एफीसी 1 - स्युबा1 कोन्ज्योइ सेम पेःक्योक सोङ्गारा येशु ख्रीष्टकीइ प्रेरीत काःल्क्योक ङाः पावलगीइ, एफीससला एःक्योक येशु ख्रीष्टला वीश्वासयोग्य एःक्योक कोन्ज्योइ मीःक्याला दी इःगी प्रुःदेरा एः। 2 उःइ आबा कोन्ज्यो ओःले उःइ प्रभु येशु ख्रीष्टकीइ ख्याक्याला अनुग्रह ओःले खाम्साङ्बु तेर्च्युक। ख्रीष्टलाःम्ले ज्योर्केन मोलाम 3 उःइ प्रभु येशु खीष्टकीइ आबा कोन्ज्योला थुजीछे! चीलेलाःना ख्रीष्टलाःम्ले कोन्ज्योइ उःक्याला नाःम्खालीङगीइ थाम्जेर आत्मीक मोलामक्या तेर्ती एः। 4 कोन्ज्योइ उःक्या खुङगीइ तोःङ्ला चाङ्मा ओःले नीर्दोष ओःङ्जे खुज्युक लाःती खुङगीइ जाम्बुलीङ जोजे तोःङ्लारा ख्रीष्टलाःम्ले उःक्याला दाम्दी एःके। 5 कोन्ज्योइ उःक्याला राःङगीइ सेमले येशु ख्रीष्टलाःम्ले उःला राःङगीइ छार्क्युफुर्क्यु जोजेला खुङगीइ तोःङ्लाःम्लेरा ठीवा चेसी। खुङला एःन्डु पेःजेला याःबु नेसी चीलेलाःना खुङगीइ उःक्याला च्याःम्बु पेःउए। 6 ओः सोङ्गारा, कोन्ज्योइ उःक्याला एःजे माःङ्बु अनुग्रह तेर्क्योक सोङ्गारा खुङला थुजीछे फुल्गा। खुङगीइ राःङगीइ च्याःम्बु पेःक्योक पुःला उःक्याइ लागी चीङ रीःन माःनेङ्बारा तेर्सी। 7 कोन्ज्योइ उःक्याला माःङ्बुरा अनुग्रह पेःक्योक सोङ्गारा ख्रीष्टकीइ ठालाःम्ले कोन्ज्योइ उःक्याला थार्च्युदी एः, ओःले उःक्याइ पेःक्योक लाःयोक्या थाम्जेर खुङगीइ क्षमा पेःतेर्ती एः। 8 ओःले खुङगीइ उःक्याला नावा साल्बु ओःले सेबुरीःक्पु जोसी। 9 तोःङ्ला कोन्ज्योइ इप्ती ज्याक्योक तेःदामक्या खुङगीइ उःक्याला तेङ्तेर्ती एः। दी तेःदाम खुङगीइ ख्रीष्टलाःम्ले छाङ्च्युजेला खुङला याःबु नेसी। 10 डीक्पु तीःजी ओःङ्मीःजीक नाःम्खालीङ ओःले जाम्बुलीङला एःक्योक थाम्जेर तामक्याला ख्रीष्टकीइ आङ्ज्या वाःला ख्योङ्दी कोन्ज्योइ राःङगीइ तेःदाम छाङ्च्युगेन एः। 11 उःक्यालाङ येशु ख्रीष्ट ङीमु डीक्च्युदी कोन्ज्योइ खुङगीइ मीःक्या जोजेला दाम्सी, चीलेलाःना दी तेःदाम पेःजेला खुङगीइ तोःङ्लारा ठीवा चेती एःके। ओःले थाम्जेर तामक्या कोन्ज्योइ राःङगीइ सेम पेःक्योक च्योःङ्राले पेःउए। 12 ख्रीष्टला थाम्जेर भन्दा तोःङ्ला सेमल्हुक लुगेन ङीः यहुदीक्याइ कोन्ज्योइ महीमाइ लागी खुङला प्रशंसा पेःज्युक लाःती खुङगीइ ङीःक्याला दाम्क्योक इःङे। 