मर्कुस 1 - स्युबाबप्तीस्मा तेर्केन्दी युहन्नाइ लेःङ्गो टाःम्क्योक ( मत्ती ३:१-१२ ; लुका ३:१-१८ ; युहन्ना १:१९-२८ ) 1 कोन्ज्योइ पुः येशु ख्रीष्टकीइ बारेला याःबु लेःङ्गो एःन्डुले छुउए। 2 कोन्ज्योइ लेःङ्गो तेर्केन्दी यशैयाइ छ्येइ पेज्याला एःन्डुले प्रुःदी एः: “कोन्ज्योइ लाःतेरा एः, तादो, ङाः ख्याइ तोःङ तोःङ्ला ङाःइ लेःङ्गो तेर्केन्दीला ताङ्तेर्के ओःले खुङगीइ ख्याइ लाःम तयार जोगेन एः। 3 कोःदो, उजाड ठाउँला मेःन्दा चीग मीःइ छ्योम्बो के तेङ्दी एःन्डु लाःतेरा एः, ‘प्रभु ओःङेन लाःम तयार जोदो, खुङ डोगेन लाःमक्या थेका जोदो!’” 4 ओःले बप्तीस्मा तेर्केन्दी युहन्ना उजाड ठाउँला थोङ्सी। खुङगीइ मीःक्याला एःन्डुले प्रचार पेःसी, “ख्याक्या स्याबा पेःदी लाःयो पोःर्तो ओःले बप्तीस्मा लेःङ्दो ओःले कोन्ज्योइ ख्याक्याइ लाःयो क्षमा पेःतेर्केन एः।” 5 यहुदीया क्षेत्र ओःले यरुशलेम क्याःसाइ थाम्जेर मीःक्या युहन्नासाःला काःल्सी। खुङक्याइ राःङगीइ लाःयो ङीःन्दी पोःर्सी ओःले युहन्नाइ खुङक्याला यर्दन लुःङ्बाला बप्तीस्मा तेर्सी। 6 युहन्नाइ ऊँटकीइ पुलाःम्ले थाक्योक केःला केःङ्गुके, ओःले केपाला पशुइ कोबालाःम्जे जोक्योक कारा चीङ्गुके, ओःले खुङगीइ पेबाक बु ओःले रीःइ ङार्मु साःउके। 7 खुङगीइ मीक्याला एःन्डु लाःसी, “ङाःइ तीङ्ला मेःराङ चीग ओःङ्देरा एः, खुङ ङाःलेङ छ्योम्बो इःङे। ङाः नी कुःदी खुङगीइ लेखाम पीचेलाङ रीःक्पु म्याः। 8 ङाःइ ख्याक्याला छ्युइ बप्तीस्मा तेर्कुएः, इःनाङ खुङगीइ ख्याक्याला चाङ्मा लाइ बप्तीस्मा तेर्केन एः।” येशुइ बप्तीस्मा लेःङ्क्योक ( मत्ती ३:१३–४:११ ; लुका ३:२१-२२ ; ४:१-१३ ) 9 युहन्नाइ एःन्डुले प्रचार पेःदेरा एःकासुना, येशु गालील क्षेत्रइ नासरत युःललाःम्ले ओःङ्सी ओःले खुङगीइयाङ युहन्नाइ लाःक्पालाःम्ले यर्दन लुःङ्बाला बप्तीस्मा लेङ्सी। 10 येशु छ्युलाःम्ले थेङ्लुङ्म्याःपा खुङगीइ नाःम्खालीङ फ्याक्योक ओःले चाङ्मा ला तुङ्कुकुरकीइ छेन्दाला राःङखाला माःर्ला ओःङ्देरा पेःक्योक खुङगीइ थोङ्सी। 11 ओःले नाःम्खालीङलाःम्ले एःन्डु लाःक्योक के कोःसी, “ख्यो ङाःइ माःङ्बुरा च्याःम्बु पेःक्योक पुः इःङे, ख्यो ङीमु ङाः माःङ्बुरा केःदाङ एः।” 12 ओः तीङ्ला इःक्पु चीगलारा कोन्ज्योइ लाइ येशुला उजाड ठाउँला डोच्युसी। 13 ओःला शैतानगीइ खुङला ङीःमा खाल ङीथुप लाःयोला फसाइ तीजेला परीक्षा पेःसी। ओःला रीःदाकक्याङ एःके इःनाङ स्वर्गदुतक्या ओःङ्दी खुङगीइ मेःबा पेःसी। मेःराङ सीः जालहारीक्याला येशुइ केक्याःप्क्योक ( मत्ती ४:१२-२२ ; लुका ४:१४-१५ ; ५:१-११ ) 14 युहन्नाला चेङाङला कामीःजीक येशुइ गालीलला काःल्दी कोन्ज्योइ याःबु लेःङ्गो तेर्काला स्युःसी। 