फीलेमोन 1 - स्युबा1 येशु ख्रीष्टकीइ बारेला याःबु लेःङ्गो फेल्क्योक सोङ्गारा चेङाङला स्युःक्योक ङाः पावल, ओःले उःइ नोः तीमोथीलाःम्ले, उः ङीमुरा लेःगा पेःगेन च्याःम्बु रोः फीलेमोनला, 2 उःइ नोःमो अप्फीयाला, उःइ च्योःङ्रारा प्रभुइ लेःगा पेःगेन रोः अर्खीपस ओःले ख्याइ खीमला जोम्ङेन प्रभुला सेमल्हुक लुगेन मीःक्या थाम्जेरला, 3 उःइ आबा कोन्ज्यो ओःले प्रभु येशु ख्रीष्टकीइ ख्याक्याला अनुग्रह ओःले खाम्साङ्बु तेर्च्युक। फीलेमोनगीइ च्याःम्बु ओःले सेमल्हुक 4 नोः फीलेमोन, ङाःइ प्रार्थना पेःगासुना ख्योला टेःम्बा साल्दी ङाःइ कोन्ज्योला तेन्दुरा थुजीछे तेर्कुए। 5 चीलेलाःना प्रभु येशुला ख्योइ पेःक्योक सेमल्हुककीइ बारेला ओःले कोन्ज्योइ मीःक्या थाम्जेरला ख्योइ पेःक्योक च्याःम्बुइ बारेला ङाःइ कोःदी एः। 6 ख्याइ प्रभुला सेमल्हुक लुगेन मीःक्या ङीमु ताःरुङ माःङ्बु संगती पेःजे खुज्युक, ओःले कोन्ज्योइ उःक्याला तेर्केन थाम्जेर याःबु तामक्या ख्याइ ङोःसेज्युक लाःती ङाः प्रार्थना पेःउए। ओःले दीखोइ पेःगासुना मीःक्याइ ख्रीष्टला सेःसा पेःगेन एः। 7 ङाःइ नोः, ख्योइ राःङ्साक्याला च्याःम्बु पेःक्योक सोङ्गारा ङाः माःङ्बुरा केःदाङ काःल्दी एः, ओःले ङाःइ उत्साह ज्योर्ती एः। चीलेलाःना ख्योइ कोन्ज्योइ मीःक्याइ सेमला उत्साह तेर्ती एः। ओनेसीमसकीइ लागी वासी 8 ओः सोङ्गारा, ख्योइ ची पेःकोन्दी इःङे, ओःखो पेःजेला ख्रीष्टकीइ ङाःला तेर्क्योक आङ्ज्यालाःम्ले ख्योला ङाः आज्ञा तेर्चे खुजे एःके, 9 इःनाङ ङाः ख्योला च्याःम्बु पेःदी वासी पेःगे। ताः ङाः पावल काःपु मीः ओःले येशु ख्रीष्टकीइ लागी चेङाङला काक्योक, 10 ङाःइ पुः च्योःङ्रा एःक्योक ओनेसीमसला रोः पेःदो लाःती ङाः ख्योला वासी पेःगे। ङाः दीला चेङाङला एःकासुना सेमल्हुकला ङाः खुङगीइ आबा काःल्दी एः। 11 तोःङ्ला खुङ ख्योला चीङ लेःगा म्याःके, इःनाङ खुङ ताःसे उः ङीक्कारला लेःगा ओःङेन मीः काःल्दी एः। 12 ङाः खुङला फीर्च्याङ ख्योसाःला लोदी ताङ्देरा एः। खुङला ङाः सेम नाःङ मीःजीकरा च्याःम्बु पेःउए। 13 खोला ङाः ङीमुरा ज्याजेला ङाःला सेम थेती एःके, चीलेलाःना याःबु लेःङ्गो लाःक्योक सोङ्गारा ङाःला चेङाङला काक्योक तीःजीला ख्योइ साटोला खोइ ङाःला रोः पेःजे खुजेके। 14 इःनाङ ख्योला तोःङ्ला माःटीबा खुङला दीला ङाः ङीमुरा ज्याजेला ङाःला याःबु माने। ङाःला रोः पेःजेला लाःती ख्योला कर माःकाःल्ज्युक, इःनाङ ख्योला सेम थेक्योक च्योःङ्राले ङाःला रोः पेःक्योक ङाःला सेम नेकुए। 15 ओनेसीमस फीर्च्या तेन्दुइ लागी ख्यो ङीमु तेःचे खुज्युक लाःतीरा खुङ चीङ ङीःमाथुप ख्यो ङीमु खाफ्याक्योक इःन्स्वाँ। 16 ताः खो ख्योइ लाबु चीग्रा मीःङे इःनाङ लाबु भन्दाङ याःबु च्याःम्बु नोः काःल्सी। खो ङाःइ लागी माःङ्बुरा च्याःम्बु काःल्दी एः, इःनाङ ख्योइ खोला लाबु च्योःङ्रा ओःले प्रभुला सेमल्हुक लुगेन नोः च्योःङ्रा पेःदी ताःरुङ च्याःम्बु पेःगेन एः। 17 ओः सोङ्गारा, ख्योइ ङाःला ङीःमुरा लेःगा पेःगेन रोः च्योःङ्रा ठीवा चेकुए लाःना खुङलाङ ङाःला च्योःङ्रा चेपा पेःदो। 18 खोइ ख्योला चीङ माःइबा पेःदी एः लाःना ओःले खोइ ख्योला चीङ च्याल्कोःन्दी एः लाःना ङाःइ मीःनला ज्यातेर। 19 ङाः पावल, राःङगीइ लाःक्पाइ दी ताम प्रुःदेरा एः, ओःखो ङाः च्याल्तेर्के। ख्योइ ख्रीष्टला सेम्बा मीःजी ङाःलाःम्लेरा ज्योर्क्योक इःङे लाःती नी ङाःइ लाःमेःकोटो। 20 ओः सोङ्गारा, नोः, प्रभुइ लागी खुङला ङाःइ ख्योला लाःक्योक च्योःङ्रा तोःङ्ज्याङ पेःदो, एःन्डुले ख्रीष्टला ङाःइ सेमला फीर्च्याङ सेम्बा जोतेर। 21 दी इःगी प्रुःदेरा पेःगासुना ङाः सेम नाःङ मीःजीकरा सेमल्हुक लुगे, ख्योइ ङाःइ वासी पेःक्योक तामक्या पेःगेन एः ओःले ओःलेङ माःङ्बु पेःगेन एः। 22 ओःले राःङ्सा ताम चीग दी, ङाःइ लागी डोम्बो तेःकेन कोठा चीग डीक्पु जोदी ज्यो, चीलेलाःना ख्योक्याइ प्रार्थनालाःम्ले ङाः ख्योसाःला ओःङ्खुगे की लाःती रेःवा पेःदी एः। 23 इपाफ्रासकीइ ख्योला टासीदेले लाःती एः। खुङ ङाः ङीमुरा चेङाङला एः, चीलेलाःना खुङगीइयाङ येशु ख्रीष्टला मेःबा पेःउए। 24 ओःन्डुलेरा, ङाः ङीमु ङीमुरा लेःगा पेःगेन रोःक्या मर्कुस, अरीस्तार्खस, डेमास ओःले लुकाइयाङ ख्योला टासीदेले लाःती ताङ्दी एः। 25 उःइ प्रभु येशु ख्रीष्टकीइ ख्याक्या थाम्जेरला अनुग्रह तेर्च्युक। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.