एःन्डु लाःती एः, “क्रेटकीइ मीःक्या तेन्दुरा स्योप क्युःर्कुए। खुङक्या नी रीःदाकक्या च्योःङ्‍रा मीफामु ओःले छेर्सी पेःगेन्दी ङ्‍यागुरेक्या इःङे।”

¹³ दी ताम तेःन्दाम इःङे। खुङक्याइ याःबुले सेमल्हुक लुखुज्युक लाःती खुङक्याला चोक्पो पेःदी हाप्स्याल तेङ्दो।

¹⁴ खुङक्याइ यहुदीक्याइ ताःङ्बुइ पेदामक्याला कोःरा माःकोःज्युक ओःले तेःन्दामगीइ तामला सेमल्हुक मीलुगेन मीःक्याइ लाःक्योक आज्ञाक्याला कोःरा माःकोज्युक।

¹⁵ चाङ्मा मीःक्याइ लागी थाम्जेर ताम चाङ्मा एः। इःनाङ चीबु ओःले सेमल्हुक मीलुगेन मीःक्याइ लागी चीङ ताम चाङ्मा म्याः चीलेलाःना खुङक्याइ सेम ओःले नावारा चीबु एः।

¹⁶ खुङक्याइ कोन्ज्योला ङोःसेउए लाःती लाःकुए इःनाङ खुङक्याइ लेःगालाःम्‍लेदी कोन्ज्योला इन्कार पेःउए। खुङक्या नी क्युक टोःजे च्योःङ्‍रा ओःले अटेरी एः, ओःले चीङ याःबु लेःगा पेःजेला डीक्पु म्याः।