फीलीप्पी 3 - स्युबातेःन्दामगीइ ताःक्पा 1 ओःले ताः आतानोःक्या ओःले आजीनोःमोक्या, ख्याक्याला चीरा ओःङ्नाङ प्रभुला खाम्साङा पेःदो। ङाःइ ख्याक्याला तोःङ्लारा प्रुःक्योक तामक्या फीर्च्याङ प्रुःजेला ङाः छेर्सी मेःबे, ओःले ओः तामक्याइ ख्याक्याला स्योप क्युःर्केन मीःक्यालाःम्ले थार्च्युउए। 2 खीक्या च्योःङ्रा मीःक्या ङीमु च्यागाताःक्पु पेःदो। खुङक्या नी माःताक्पा पेःगेन मीःक्या इःङे ओःले खुङक्याइ नी उःक्याइ जुबुला खतना पेःराकोःउए लाःकुए। 3 चीलेलाःना तेःन्दामगीइ खतना पेःक्योकक्या नी उःक्या का इःङे ले चीलेलाःना उःक्याइ कोन्ज्योला कोन्ज्योइ लालाःम्ले मेःबा पेःउए। उःक्याइ पेःक्योक लेःगाक्याला उःक्या भर मेःबेए, बरु उःक्याइ नी येशु ख्रीष्टकीइ उःक्याइ लागी ची पेःदी एःपा ओः तामला घमण्ड पेःउए। 4 लाःकारा लाःना ङाः ङीमु नी ङाःइ पेःक्योक लेःगाक्याला भर पेःगेन कारणक्या एः। राःङ्सा मीःक्याइ खुङक्याइ पेःक्योक लेःगाक्याला भर पेःगेन कारणक्या एः लाःती ठीवा साल्गुए लाःना, ङाःइदी नी ताःरुङ माःङ्बु कारणक्या एः। 5 ङाः ङीःमा केःइदी एःकासुना ङाःइ खतना काःल्योक इःङे। ङाः बेन्यामीन कुलगीइदी इस्राएली मीः इःङे। ङाः हीब्रुक्याइदीङ हीब्रु इःङे, ओःले छ्येइ ठीम ङीःङेन ताम लाःकासुना ङाः फरीसी एःके। 6 जोसकीइ बारेला लाःका लाःना येशुला सेमल्हुक लुगेन मीःक्याला माःङ्बुरा तुःक्पु तेर्केन मीः ङाःरा इःङे, ओःले छ्येइ ठीम ङीःन्दी ताःक्पा ओःङेन्दी एःना ङाःइ थाम्जेर छ्येइ ठीम ङीःन्दी एः। 7 इःनाङ काःजे तामक्या ङाःइ लागी खेइदी एःके, ओः तामक्या ताःसे ङाःला तेःमेन नेकुए चीलेलाःना ङाः ख्रीष्टला सेमल्हुक लुउए। 8 तेःम्बारा लाःका लाःना येशु ख्रीष्ट ङाःइ प्रभु इःङे लाःती ङोःसेजे ज्योर्चे लाःक्योक ङाःला थाम्जेर तामक्या भन्दा छ्योम्बो इःङे, ओः सोङ्गारा, ङाःला राःङ्सा तामक्या थाम्जेर तेःमेन नेकुए। ख्रीष्टला ङोःसेजे खुगा लाःती खुङगीइ लागी ङाःइ थाम्जेर तामक्या पोःर्ती एः, ओःले ओः थाम्जेर तामक्या ङाःला तेःमेन नेकुए, 9 ओःले ङाः खुङ ङीमु डीक्ती तेःचे खुज्युक। ङाःइ छ्येइ ठीमला ङीःन्दी कोन्ज्योइ तोःङ्ला ङाः ताःक्पा ओःङ्जे मीःखुए, बरु ख्रीष्टला सेमल्हुक लुक्योक सोङ्गारा ङाःला कोन्ज्योइ ताःक्पा जोदी एः। ओःले दी ताःक्पा ओःङेन ताम कोन्ज्योलाःम्ले ओःले सेमल्हुककीइ पेःगासुना ओःङ्गुए। 