एफीसी 6 - स्युबापुःपोःमोक्याला ओःले आबा आमाला टेःदाम 1 पुःपोःमोक्या, ख्याक्या प्रभुइ मीःक्या एःक्योक सोङ्गारा ख्याक्याइ राःङगीइ आबा आमाइ लाःक्योक ङीःन्दो, चीलेलाःना दी ताम याःबु इःङे। 2 छ्येइ पेज्याला प्रुःदी एः, “राःङगीइ आबा आमाला सेःसा पेःदो।” ताःम्ज्या ङीमुरा तेर्क्योक आज्ञादी दीखो तोःङगीइ आज्ञा इःङे। 3 दी आज्ञा ङीःन्सी लाःना ख्याक्याला याःबु ओःङेन एः ओःले दी जाम्बुलीङला ख्योइ छे रीःङ्बु ओःङेन एः। 4 आबाक्या, राःङगीइ पुःपोःमाक्याला सीःताङ मालाङ, बरु खुङक्याला प्रभुइ अनुशासनला ज्यादेरा ओःले वचन लोप्तेरा छार्च्युदो। लाबु रा ताःक्पुक्याला टेःदाम 5 लाबुक्या, ख्याक्याइ ख्रीष्टला सेम नाःङ मीःजीकरा सेःसा पेःदी ङीःन्क्योक च्योःङ्रारा जाम्बुलीङगीइ राःङगीइ ताःक्पुलाङ छ्योम्बो सेःसा पेःदी ङीःन्दो। 6 ख्याक्याइ ताःक्पुक्याइ ख्याक्याला तदेरा पेःगासुना खुङक्याला केःदाङ जोजेला चीग्रा खुङक्याइ लाःक्योक ङीःङेन्दी मीःङे, इःनाङ सेम नाःङ मीःजीकरा ख्रीष्टकीइ लाबुइ च्योःङ्रा पेःदी कोन्ज्योला सेम थेक्योक लेःगा पेःदो। 7 मीःक्याइ लागी लेःगा पेःक्योक च्योःङ्रा पेःदी मीःङे, इःनाङ प्रभुइ लागी पेःक्योक च्योःङ्रा केःदाङ काःल्दी लेःगा पेःदो। 8 ख्याक्या लाःबु एःनाङ ओःले ताःम्साङा मीः एःनाङ, याःबु लेःगा पेःगेनक्या थाम्जेरलारा प्रभुइ इनाम तेर्केन एः लाःती ङीःन्थे ज्यो। 9 ताःक्पुक्या, ख्याक्याइयाङ ओःन्डुरा पेःदी राःङगीइ लाबुक्याला याःबु पेःदो, ओःले खुङक्याला जीबा मातेङ चीलेलाःना नाःम्खालीङला ख्याक्या ङीक्कारकीइदी चीग्रा ताःक्पु इःङे, ओःले खुङगीइ सुलाङ ओलापाङ्दे मेःबेए। कोन्ज्योइ उःक्याला तेर्क्योक टीःक्या 10 ताः थाम्जेर भन्दा तीङ्ला, ख्याक्या प्रभुला ओःले खुङगीइ छ्योम्बो ल्हेला राःम्बु पेःदी तेः। 11 शैतानगीइ ख्याक्याला फसाइतीजे छोल्गासुना खोला टाः पेःजेला कोन्ज्योइ तेर्क्योक थाम्जेर टीःक्या राःङगीइ जुबुला ज्यार्ती तेः। 12 चीलेलाःना उःक्याइ माक क्याःप्केन्दी जाम्बुलीङगीइ मीःक्या ङीमु मीःङे, इःनाङ दी नाक्जुक जाम्बुलीङखाला क्याःल्खाप पेःगेन थाम्जेर माःरीक्पा लाक्या ङीमु, ओःले नाःम्खाला एःक्योक थाम्जेर माःताक्पा लाक्या ङीमु इःङे। 13 ओः सोङ्गारा, माःइबा ङीःमाला कोन्ज्योइ ख्याक्याला तेर्क्योक थाम्जेर टीःक्या ज्यार्तो, ओःले एःन्डुले ख्याक्याइ माःइबा ङीःमा ओःङ्गासुना सामना पेःजे खुगेन एः ओःले ख्याक्याइ थाम्जेर तामक्या पेःदीङ ताःरुङ राःम्बु पेःदी तेःचे खुगेन एः। 