हीब्रु 1 - स्युबा

¹ काःल्क्योक तीःनामला उःइ मेःमे फेबेक्या ङीमु कोन्ज्योइ लेःङ्‍गो तेर्केनक्यालाःम्‍ले कोन्ज्यो माःङ्बुरा खेप माःङ्बुरा खालगीइ तामक्या लाःसी।

² इःनाङ ताः दी तीङगीइ ङीःमाक्याला खुङ राःङगीइ पुःलाःम्‍ले उः ङीमु ताम लाःती एः। राःङगीइ पुःलारा कोन्ज्योइ ङीःमा चीग थाम्जेर तामक्याइ ताःक्पु ओःङ्जेला दाम्सी, ओःले खुङलाःम्‍लेरा कोन्ज्योइ थाम्जेर तामक्या जोसी।

³ कोन्ज्योइ महीमा खुङगीइ पुःइ तेङ्‍गुए, ओःले कोन्ज्यो काःन्डुबा एःपा लाःकेन ताम ख्रीष्टलाःम्‍लेरा थोङ्‍गुए। ओःले खुङगीइ खालाःम्‍ले थेङेन तामलाःम्‍लेरा थाम्जेर तामक्याखाला आङ्ज्या पेःउए। मीःक्याला खुङक्याइ लाःयोलाःम्‍ले ठुदी सीःङ्मीःजीक खुङ छ्‍योम्बो कोन्ज्योइ च्याःबु लाःक्पाछ्‍योले नाःम्खालीङला तेःती एः।

ख्रीष्ट स्वर्गदुतक्या भन्दा छ्‍योम्बो इःङे

⁴ दी तामलाःम्‍ले उःइ छोर्कुए, ख्रीष्ट स्वर्गदुतक्या भन्दाङ छ्‍योम्बो इःङे, ओःले कोन्ज्योइ खुङला स्वर्गदुतक्याला भन्दाङ चोइ मीःन तेर्ती एः।

⁵ कोन्ज्योइ काःन्दीङ स्वर्गदुतला नाःमाङ एःन्डु माःलाःप, “ख्यो ङाःइ पुः इःङे, ओःले तीःरीङ ङाः ख्याइ आबा काःल्दी एः।” ओःले कोन्ज्योइ काःन्दीङ स्वर्गदुतक्याला नाःमाङ एःन्डुङ लाःती म्याः, “ङाः खुङगीइ आबा ओःङेन एः, ओःले खुङ ङाःइ पुः ओःङेन एः।”

⁶ कोन्ज्योइ राःङगीइ सेःसा पेःक्योक पुःला जाम्बुलीङला ख्योङ्‍गासुना खुङगीइ फीर्च्या लाःसी, “कोन्ज्योइ थाम्जेर स्वर्गदुतक्याइ खुङलारा सोल्ज्युक।”

⁷ स्वर्गदुतकीइ बारेला खुङगीइ एःन्डु लाःकुए, “खुङगीइ राःङला मेःबा पेःगेन स्वर्गदुतक्याला ल्हाबा च्योःङ्‍रा ओःले मेःइ मेःबुङ च्योःङ्‍रा जोउए।”

⁸ इःनाङ पुःइ बारेलादी खुङ एःन्डु लाःकुए, “ए कोन्ज्यो, ख्याइ छेसा तेन्दुरा लीःकेन एः, ओःले ख्याइ डीक्पुले ठीम पेःगेन एः।

⁹ ची डीक्पु एःपा ख्याइ ओःखोला च्याःम्बु पेःउए ओःले ची डीक्पु म्याःपा ओःखोला क्युक्ट्वा पेःउए। ओः सोङ्‍गारा, ए कोन्ज्यो, ख्याइ कोन्ज्योइ ख्याला खाम्साङ्बुइ काङ्तेर्ती एः ओःले ख्याइ रोःक्याला भन्दा माःङ्बु सेःसा तेर्ती एः।”

¹⁰ खुङगीइ राःङगीइ पुःला फीर्च्या लाःसी, “ए प्रभु, ख्याइ तोःङ्मीःजीकरा साजाम्बुलीङगीइ चार लुसी, ओःले ख्याइ लाःक्पाइरा ख्याइ नाःम्खाक्या जोसी।

¹¹ ओःक्या थाम्जेर सीःङ्दा चेती डोगेन एः, इःनाङ ख्या तेन्दुरा तेःकेन एः। ओःक्या केःला च्योःङ्‍रा राःल्दी डोउए,

¹² मीःक्याइ केःला क्युर्चेला तुम्क्योक च्योःङ्‍रा ख्याइ ओःक्याला तुम्गेन एः, ओःले ख्याइ राःङ्सा केःला केःङेन एः। इःनाङ ख्या काःन्डुबा एःपा, तेन्दुरा ओःन्डुबारा ओःङ्‍गुए। ओःले ख्या तेन्दुरा सोम्बो तेःकेन एः।”

¹³ कोन्ज्योइ काःन्दीङ स्वर्गदुतला नाःमाङ एःन्डु लाःती म्याः, “ख्याइ टाःलाङक्याला ङाः ख्याइ काङ्बा वाःला माःख्युङथुप ख्या ङाःइ च्याःबु लाःक्पाछ्‍योले तेः।”

¹⁴ ओः सोङ्‍गारा, ओः थाम्जेर स्वर्गदुतक्या थार्चे ज्योर्केनक्याइ लागी मेःबा पेःजेला ताङ्क्योक मेःबा पेःगेन लाक्या चीग्रा इःङे?