फीलीप्पी 2 - स्युबाख्रीष्टकीइ च्याःज्यु (नम्रता) 1 ची ख्रीष्टला एःक्योक ख्याक्याइ मीःलीइ ख्याक्याला उत्साह तेर्ती एःपा? ची खुङगीइ च्याःम्बुइ ख्याक्याला सान्त्वना तेर्ती एःपा? ची ख्याक्याइ चाङ्मा ला ङीमु संगती पेःदी एःपा? ची ख्याक्याइ चीगकीइ राःङ्साला च्याःम्बु पेःदी एःपा ओःले नीङ च्योःदी एःपा? 2 ओःन्डु इःङे लाःना ख्याक्या चीग्रा नावाइदी काःल्दी, चीगकीइ राःङ्साला च्याःम्बु पेःदी, ओःले चीग्रा सेमगीइदी काःल्दी ङाःला केःदाङ जोतेर। 3 ख्याक्या राःङला चीग्रा खे ओःङेन्दी ओःले राःङला छ्योम्बो तेङ्जेइ लागी चीङ लेःगाक्या माःबे, बरु च्याःज्यु (नम्र) काःल्दी राःङ भन्दा राःङ्सा छ्योम्बो इःङे लाःती ठीवा साल्दो। 4 ख्याक्या थाम्जेरकीइ राःङला चीग्रा याःबु ओःङेन तामक्या ठीवा साल्गेन्दी मीःङे, इःनाङ राःङ्सा मीःक्यालाङ याःबु ओःङ्ज्युक लाःती सेम पेःदो। 5 येशु ख्रीष्टकीइ काःन्डुले ठीवा साल्गुके ख्याक्याइयाङ ओःन्डुलेरा ठीवा साल्दो। 6 येशु ख्रीष्ट तेःन्दामरा कोन्ज्यो एःके, इःनाङ खुङगीइ राःङला कोन्ज्यो ङीमु च्योङेम्बा ओःङेन तामला जुम्दी माःज्या। 7 बरु खुङगीइ राःङला सेम थेतीरा दी थाम्जेर तामक्या पोःर्सी, ओःले मीःइ मीःजी लेःङ्दी लाबु च्योःङ्रा पेःदी केसी। 8 खुङगीइ राःङगीइ राःङला छीमी जोसी, ओःले सीजेथुपरा खुङगीइ कोन्ज्योइ आज्ञा ङीःन्सी, क्रुसला सीजेलाङ ङीःन्सी। 9 ओः सोङ्गारा, कोन्ज्योइ खुङला थाम्जेर भन्दा चोला क्यासी, ओःले खुङला थाम्जेर भन्दा छ्योम्बो मीःन तेर्सी। 10 एःन्डुले नाःम्खालीङ, साजाम्बुलीङ ओःले साजाम्बुलीङ वाःला एःक्योक थाम्जेर उइ क्युःपाक्याइ येशुइ मीःनला सेःसा पेःजेला पीमु चुगेन एः, 11 ओःले थाम्जेरकीइ येशु ख्रीष्टरा प्रभु इःङे लाःती लाःकेन एः। ओःले दीखोइ आबा कोन्ज्योला सेःसा ख्योङेन एः। जाम्बुलीङला स्यार्केन ज्योती 12 ओः सोङ्गारा, ङाःइ च्याःम्बु रोःक्या, ङाः ख्याक्या ङीमु तेःकासुना ख्याक्याइ तेन्दुरा कोन्ज्योइ लाःक्योक तामक्या ङीःन्सी, इःनाङ ताः ङाः ख्याक्यालाःम्ले थारीःङ्बु एःकासुनाङ ख्याक्याइ ताःरुङ माःङ्बु ङीःन्कोःउए ओःले कोन्ज्योइ जीबा खुर्ती दार्तेरा राःङगीइ ज्योर्क्योक थार्पाला छाङ्च्युजेला तुःक्पु पेःदो। 13 चीलेलाःना कोन्ज्योइ ख्याक्याइ कील्ला तेन्दुरा लेःगा पेःदी एः। खुङगीइ सेम पेःक्योक लेःगाक्या छाङ्च्युजेला खुङगीइरा ख्याक्याला सेम ओःले ल्हे तेर्ती एः। 14 ची लेःगा पेःनाङ मुःन मुःन माःबेबा ओःले टाःटे माःबेबा पेःदो, 15 ओःन्डु पेःसी लाःना माःङ्बुरा माःताःक्पा एःक्योक मीःक्याइ कील्ला ख्याक्या चीङ खोट म्याःक्योक कोन्ज्योइ पीःजा च्योःङ्रा नीर्दोष ओःले चाङ्मा ओःङेन एः। खुङक्याइ कील्ला ख्याक्या नाःम्खाइ कार्मा च्योःङ्रा स्यार्कोःउए। 16 ओःले मीःजी तेर्केन याःबु लेःङ्गो राःङ्साक्याला लाःतीरा तेः। ख्याक्याइ एःन्डु पेःसी लाःना ङाःइ लेःगा ओःले तुःक्पु एःन्दाराङ माःबेदु लाःती ख्रीष्ट ओःङेन ङीःमाला ङाः गर्व पेःजे ज्योर्केन एः। 