14 ओः सोङ्गारा, माक क्याःप्चेला तयार काःल्दी तेः। तेःन्दामला कारा च्योःङ्रा पेःदी केपाला चीङ्दो, प्राःङ्गोकला कागेन ताःक्पाइ कवच केःङ्दो, 15 ओःले खाम्साङ्बु तेर्केन याःबु लेःङ्गोला लेकाम च्योःङ्रा केःङ्दी तयार काःल्दी तेः। 16 एःजे चीग्रा मीःङे, सेमल्हुककीइ ढाल खुर्ती तेः, ओःले ओःखोइ पेःगासुना शैतानगीइ क्याःप्केन थाम्जेर मेःइ बार्तेरा पेःक्योक दास्युक्याला ख्याक्याइ काजे खुगेन एः। 17 कोन्ज्योइ तेर्क्योक थार्पाला माकमीःइ केःङेन च्याइ ताकी च्योःङ्रा पेःदी केःङ्दो, ओःले चाङ्मा लाइ तेर्क्योक तरवार खुर्ती तेः, ओः तरवार लाःक्योकदी कोन्ज्योइ वचन इःङे। 18 कोन्ज्योइ ख्याक्याला रोः पेःज्युक लाःती तेन्दुरा प्रार्थना पेःदो ओःले वासी पेःदो। थाम्जेर तीःजीला चाङ्मा लाइ ल्हेलाःम्ले प्रार्थना पेःदो। दी ताम सेमला ज्यादी च्यागाताःक्पु पेःदो, ओःले तेन्दुरा थाम्जेर कोन्ज्योइ मीःक्याइ लागी प्रार्थना पेःदो। 19 ङाःइ ताम लाःचे छोल्सुना कोन्ज्योइ ङाःला ताम तेर्च्युक लाःती ङाःइ लागीङ प्रार्थना पेःतेर, ओःले याःबु लेःङ्गोला एःक्योक कोन्ज्योइ सेम नाःङगीइ तेःदामक्या ङाःइ माःजीबा पेःदी लाःचे खुज्युक। 20 दी याःबु लेःङ्गो लाःकासुनारा ङाःला चेङाङला काक्योक इःङे, इःनाङ ङाः दी चेङाङलाङ ख्रीष्टकीइ लेःङ्गो लाःकेन मीः इःङे। ङाःइ काःन्डुले ताम लाःकोन्दी इःङे ओःखो ङाःइ माःजीबा पेःदी लाःचे खुज्युक लाःती प्रार्थना पेःतेर। तीङ्स्योइ टासीदेले 21 ङाः काःन्डुबा एःपा ओःले ङाः ची पेःदेरा एःपा लाःकेन तामक्या ख्याक्याइ छोर्च्युक लाःती उःक्याइ च्याःम्बु पेःक्योक ओःले प्रभुइ लेःगा पेःजेला माःङ्बुरा डीक्पु एःक्योक तुखीकस नोःइ ङाःइ बारेला थाम्जेर तामक्या ख्याक्याला लाःकेन एः। 22 ङीः काःन्डुबा दु लाःकेन ताम ख्याक्याइ छोर्च्युक ओःले ख्याक्याला उत्साह डीक्च्युक लाःती ङाःइ खोला ख्याक्यासाःला ताङ्देरा एः। 23 थाम्जेर आतानोःक्याला ओःले आजीनोःमोक्याला आबा कोन्ज्यो रा प्रभु येशु ख्रीष्टकीइ खाम्साङ्बु, च्याःम्बु ओःले सेमल्हुक तेर्च्युक लाःती ङाः प्रार्थना पेःउए। 24 उःइ प्रभु येशु ख्रीष्टला नाःमाङ च्याःम्बु पेःगेन थाम्जेर मीःक्याला कोन्ज्योइ अनुग्रह तेर्च्युक। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.