गलाती 1 - स्युबा1 ङाः पावल प्रेरीतकीइ दी इःगी प्रुःदेरा एः। मीःइ ओःले मीःक्याइ आङ्ज्यालाःम्ले मीःङे, इःनाङ येशु ख्रीष्ट ओःले खुङला सीक्योकलाःम्ले सोम्बो लोगेन आबा कोन्ज्योइरा ङाःला प्रेरीत जोक्योक इःङे। 2 ङाः ओःले ङाः ङीमुरा दीला एःक्योक आतानोःक्याइ गलातीयाइ कोःम्साला एःक्योक ख्याक्याला दी इःगी ताङ्देरा एः। 3 उःइ आबा कोन्ज्यो ओःले प्रभु येशु ख्रीष्टकीइ ख्याक्याला अनुग्रह पेःज्युक ओःले खाम्साङ्बु तेर्च्युक। 4 येशु ख्रीष्टकीइ उःइ आबा कोन्ज्योइ लाःक्योक तामला ङीःन्सी ओःले खुङगीइ दी लाःयोरा लाःयोइ काःङ्क्योक जाम्बुलीङलाःम्ले उःला थार्च्युजेला उःइ पेःक्योक लाःयोइ लागी उःइ साटोला खुङ राःङ सीसी। 5 कोन्ज्योइ मीःन तेन्दुरा थाम्जेर मीःक्याइ याःरला क्याज्युक। आमेन। याःबु लेःङ्गोदी चीग्रा चीग एः 6 ख्रीष्टकीइ अनुग्रहला तेःचेला ख्याक्याला केक्याःप्केन कोन्ज्योला एःजे गेबुरा पोःर्ती, ख्याक्याइ राःङ्सारा लेःङ्गोछ्योले सेम तेर्क्योक थोङ्गासुना नी ङाःला याःमाछाक नेती एः। 7 लाःकारा लाःना राःङ्सा याःबु लेःङ्गो एःरा म्याः, इःनाङ लाःलेइ लाःलेइ एःन्डुबा मीःक्याङ एः, खुङक्याइ ख्याक्याला तुःक्पु तेर्तेःती एः, ओःले ख्रीष्टकीइ याःबु लेःङ्गोला ख्याक्तान ख्युक्तुङ जोजे चाल्दी एः। 8 चीङ पेःदी ङीःइ ख्याक्याला लाःक्योक याःबु लेःङ्गो भन्दा राःङ्सारा लेःङ्गो सुइयाङ लाःकुए लाःना खुङक्याला खाम्सी सुःज्युक, ओःखो नाःम्खालीङलाःम्ले ओःङेन स्वर्गदुतरा एःनाङ एःच्युक ओःखो ङीःक्यारा एःनाङ एःच्युक। 9 ङाःइ दी तामक्या तोःङ्लाङ लाःती एःके ओःले ताःसेङ लाःतेरा एः, ख्याक्याइ ज्योर्क्योक याःबु लेःङ्गो भन्दा राःङ्सा याःबु लेःङ्गो सुयाङ ख्याक्याला लाःकुए लाःना, खुङक्याला खाम्सी सुःज्युक। 10 ङाः दी तामक्या लाःके चीलेलाःना ङाःइ मीःक्याला केःदाङ जोजे चाल्क्योक इःङ्रा मीःङे, ङाःइ नी कोन्ज्योला का केःदाङ जोजे चाल्क्योक इःङे। ताःरुङाङ ङाः मीःक्याला केःदाङ जोजे छोल्गुए लाःना नी ङाः ख्रीष्टकीइ लाबु ओःङ्जे म्याःके। पावल काःन्डुले प्रेरीत काःल्बा 11 आतानोःक्या ओःले आजीनोःमोक्या, ख्याक्याइ दी ताम सेक्योक ङाः सेम पेःगे, ङाःइ प्रचार पेःक्योक याःबु लेःङ्गो मीःक्यालाःम्ले ओःङ्क्योक मीःङे। 12 दी याःबु लेःङ्गो ङाःइ मीःक्यालाःम्ले ज्योर्क्योककाङ मीःङे, ओःले काःन्दीङ मीःइ ङाःला लोप्क्योककाङ मीःङे। इःनाङ येशु ख्रीष्ट राःङगीइरा ङाःला दी तेङ्तेर्क्योक इःङे। 13 यहुदी रीमठीमला एःकासुना ङाःइ मीःजी काःन्डुबा एःके लाःती ख्याक्याइ छोर्तीरा एः, ओः तीःजीला ङाःइ ख्रीष्टला सेमल्हुक लुगेन मीःक्याला माःङ्बुरा तुःक्पु तेर्सी ओःले सीःङ्दारा जोजे छोल्सी। 14 ङाःइ ङीमुइ रोःक्या नाःङ्लाङ यहुदीक्याइ रीमठीम ङीःन्जेला ङाः थाम्जेर भन्दा तोःङ्ला एःके। ङाःइ फाफमुक्याइ ङीःन्दी ओःङ्क्योक रीमठीम ङाःइ सेम नाःङ मीःजीकरा ङीःन्गुके। 15-16 इःनाङ ङाः केजे तोःङ्लारा कोन्ज्योइ ङाःला खुङगीइ लेःगा पेःजेला दाम्सी, ओःले ङाःला अनुग्रह पेःदी खुङगीइ केक्याःप्सी। ङाःइ राःङ्सा क्युःपाइ मीःक्याइ कील्ला येशुइ बारेला याःबु लेःङ्गो लाःच्युक लाःती खुङगीइ पुः ङाःला ङोःसेच्युजेला खुङला सेम थेसी। ओः तीःजीला ङाःइ काःखोङ मीःलाःम्ले टेःदाम माःलेङ। 17 ओःले ङाः प्रेरीत ओःङ्जे भन्दा तोःङगीइ प्रेरीतक्या ङीमु टेःदाम लेःङ्जेला ङाः यरुशलेमलाङ माःकाल, बरु ङाः थेकारा अरब देशला काःल्सी, ओःले ओः तीङ्ला फीर्च्या दमस्कस क्याःसाला लोःदी ओःङ्सी। 18 ओःले लोः सुम तीङ्ला चीग्रा ङाः पत्रुसला फ्रेकाला यरुशलेमला काःल्सी, ओःले खुङ ङीमु ङाः ओःला ङीःमा चेङाथुप तेःसी। 19 इःनाङ प्रभुइ नोः याकुब बाहेक ङाःइ राःङ्सा काःखोङ प्रेरीतला माःफ्रे। 20 कोन्ज्योइ तोःङला ङाः लाःतेरा एः, ङाःइ ख्याक्याला प्रुःदेरा पेःक्योक दी तामक्या तेःन्दाम इःङे। 21 ओः तीङ्ला ङाः सीरीया ओःले कीलीकीया क्षेत्रछ्योले काःल्सी। 22 ओः तीःजी थुप यहुदीयाला एःक्योक कोःम्साक्याइ मीःक्याइ ङाःला थोङ्दीरा म्याःके। 23 खुङक्याइ ङाःइ बारेला एःन्डु लाःक्योक चीग्रा कोःदी एःके, “तोःङ्ला उःक्याला माःङ्बुरा तुःक्पु तेर्ती उःक्याइ सेमल्हुक लुक्योक तामला सीःङ्दा चेचे छोल्गेन मीःइरा ताःसे ओःखोरा सेमल्हुककीइ बारेला लेःङ्गो लाःतेरा एः।” 24 ङाःइ पेःगासुना खुङक्याइ कोन्ज्योला प्रशंसा तेर्सी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.