15 खुङगीइ एःन्डु लाःतेरा प्रचार पेःसी, “ताः डीक्पु तीःनाम ओःङ्दी एः, कोन्ज्योइ क्याःल्खाप थामालारा एः। ओः सोङ्गारा, ख्योक्या स्याबा पेःदी लाःयो पोःर्तो, ओःले याःबु लेःङ्गोला सेमल्हुक लुदो।” 16 येशु गालील छोइ सुःरलाःम्ले डोदेरा एःकासुना खुङगीइ सीमोन ओःले खुङगीइ नोः अन्द्रीयासला जाल क्याःप्ती तेःक्योक थोङ्सी। चीलेलाःना खुङक्या ङ्याः सेकेनक्या एःके। 17 येशुइ खुङक्याला लाःसी, “ङाःला ब्य्राङ्दो, ङाः ख्याक्याला ङ्याः जुम्ङेन च्योःङ्रारा मीःक्याला जुम्ङेन्दी ज्योगे।” 18 दीखो कोःलुङ्म्याःपा खुङक्याइ राःङगीइ जालक्या पोःर्ती येशुइ तीङ्ला काःल्सी। 19 ताःरुङ तोःङ्ला डोदेरा एःकासुना येशुइ जब्दीयाइ मेःन्दा ङी पुःक्या याकुब ओःले खुङगीइ नोः युहन्नाला थोङ्सी। खुङक्या टुःला तेःती जाल तयार जोदेरा एःके। 20 येशुइ खुङक्यालाङ थोङ्लुङम्याःपा केक्याःप्सी ओःले खुङक्याइ राःङगीइ आबा जब्दीयाला लेःमीक्या ङीमु टुःलारा पोःर्ती येशुइ तीङ्ला काःल्सी। येशुइ मेःन्दा चीग हेन्डी क्याःप्क्योक मीःला टाःच्युक्योक ( लुका ४:३१-३७ ) 21 येशु ओःले खुङगीइ योबाक्या कफर्नहुम युःलला काःल्सी ओःले यहुदीक्याइ ङाःल सोगेन ङीःमाला येशुइ जोम्साखीमला लोप्काला स्युःसी। 22 खुङगीइ लोप्क्योक कोःदी मीःक्या याःमाछाक काःल्सी चीलेलाःना खुङगीइ राःङ्सा छ्येइ ठीमगीइ लोबेनक्याइ च्योःङ्रा पेःदी मीःङे इःनाङ आङ्ज्या पेःदी लोप्सी। 23 ओः तेःकासुरा जोम्साखीम नाःङ्ला मेःराङ चीग हेन्डी क्याःप्क्योक मीः ओःङ्सी ओःले केतेङ्देरा लाःसी, 24 “ए नासरतकीइ येशु, ख्याइ ङीःक्याला ची पेःजे छोल्क्योक? ची ख्या ङीःक्याला सीःङ्च्युजेला ओःङ्क्योक इःङे? ख्या कोन्ज्योइ ताङ्क्योक चाङ्मा मीः इःङे लाःती ङाःइ ङोःसेउए।” 25 येशुइ ओः हेन्डीला हाप्स्याल तेङ्दी लाःसी, “खाजुम तेः, ओःले दी मीःलाम्ले थेङ्दी सुङ!” 26 ओःले हेन्डीइ ओः मीःला बोल्च्युदी ओः हेन्डी छ्योम्बो केइ केलोक तेङ्दी काःल्सी। 27 दीखो थोङेन मीःक्या थाम्जेर याःमाछाक काःल्सी ओःले लाःकाला स्युःसी, “मीःङे, दी ची इःम्बा? खुङगीइ नी आङ्ज्या एःक्योक सेम्बा ताम लोप्कुदु ओःले हेन्डीक्याइयाङ खुङगीइ हुकुम ङीःन्गुदु।” 28 ओःले गालील क्षेत्रइ थाम्जेरछ्योले येशुइ बारेला गेबु गेबु लेःङ्गो फेल्सी। येशुइ माःङ्बुरा नेःपाक्याला टाःच्युक्योक ( मत्ती ८:१४-१७ ; लुका ४:३८-४१ ) 29 जोम्साखीमले थेङ्लुङ्म्याःपा येशु याकुब रा युहन्ना ङीमु सीमोन रा आन्द्रीयासकीइ खीमछ्योले काःल्सी। 