याकुब 1 - स्युबा1 कोन्ज्यो रा प्रभु येशु ख्रीष्टला मेःबा पेःगेन लाबु ङाः याकुबलाःम्ले जाम्बुलीङगीइ ठाउँ ठाउँला टाःम्दी तेःक्योक कोन्ज्योइ मीःक्याला टासीदेले। सेमल्हुक रा नावा 2 ङाःइ रोःक्या, ख्याक्याखाला थाम्जेर खालेइ तुःक्पु तुःङाल ओःङ्गासुना ओःखोला पुरा खाम्साङ्बु च्योःङ्रा टेःम्बा साल्दो। 3 चीलेलाःना ख्याक्याइ ओःन्डुबा तुःक्पुक्या ज्योर्कासुना ख्याक्याइ सेमल्हुक लुदीरा तेःसी लाःना ख्याक्याइ धैर्य पेःगेन सेम छार्तेरा डोउए लाःती ख्याक्याइ छोर्ती एः। 4 ओःले ख्याक्या ल्हेला छार्क्योक ओःले चीङ खोट म्याःक्योक मीः ओःङ्जेइ लागी धैर्यला पुरा लेःगा पेःजे तेर। 5 ओःले ख्याक्या नाःङ्ला सुलाङ नावाइ ताःसुक एः लाःना झार्कीइमातीबा तेर्केन कोन्ज्यो ङीमु लाङ्ज्युक, ओःले ख्याक्याला तेर्केन एः। 6 इःनाङ खोइ काःजेङ पाःकेन माःबेबा सेमल्हुक लुदी लाःङ्ज्युक। पाःकेन पेःगेन मीःदी चाङ्बुला ल्हाबाइ छुर्ला फार्ला योङेन छाल च्योःङ्रारा इःङे। 7 ओःन्डुबा पाःकेन पेःगेन मीःइदी प्रभुलाःम्ले चीङ ज्योर्टो लाःती टेःम्बा मेसाल्नाङ ओःङे। 8 चीलेलाःना तोःपाःर्केइ सेम एःक्योक मीः खोइ थाम्जेर डोलोङ तेःलुङला स्थीर मेःयोङ्ए। प्राङ्ना रा छ्युक्पु 9 प्राङ्ना एःक्योक आतानोःक्या ताः ख्याक्या केःदाङ पेःदो चीलेलाःना कोन्ज्योइ ख्याक्याला छ्योम्बो मीः जोदी एः। 10 ओःन्डुरा पेःदी छ्युक्पु आतानोःक्या, प्राङ्ना डोगासुना केःदाङ पेःदो, चीलेलाःना छ्युक्पु मीः नी ओइलीतीदी डोगेन रीःइ मेःन्दो च्योःङ्रारा इःङे। 11 चीलेलाःना चार्पु ङीःमा स्यार्ती खडेरी क्याःप्कासुना मेःन्दोइ पुःङ्मा सीउए, ओःले ओःखोइ मेःन्दो ताःप्कुए ओःले ओःखोइ जेबु तोर्ती डोउए। ओःन्डुरा पेःदी छ्युक्पु मीःक्याङ माःङ्बुरा लेःगाक्याला आल्जाइतीदी राःङगीइ मीःली सीच्युउए। 12 काःन्दीङ तुःक्पु तुःङाल ओःङ्गासुना नादी तेःकेन मीःइ काःजे मोलाम ज्योर्ती एः, चीलेलाःना जाँच पेःगासुना राःम्बु पेःदी तेःकेन मीःलारा कोन्ज्योइ ताःम्ज्या पेःक्योक नाःमाङ मीसीगेन मीःजी तेर्केन एः। 13 उःक्या परीक्षाला एःकासुना सुइयाङ, “कोन्ज्योइरा ङाःला परीक्षाला पार्तीक्योक इःङे” लाःती माःलाःप्च्युक। चीलेलाःना माःरीक्पा तामगीइ परीक्षाला पार्तीजे मीःखुए, ओःले कोन्ज्योइयाङ सुलाङ परीक्षाला पार्मीतीए। 14 थाम्जेर मीः राःङगीइ माःरीक्पा सेमगीइ पेःगासुना परीक्षाला पार्तीउए। 