प्रकाश 1 - स्युबा1 दी पेज्याला प्रुःक्योक तामक्या येशु ख्रीष्टकीइ तेङ्क्योक इःङे। राःङगीइ योक्पुक्याइ गेबुरा ओःङेन तामक्याइ बारेला सेज्युक लाःती कोन्ज्योइ येशुला दी तामक्या तेङ्तेर्सी। येशुइ दी ताम लाःचेला मेःन्दा चीग स्वर्गदुतला राःङगीइ योक्पु युहन्नासाःला ताङ्सी। 2 ङाः युहन्ना राःङगीइ थोङ्क्योक थाम्जेर तामक्या लाःसी। कोन्ज्योइ ङाःला लाःक्योक लेःङ्गो ओःले येशु ख्रीष्टकीइ ङाःला तेङ्क्योक तेःन्दामगीइ तामक्या दीखोरा इःङे। 3 दी पेज्या छ्योम्बो केइ टोःगेनक्या ओःले तीङ्ला ओःङेन तामक्याइ बारेला ङाःइ प्रुःक्योक दी लेःङ्गोला कोःदी ङीःङेनक्या थाम्जेरकीइ मोलाम ज्योर्ती एः। चीलेलाःना दी तामक्या गेबुरा छाङेन एः। तीःनथाल कोःम्साला युहन्नाइ टासीदेले 4 एशीयाला एःक्योक तीःनथाल कोःम्साला ङाः युहन्नालाःम्ले टासीदेले– कोन्ज्यो तोःङलाङ एःके, खुङ ताःसेङ एः ओःले खुङ तेन्दुरा ओःङेन एः, खुङगीइ ख्याक्याला अनुग्रह ओःले खाम्साङ्बु तेर्च्युक। खुङगीइ छेसा तोःङ्ला तेःकेन तीःनथाल लाक्याइ, 5 ओःले वीश्वासयोग्य पाङ्बु रा सीक्योकक्यालाःम्ले तोःङ्ला सोम्बो लोःगेन्दी येशु ख्रीष्टकीइ ख्याक्याला अनुग्रह ओःले खाम्साङ्बु तेर्च्युक। खुङ जाम्बुलीङगीइ क्याःल्बुक्याइदी क्याःल्बु इःङे। खुङगीइ उःक्याला च्याःम्बु पेःउए ओःले खुङगीइ राःङगीइ ठाइ उःक्याला लाःयोलाःम्ले ताःम्साङा जोदी एः। 6 ओःले खुङगीइ कोन्ज्यो रा आबाइ क्याःल्खापला मेःबा पेःजेला उःला पुजाहारीइ आङ्ज्या तेर्ती एः। येशु ख्रीष्टला तेन्दुरा सेःसा काःल्ज्युक ओःले खुङगीइ ल्हे तेन्दुरा लीःच्युक। आमेन। 7 तादो, खुङ मुक्पाला ओःङ्देरा एः ओःले थाम्जेर मीःक्याइ खुङला थोङेन एः, खुङला बालाइ चोगेन मीःक्याइयाङ थोङेन एः। ओःले जाम्बुलीगीइ थाम्जेर क्युःपाइ मीःक्या खुङगीइ पेःगासुना तुःङाल पेःगेन एः। तेःन्दामरा एःन्डुबारा ओःङेन एः। आमेन। 8 छ्योम्बो ल्हे एःक्योक प्रभु कोन्ज्योइ लाःकुए, “अल्फा ओःले ओमेगा ङाःरा इःङे। ङाः तोःङलाङ एःके, ङाः ताःसेङ एः ओःले ङाः तेन्दुरा ओःङेन एः।” युहन्नाइ थोङ्क्योक प्रभु येशुइ ख्रीष्टला दर्शन थोङ्क्योक 9 ङाः ख्याक्याइ आता युहन्ना इःङे। येशुला सेमल्हुक लुक्योक सोङ्गारा ङाःङ ख्याक्या ङीमुरा धैर्य पेःदी तुःक्पु नादेरा एः, चीलेलाःना ओः तुःक्पु कोन्ज्योइ क्याःल्खापला एःकेनक्याला ओःङ्गुए। ङाःइ कोन्ज्योइ वचन लाःक्योक सोङ्गारा ओःले येशुइ बारेला मीःक्याला लाःक्योक सोङ्गारा ङाःला पत्मोस लाःकेन टापुला ज्यादी एः। 