कलस्सी 1 - स्युबा1 कोन्ज्योला सेम थेती येशु ख्रीष्टकीइ प्रेरीत काःल्क्योक ङाः पावल ओःले उःक्याइ नोः तीमोथीइ 2 ख्याक्या कलस्से क्याःसाला तेःकेन कोन्ज्योइ मीःक्याला दी प्रुःदेरा एः। ख्याक्या ख्रीष्टला सेमल्हुक लुगेनन्दी डीक्पुइदी एःक्योक आतानोःक्या ओःले आजीनोःमोक्या इःङे। उःक्याइ आबा कोन्ज्योइ ख्याक्याला अनुग्रह ओःले खाम्साङ्बु तेर्च्युक। थुजीछे ओःले प्रार्थना 3 ङीःक्या ख्याक्याइ लागी प्रार्थना पेःगासुना उःक्याइ प्रभु येशु ख्रीष्टकीइ आबा कोन्ज्योला तेन्दुरा थुजीछे तेर्कुए, 4 चीलेलाःना ख्याक्याइ येशु ख्रीष्टला लुक्योक सेमल्हुक ओःले कोन्ज्योइ थाम्जेर मीःक्याला ख्याक्याइ च्याःम्बु पेःक्योक बारेला ङीःक्याइ कोःदी एः। 5 कोन्ज्योइ ख्याक्याइ लागी नाःम्खालीङला डीक्पु पेःदी ज्याक्योक मीःलीला रेःवा पेःक्योक सोङ्गारा ख्याक्याइ एःन्डुबा सेमल्हुक लुसी ओःले च्याःम्बु पेःसी। दी रेःवाइ बारेला ख्याक्याइ तोःङ्लारा तेःन्दामगीइ याःबु लेःङ्गोलाःम्ले कोःसीःङ्दी एः। 6 दी याःबु लेःङ्गो ख्याक्यासाःलाङ ओःङ्दी एः, ओःले तेःन्दामरा मीःक्याला मोलाम ख्योङ्देरा जाम्बुलीङ काःङ्रा फेल्देरा काःल्दी एः। ख्याक्याइ याःबु लेःङ्गोइ बारेला कोःक्योक ङीःमामीःजीक ओःले कोन्ज्योइ अनुग्रहइ बारेला तेःन्दामगीइ ताम सेमीःजीक याःबु लेःङ्गोइ ख्याक्याइ कील्लाङ एःन्डुरा पेःदी लेःगा पेःदेरा एः। 7 दी ताम ङीःक्या ङीमुरा लेःगा पेःगेन च्याःम्बु रोः इपाफ्रासकीइ ख्याक्याला लोप्सी। खुङ ङीःइ साटोला ख्याक्याइ कील्ला ख्रीष्टकीइ लेःगा पेःगेन्दी सेमल्हुक लुजेला डीक्पु एःक्योक च्याःम्बु नोः इःङे। 8 चाङ्मा लाइ ख्याक्याला तेर्क्योक च्याःम्बुइ बारेला खुङगीइरा ङीःला लाःक्योक इःङे। 9 ओः सोङ्गारा, ख्याक्याइ बारेला कोःमीःजीक ङीःइ ख्याक्याइ लागी कोन्ज्यो ङीमु तेन्दुरा प्रार्थना पेःदेरा एः। चाङ्मा लाइ तेर्केन थाम्जेर नावा रा सेजे खुगेन ल्हेलाःम्ले ख्याक्याइ कोन्ज्योइ सेम सेजे खुज्युक लाःती ङीः प्रार्थना पेःगे। 10 ओःले ख्याक्याइ प्रभुला सेम थेकेन मीःजी ताङ्दी तेःचे खुगेन एः ओःले तेन्दुरा खुङला केःदाङ जोगेन तामक्या पेःगेन एः। ख्याक्याइ मीःजीलाःम्ले थाम्जेर खालेइ याःबु लेःगाक्या ओःङेन एः, ओःले ख्याक्याइ कोन्ज्योला ताःरुङ याःबु पेःदी ङोःसेदेरा डोगेन एः। 11 कोन्ज्योइ महीमाइ ल्हेलाःम्ले ओःङ्क्योक ल्हे ज्योर्ती ख्याक्या राःम्बु ओःङ्खुज्युक लाःती ङीःइ प्रार्थना पेःउए। ओः तीङ्ला ख्याक्याइ स्थीर काःल्दी थाम्जेर ताम केःदाङ पेःदेरा नाखुगेन एः। 12 ज्योतीइ क्याःल्खापला कोन्ज्योइ मीःक्याइ ज्योर्केन तामक्या ख्याक्याइयाङ ज्योर्चे खुगेन्दी आबा कोन्ज्योइ जोतेर्ती एः, ओः सोङ्गारा, दीखोइ लागी खुङला तेन्दुरा थुजीछे तेर। 13 चीलेलाःना खुङगीइरा उःक्याला नाक्जुककीइ ल्हेलाःम्ले थार्च्युदी एः, ओःले राःङगीइ च्याःम्बु पेःक्योक पुःइ क्याःल्खाप नाःङ्ला ख्योङ्दी एः। 14 कोन्ज्योइ राःङगीइ पुःलाःम्ले ङीःला थार्च्युसी ओःले उःइ लाःयोक्या क्षमा पेःसी। ख्रीष्टरा थाम्जेर भन्दा छ्योम्बो 15 उःइ मीइ कोन्ज्योला थोङ्जे मीःखुए, इःनाङ खुङगीइ पुः येशु ख्रीष्टलाःम्ले खुङ काःन्डुबा एःपा लाःकेन ताम सेजे खुउए। कोन्ज्योइ जोक्योक थाम्जेर स्याःक्या भन्दा छ्योम्बो ख्रीष्टरा इःङे। 