15 ओः सोङ्गारा, राःङगीइ माःरीक्पा सेमगीइ लाःयो केउए। ओःले ओः लाःयो छार्ती ओःङ्दी सीबुला क्याल्गुए। 16 ङाःइ च्याःम्बु आतानोःक्या ख्याक्या राःङगीइ राःङला तुःक मातेर। 17 थाम्जेर याःबु दान रा दी चाङ्मा वरदान नाःम्खालीङलाःम्ले माःर्ला साङ्बु आबालाःम्ले ओःङ्गुए। चेःदी तेःकेन तीःप्सोक च्योःङ्रा पेःदी खुङ नाःमाङ चेःदीमेःतेए। 18 उःक्यादी खुङगीइ जोक्योकक्या नाःङ्ला थाम्जेर भन्दा महत्वपुर्ण ओःङ्खुज्युक लाःती खुङगीइ राःङगीइ तेःन्दामगीइ वचनलाःम्ले खुङ राःङगीइ सेमगीइरा उःक्याला सेम्बा मीःली तेर्सी। कोःजे ओःले पेःजे 19 ङाःइ च्याःम्बु आतानोःक्या, दी ताम टेःम्बा साल्दी ज्यो, ख्याक्या थाम्जेर राःङ्साइ लाःक्योक कोःजेला गेबु पेःदो, राःङगीइ ताम लाःचे तोःङ्ला याःबुले ठीवा साल्दो, गेबु सीःताङ चोक्पो माःबे। 20 चीलेलाःना मीःक्याइ सीःताङगीइ पेःगासुना कोन्ज्योला सेम थेकेन चीङ याःबु ताम ख्योङ्जे मीःखुए। मीःइ सीःताङगीइ पेःगासुना कोन्ज्योइ धार्मीता ज्योर्मीःखुए। 21 ओः सोङ्गारा, थाम्जेर माःरीक्पा लेःगा रा क्युक टोःजे च्योःङ्रा चेपाक्या पोःर्तो। कोन्ज्योइ राःङगीइ वचन ख्याक्याइ सेमला ज्यातेर्ती एः, राःङगीइ सेम नम्र जोदी ओः वचन कोदो, चीलेलाःना ओः वचनगीइ ख्याक्याला सेन्च्युखुगेन एः। 22 ख्याक्याइ दी वचन ङीःङेन्दी चीग्रा मीःङे वचनला ङीन्दी लेःगाङ पेःगेन्दी पेःदो। वचन चीग्रा कोःदी राःङगीइ राःङला तुःक मातेर। 23 चीलेलाःना वचन कोःदी माःङीन लाःना ओः मीः राःङगीइ छेन्दा मेःलोङला तागेन च्योःङ्रा चीग्रा इःङे। 24 खोइ राःङगीइ छेन्दा मेःलोङला तागासुना चीग्रा राःङ काःन्डुबा एःपा लाःती टेःम्बा साल्गुए, इःनाङ मेःलोङ तासीङमीःजीक गेबुरा राःङ काःन्डुबा एःके लाःकेन ताम टेःम्बा चेःकुए। 25 इःनाङ काःखोइ मीःला ताःम्साङा तेर्केन चाङ्मा ठीमला तउए, ओःले ओःखोरा पेःउए, ओःले कोःदी टेःम्बा चेःकेन्दी मीःङे इःनाङ लेःगा पेःगेन्दीङ ओःङ्गुए, ओःखोइ राःङगीइ पेःक्योक लेःगाला मोलाम ज्योर्केन एः। 26 काःन्दीङ मीःइ राःङगीइ राःङला धर्मी टेःम्बा साल्गुए, ओःले राःङगीइ चेला लगाम लाइमीतीए, इःनाङ राःङगीइ राःङला तुःक तेर्कुए लाःना नी ओः मीःइ धर्म व्यर्थ ओःङ्गुए। 27 आबा कोन्ज्योला सेम थेकेन तेःन्दाम धर्म-कर्मदी तुःक्पु ज्योर्क्योक मोःराङ्मु रा तोःजी पीःजाक्याला ताजे ओःले जाम्बुलीङगीइ माःइबा तामक्यालाःम्ले थारीःङ्बु तेःचे इःङे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.