10 प्रभुला आराधना पेःगेन ङीःमाला ङाः चाङ्मा लाइ काःङ्दी एःके, ओःले ङाःइ तीङ्ला क्याःलीङगीइ के च्योःङ्रा छ्योम्बो के ङाःइ कोःसी। 11 ओः केइ एःन्डु लाःसी, “ख्योइ थोङेन तामक्या ताः इःगी चीगला प्रुःदी एफीससला, स्मुर्नाला, पर्गाममला, थीआटीराला, सार्डीसला, फीलाडेल्पीयाला ओःले लाउडीकीयाला एःक्योक तीःनथालरा कोःम्साक्याला ताङ्तेर।” 12 ओःले ङाः ङीमु ताम लाःकेन्दी सु दुबा लाःती क्याःप लोःदी तागासुना नी ङाःइ छेमी थेप्केन सेरकीइ तीःनथाल सामदान थोङ्सी। 13 ओःले ओः छेमी थेप्केन सामदानगीइ कील्ला मीःइ पुः च्योःङ्रा तीङ्बाथुपरा लेकेन रीःङ्बु केःला केःङ्क्योक ओःले प्य्राःङ्गोकला छ्योम्बो स्याःङ एःक्योक सेरकीइ कारा चीङ्क्योक ङाःइ थोङ्सी। 14 खुङगीइ गोइ टादी पाःल रा खावा च्योःङ्रा कार्मु एःके, ओःले खुङगीइ मीदी मेःइ मेःबुङ च्योःङ्रा एःके। 15 खुङगीइ तीङ्बादी मेःला लुदी खार्तीदी ज्याक्योक जार्के च्योःङ्रा माःर्मु एःके। ओःले खुङगीइ के छ्योम्बो छाँगाइ के च्योःङ्रा एःके। 16 खुङगीइ च्याःबु लाःक्पाला तीःनथाल कार्मा जुम्दी ज्यादी एःके। खुङगीइ खालाःम्ले ङीक्कारछ्योले धार एःक्योक धारीलो तरवार थेङ्सी। ओःले खुङगीइ छेन्दादी ङीःमा कार्पुला माःङ्बुरा स्यार्क्योक ङीःमा च्योःङ्रा एःके। 17 खुङला थोङ्गासुना ङाः खुङगीइ तीङ्बाला सीक्योक मीः च्योःङ्रा रीःल्सी। इःनाङ खुङगीइ च्याःबु लाःक्पा ङाःखाला ज्यादी एःन्डु लाःसी, “माःजी, तोःङमीःजीकरा एःकेन्दी ओःले तीङथुपरा तेःकेन्दी ङाःरा इःङे। 18 सोम्बो एःक्योक ङाःरा इःङे। ङाः सीदी एःके, इःनाङ ताः तादो, ङाः तेन्दुइ लागी सोम्बो काःल्दी एः। सीबु रा सीक्योक मीःक्या एःसाइ दीमीकक्या ङाः ङीमु एः। 19 ओः सोङ्गारा, ख्योइ ची थोङ्बा, ची ताःसे एःपा ओःले दी तीङ्ला ची ओःङेन एःपा ओःक्या थाम्जेर प्रुःदो। 20 ङाःइ च्याःबु लाःक्पाला ख्योइ थोङ्क्योक दी तीःनथाल कार्मा ओःले छेमी थेप्केन सेरकीइ तीःनथाल सामदानक्याइ तेङ्जे छोल्क्योक तामदी दीखोरा इःङे– तीःनथाल कार्मा लाःक्योकदी तीःनथाल कोःम्साइ स्वर्गदुतक्या इःङे, ओःले छेमी थेप्केन सेरकीइ तीःनथाल सामदानक्या लाःक्योकदी तीःनथाल कोःम्साक्या इःङे।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.