30 सीमोनगीइ क्युःमु छावा केदी तेनला एःके ओःले येशु ओःङ्लुङम्याःपा खीमगीइ मीःक्याइ दीखो ताम खुङला लाःसी। 31 येशु सुःरलारा काःल्दी नेःपाइ लाःक्पा जुम्दी खुङला लाङ्सी ओःले छावाइ खुङला पोःर्सी। ओःले खुङगीइ येशु ओःले खुङगीइ योबाक्याला साःजे थुङ्जे तेर्काला स्युःसी। 32 ओः कुःङ्सेला ङीःमा डुप्मीःजीक मीःक्याइ थाम्जेर नेःपाक्या ओःले हेन्डी क्याःप्क्योक मीःक्याला येशुसाःला ख्योङ्सी। 33 युःलगीइ थाम्जेर मीःक्या खीमगीइ इल्दोकला रुःप काःल्सी। 34 येशुइ माःङ्बुरा खाले नाःजाक्या क्याःप्क्योक मीःक्याला टाःच्युसी ओःले माःङ्बुरा मीःक्यालाःम्ले हेन्डीक्याला तेङ्सी। येशु सु इःङे लाःती ओः हेन्डीक्याला टेःम्बा एःके, ओः सोङ्गारा, खुङगीइ ओः हेन्डीक्याला तामरा लाःमाच्यु। येशुइ गालील क्षेत्रला लोप्काला स्युःक्योक ( लुका ४:४२-४४ ) 35 ङार्तो च्योःङ्रा ङामु नाःमरा माःलाःङ्बा येशु लाःङ्दीङ सुङ म्याःक्योक ठाउँला काःल्दी प्रार्थना पेःसी। 36 इःनाङ सीमोन ओःले खुङगीइ रोःक्या डीक्ती खुङला छोल्गाला काःल्सी। 37 खुङक्याइ येशुला फ्रेमीःजीक एःन्डु लाःसी, “थाम्जेरकीइ ख्याला छोल्देरा एः।” 38 इःनाङ येशुइ खुङक्याला लाःसी, “उः छुर फारकीइ राःङ्सा युःलक्याला डोगा। ओः युःलक्यालाङ ङाःइ याःबु लेःङ्गो लाःकोःउए चीलेलाःना ङाः दी लेःगाइ लागीरा ओःङ्क्योक इःङे।” 39 ओःले येशु जोम्साखीमक्याला प्रचार पेःदेरा काःल्सी ओःले हेन्डीक्या तेङ्देरा गालील क्षेत्र काःङ्रा कोर्तेरा काःल्सी। येशुइ जे नाःजा थेङ्क्योक मीःला टाःच्युक्योक ( मत्ती ८:१-४ ; लुका ५:१२-१६ ) 40 मेःन्दा चीग जे नाःजा थेङ्क्योक मीः येशुसाःला ओःङ्सी ओःले खुङगीइ तोःङ्ला पीमु चुदी लाःसी, “ख्याइ सेम थेसी लाःना ङाःला टाःच्युखुउए ओःले चाङ्मा जोखुउए।” 41 दीखो कोःदी येशुइ सेम नीङ च्योःसी ओःले खुङखाला लाःक्पा ज्यादी लाःसी, “ङाः सेम पेःगे, ख्यो टाःज्युक।” 42 ओः तेःकासुरा खुङ जे नाःजालाःम्ले टाःसी ओःले चाङ्मा काःल्सी। 43 ओःले येशुइ ओः मीःला चोक्पो आज्ञा तेर्ती एःन्डु लाःती गेबुरा ताङ्तेर्सी, 44 “कोःदो, दी ताम ख्योइ सुलाङ माःलाःप! इःनाङ पुजाहारीसाःला काःल्दी ख्यो राःङला जाँच पेःच्युदो। ओःले मोशाइ आज्ञा तेर्क्योक च्योःङ्रारा बली तेर्ती राःङ चाङ्मा काःल्योक दास्यी थाम्जेरला तेर।” 45 इःनाङ ओः मीः काःल्दी राःङ चाङ्मा काःल्योक ताम थाम्जेर मीःक्याला लाःतेरा काःसी। ओः तीङ्ला येशु फीर्च्या ताःम्साङले क्याःसाला स्युःजे माःखु। ओः सोङ्गारा, येशु एकान्त ठाउँला तेचेला काःल्सी। इःनाङ ओःलाङ थाम्जेरछ्योइ मीःक्या खुङसाःला ओःङ्सी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.