13 ओःले ख्या राःङ्सा क्युःपाइ मीःक्या थार्चे ज्योर्केन तेःन्दामगीइ याःबु लेःङ्गो कोःदी ख्याक्याङ कोन्ज्योइ मीःक्या काःल्सी। ख्याक्याइ ख्रीष्टला सेमल्हुक लुमीःजीक कोन्ज्योइ ताःम्ज्या पेःक्योक चाङ्मा ला तेर्ती ख्याक्याला खुङगीइदी जोसी। 14 कोन्ज्योइ उःक्याला थार्माच्युथुप खुङगीइ ताःम्ज्या पेःक्योक तामक्या उःक्याइ ज्योर्कुए लाःती तेङ्जेला खुङगीइ उःक्याला चाङ्मा ला बैना तेर्ती एः। उःक्या खुङगीइ महीमाइ लागी खुङला प्रशंसा पेःगा। थुजीछे रा प्रार्थना 15 प्रभु येशुखाला ख्याक्याइ लुक्योक सेमल्हुक ओःले कोन्ज्योइ थाम्जेर मीःक्याला ख्याक्याइ च्याःम्बु पेःक्योक तामगीइ बारेला ङाःइ कोःसी। 16 ओः सोङ्गारा, ङाः प्रार्थना पेःगासुना ख्याक्याला टेःम्बा साल्देरा कोन्ज्योला तेन्दुरा थुजीछे तेर्कुए। 17 उःइ प्रभु येशु ख्रीष्टकीइ कोन्ज्यो महीमाइ आबाइ ख्याक्याला चाङ्मा ला तेर्च्युक लाःती ङाः तेन्दुरा प्रार्थना पेःउए। चाङ्मा लाइ ख्याक्याला सेबुरीःक्पु जोगेन एः ओःले ख्याक्याला कोन्ज्यो तेङ्तेर्केन एः, ओःले ख्याक्याइ कोन्ज्योला ताःरुङ याःबुले ङोःसेगेन एः। 18 ङाः दीखोइ लागीङ प्रार्थना पेःगे, ख्याक्याइ सेमगीइ कोः फ्याजे खुज्युक, ओःले काःखो रेःवाइ लागी खुङगीइ ख्याक्याला केक्याःप्क्योक इःङे, ओःले कोन्ज्योइ राःङगीइ मीःक्याला तेर्के लाःक्योक मोलामक्या ची इःङे, ओःखो ख्याक्याइ सेजे खुज्युक। 19 ओःले उःक्या ख्रीष्टला सेमल्हुक लुगेनक्याला रोः पेःगेन कोन्ज्योइ छ्योम्बो ल्हेइ बारेला ख्याक्याइ सेजे खुज्युक लाःती ङाः प्रार्थना पेःउए। दीखोरा ल्हेलाःम्ले 20 खुङगीइ ख्रीष्टला सीक्योकलाःम्ले सोम्बो लोसी ओःले नाःम्खालीङला राःङगीइ च्याःबु लाःक्पाछ्योले तेःच्युसी। 21 ओःले ख्रीष्टकीइ नाःम्खाला एःक्योक थाम्जेर खालेइ ल्हेखाला ओःले दी जाम्बुलीङला क्याःल्खाप पेःगेन थाम्जेरखाला आङ्ज्या पेःउए। ओःले दी तीःनामला चीग्रा मीःङे, इःनाङ ओःङेन तीःनामलाङ ओः थाम्जेरक्याखाला खुङगीइ आङ्ज्या पेःगेन एः। 22 ओःले कोन्ज्योइ थाम्जेर स्याःक्या ख्रीष्टकीइ आङ्ज्याला ज्यातेर्सी, ओःले खुङला कोःम्साइ लागी थाम्जेर तामक्याइ गो जोसी। 23 ओः कोःम्सादी ख्रीष्टकीइ जुबु इःङे, ओःले दी कोःम्साला खुङगीइ मीःली तेर्ती एः ओःले थाम्जेर तामक्या छाङ्च्युगेन्दी खुङरा इःङे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.