17 ख्याक्याइ सेमल्हुक लुदी कोन्ज्योइ लेःगा पेःदेरा एःक्योक सोङ्गारा तुःक्पु ज्योर्क्योक च्योःङ्रारा ङाःइ याःबु लेःङ्गो लाःकासुना तुःक्पु खुर्कोःतु लाःना ओःले सीकोःतु लाःनाङ ङाः केःदाङ एः, ओःले ङाः ख्याक्या थाम्जेर ङीमु खाम्साङा एः। 18 ओःन्डुरा पेःदी ख्याक्याङ केःदाङ पेःदो ओःले ङाः ङीमुरा खाम्साङा पेःदो। तीमोथी ओःले इपाफ्रोडीस 19 प्रभु येशुइ सेम एः लाःना ङाःला रेःवा एः, ङाः गेबुरा तीमोथीला ख्याक्यासाःला ताङ्तेर्के। ओःले खुङ लोःदी ओःङ्मीःजीक ख्याक्याइ बारेला ङाःइ लेःङ्गो ज्योर्मीःजीक ङाः माःङ्बुरा केःदाङ ओःङेन एः। 20 ख्याक्याइ याःबुइ लागी तेःन्दामरा तुःङाल पेःगेन्दी खुङ बाहेक ङाः ङीमु राःङ्सा सुङ म्याः। 21 राःङ्सा थाम्जेर मीःक्या नी येशु ख्रीष्टला सेम एःक्योक तामक्याइ लागी मीःङे, राःङला खे ओःङेन लेःगा चीग्रा पेःजे छोल्गुए। 22 इःनाङ तीमोथी काःन्डुबा एःपा लाःती ख्याक्याइ छोर्तीरा एः। पुःइ आबा ङीमु लेःगा पेःक्योक च्योःङ्रारा, खोइ ङाः ङीमु याःबु लेःङ्गो फेल्गेन लेःगा पेःसी। 23 ताः ङाःला ची ओःङेन इःम्बा तागा, ओःले छोर्लुङम्याःपा खुङला ख्याक्यासाःला ताङेन रेःवा पेःदी एः। 24 ओःले ङाःङ गेबुरा ख्याक्यासाःला ओःङ्जे ज्योर्के लाःती ङाःइ प्रभुखाला सेम ज्यादी एः। 25 इःनाङ ताःसेदी उःक्याइ नोः इपाफ्रोडीटसला ख्याक्यासाःला लोदी ताङ्कोःन्दी ङाःला नेसी। ङीः ङीक्कारकीइ ङीमु ङीमुरा लेःगा पेःसी ओःले याःबु लेःङ्गो फेल्गेन लेःगालाङ ङीः ङीक्कारकीइ तुःक्पु पेःसी। खो ख्याक्याइ लेःङ्गो छुरफार क्याल्जेला रोः पेःतेर्केन मीः इःङे, ओःले ङाःला कोःक्योक स्याःक्याला रोः पेःतेर्चेला ख्याक्याइ खोला ङाःसाःला ताङ्तेर्सी। 26 खोइ ख्याक्या थाम्जेरला फ्रेकेन छ्योम्बो सेम पेःदी एः। खो नेःपा काःल्दी एः लाःक्योक ताम ख्याक्याइ कोःक्योक सोङ्गारा खोइ माःङ्बुरा तुःङाल पेःदी एः। 27 तेःन्दामरा खो माःङ्बुरा नेःपा काःल्दी सीजेरा छोल्दी एःके। इःनाङ कोन्ज्योइ खोला नीङ च्योःसी ओःले टाःच्युसी। खोला चीग्रा मीःङे, कोन्ज्योइ ङाःलाङ नीङ च्योःसी, ओःले ङाःइ तुःङालखाला राःङ्सा तुःङाल पेःमाःको। 28 ओः सोङ्गारा, ङाः खोला ख्याक्यासाःला ताङ्जेला ताःरुङ माःङ्बुरा सेम नेती एः, ओःले खोला फीर्च्या थोङ्दी ख्याक्या माःङ्बुरा केःदाङ ओःङेन एः ओःले ङाःइ सेमाङ याःङ्दी ओःङेन एः। 29 प्रभुइ मीःनला खुङला राःङगीइ आतानोः च्योःङ्रा पेःदी खाम्साङा पेःदेरा तोःङ्ज्याङ पेःदो, ओःले खुङ च्योःङ्रा एःन्डुबा मीःक्याला सेःसा पेःदो। 30 चीलेलाःना ख्रीष्टकीइ लेःगा पेःगासुना खोइ राःङगीइ जुबुलाङ खतराला क्याल्दी तेःमेइ सीबा। खोइ एःन्डु पेःदी ख्याक्याइ ङाःला रोः पेःमाःखुक्योक तामला खोइ ङाःला रोः पेःसी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.