10 ङाः ख्रीष्टला ङोःसेजे ओःले खुङला सीक्योकलाःम्ले सोम्बो लोगेन ल्हेला सेजे सेम एः। खुङगीइ तुःक्पु खुर्क्योक च्योःङ्रा ङाःङ तुःक्पु खुर्चे सेम एः, ओःले खुङ सीक्योक च्योःङ्रा ङाःङ सीजे सेम एः। 11 ओःले ओःङ्जे खुसी लाःना कोन्ज्योइ ङाःला सीक्योकलाःम्ले फीर्च्या सोम्बो लोःज्युक। डोकोःन लाःमछ्योले डोकोःउए 12 ङाःइ दी तामक्या तोःङ्लारा ज्योर्सीङ्दी एः ओःले ङाः तोःङ्लारा सीद्ध काःल्सीःङ्दी एः लाःती ङाः मेःलाःप। इःनाङ ओः तामक्याला ज्योर्चेला ङाः माःङ्बुरा तुःक्पु पेःदेरा एः, ओःले ओः तामक्याइ लागीरा येशु ख्रीष्टकीइ ङाःला खुङगीइदी जोसीःङ्दी एः। 13 ङाःइ आतानोःक्या ओःले आजीनोःमोक्या, ङाःइ दी थाम्जेर ज्योर्सीःङ्दी एः लाःती नी ङाःला मेनेए, इःनाङ ङाः लेःगा चीग पेःउए, ङाः काःल्सीःङ्क्योक तामक्याला टेःम्बा चेःती ताः तोःङ्ला एःक्योक तामक्याइ लागी ङाः तुःक्पु पेःउए। 14 ओः सोङ्गारा, नाःम्खालीङगीइ इनाम ज्योर्केन ठीवा लेःङ्दी डोकोःन लाःमछ्योले ङाः छ्योङ्देरा एः। ओःखोइ लागी कोन्ज्योइ ङाःला येशु ख्रीष्टलाःम्ले केक्याःप्क्योक इःङे। 15 उःक्या सेमल्हुकला छार्क्योकक्या थाम्जेरकीइदी एःन्डुबारा ठीवा लेःङ्कोः। ओःले सुइयाङ राःङ्सारा पेःदी ठीवा साल्गुए लाःना कोन्ज्योइरा ची डीक्पु इःङे ओःखो खुङक्याला लोप्केन एः। 16 चीरा इःनाङ, कोन्ज्योइ उःक्याला ताःसेथुप काःजे तामक्या तेङ्तेर्ती एःपा, ओः तामक्यालारा ङीःन्दी तोःङ्ला डोगा। 17 आतानोःक्या ओःले आजीनोःमोक्या, ङाःइ काःन्डुबा मीःजी सेन्गुबा, ख्याक्याइयाङ ओःन्डुबारा मीःजी सेन्दो, ओःले ङीःइ च्योःङ्रारा पेःगेन राःङ्सा मीःक्यालाःम्ले लोप्तो। 18 ङाःइ ख्याक्याला माःङ्बुरा थाङ्मा लाःसीःङ्दी एः, ओःले ताः ङाः ङुःदेरा फीर्च्याङ दी ताम लाःके, माःङ्बुरा मीःक्याइ ख्रीष्ट चीले क्रुसला सीबा लाःकेन तामक्याला टाः पेःक्योक च्योःङ्रा पेःदी मीःली सेन्गुए। 19 तीङ्ला नी खुङक्या तेःन्दामरा सीःङ्दा डोगेन एः। खुङक्याइ टोःपारा खुङक्याइ ल्हा इःङे ओःले खुङक्या ङोःछाबु तामक्याला देङेःन पेःउए। खुङक्या दी जाम्बुलीङगीइ तामक्याला चीग्रा सेम तेर्कुए। 20 इःनाङ उःक्या नी नाःम्खालीङगीइदी इःङे। ओःले उःला थार्च्युगेन प्रभु येशु ख्रीष्ट नाःम्खालीङले लोःदी ओःङेन एः लाःती उःक्या केःदाङ पेःदी कुःतेःती एः। 21 खुङगीइ ल्हेलाःम्ले खुङगीइ थाम्जेर तामक्याला राःङगीइ आङ्ज्या वाःला ख्योङेन एः, ओःले ओःखोरा ल्हेलाःम्ले उःइ सीदी डोगेन जुबुला खुङगीइ जुबु च्योःङ्रारा महीमीत जोगेन एः। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.