16 चीलेलाःना नाःम्खालीङ रा साजाम्बुलीङला एःक्योक थाम्जेर स्याःक्या कोन्ज्योइरा ख्रीष्टलाःम्ले जोसी। मीइ थोङ्जे खुगेन्दी रा थोङ्जे मीःखुगेन तामक्या, ल्हे एःक्योक मीःक्या, क्याःल्खाप पेःगेन मीःक्या, ल्हे एःक्योक स्वर्गदुतक्या ओःले राःङ्सा लाक्या, दी थाम्जेर कोन्ज्योइ ख्रीष्टलाःम्ले जोसी ओःले खुङगीइ लागी जोसी। 17 खुङ थाम्जेर तामक्या जोजे तोःङ्लारा एःके, ओःले खुङगीइरा थाम्जेर तामक्याला टीदी ज्यादी एः। 18 ख्रीष्टला सेमल्हुक लुगेन मीःक्या खुङगीइ जुबु इःङे, ओःले ख्रीष्टरा खुङक्याइ गो इःङे। मीःक्याला सेम्बा मीःजी तेर्केन्दी खुङरा इःङे। खुङ थाम्जेर तामला छ्योम्बो ओःङ्जे खुज्युक लाःती थाम्जेर भन्दा तोःङ्ला कोन्ज्योइ खुङलारा सीक्योकक्यालाःम्ले सोम्बो लोसी। 19 चीलेलाःना कोन्ज्योइ राःङगीइरा खुङगीइ पुः ङीमु कोन्ज्योइ थाम्जेर याम्दारक्या एःच्युक लाःती ठीवा चेती एःके। 20 ओःले ख्रीष्ट क्रुसला प्याङ्दी सीगासुना खुङगीइ ठालाःम्ले कोन्ज्योइ नाःम्खालीङ रा साजाम्बुलीङला एःक्योक थाम्जेर तामक्याला फीर्च्या राःङ ङीमु टीदी ज्यासी। 21 तीःजी चीगला ख्याक्या कोन्ज्योमीःजीक थारीःङ्बु काःल्दी एःके, ओःले माःरीक्पा ठीवाक्या लेःङ्दी माःरीक्पा लेःगाक्या पेःक्योक सोङ्गारा ख्याक्या कोन्ज्योइ टाःलाङ काःल्दी एःके। 22 इःनाङ कोन्ज्योइ तोःङ्ला ख्याक्याला चाङ्मा, चीङ खोट म्याःक्योक ओःले माःताक्पा म्याःक्योक तेङ्जेला, खुङगीइ ख्रीष्टला मीःइ जुबुला जोसी ओःले क्रुसला सीच्युदी कोन्ज्योइ ताः ख्याक्याला राःङ ङीमु डीक्च्युदी एः। 23 ओः सोङगारा, ख्याक्या सेमल्हुक लुदीरा तेः ओःले राःम्बु काःल्दी तेः, ओःले याःबु लेःङ्गोलाःम्ले कोन्ज्योइ ख्याक्याला ताःम्ज्या पेःक्योक तामला रेःवा पेःजे माःपोःर। ख्याक्याइ कोःक्योक दीखोरा याःबु लेःङ्गो थाम्जेर जाम्बुलीङगीइ मीःक्याला कोःच्युदी एः, ओःले ङाः पावल दीखोरा याःबु लेःङ्गो फेल्जेला लेःगा पेःगेन योक्पु इःङे। कोःम्साइ लागी पावलगीइ पेःक्योक तुःक्पु 24 ताःसे ख्याक्याइ लागी ङाःइ तुःक्पु खुर्कासुना ङाः केःदाङ पेःगे, ओःले ख्रीष्टकीइ जुबु कोःम्साइ लागी खुङगीइ खुर्चे लीःक्योक तुःक्पुक्या ङाःइ जुबुला लेःङ्दी छाङ्च्युजेला रोः पेःदेरा एः। 25 कोन्ज्योइरा ङाःला खुङगीइ मीःक्याइ लागी लेःगा पेःजेला योक्पु जोसी ओःले ख्याक्याइ लागी खुङगीइ लेःङ्गो थाम्जेर ख्याक्याला लोप्केन लेःगा खुङगीइ ङाःला तेर्सी। 26 दी लेःङ्गो खुङगीइ ताःङ्बुइ मीःक्यामीःजीक इप्ती ज्यादी एःके, इःनाङ ताः खुङगीइ राःङगीइ मीःक्याला दीखो सेजे तेर्ती एः। 27 कोन्ज्योइ राःङ्सा क्युःपाइ मीःक्याइ लागीङ छ्योम्बो तेःदाम एः लाःकेन ताम छोर्च्युजेला खुङगीइ राःङगीइ मीःक्याला दी तामक्या तेङ्जेला दाम्सी। दी इप्ती ज्याक्योक ताम दीखोरा इःङे, ख्रीष्ट ख्या राःङ्सा क्युःपाइ मीःक्या ङीमुङ एः, ओःले कोन्ज्योइ महीमाला ख्याक्याइ बो ज्योर्केन एः। 28 ओः सोङ्गारा, ङीःइ थाम्जेर मीःक्याला ख्रीष्टकीइ बारेला लाःकुए, ओःले ङीःक्याइ थाम्जेरला ङीःइ नावाइ खुबाथुप याःबुले चेताउनी तेर्कुए ओःले लोप्कुए। ओः तीङ्ला उःक्याइ खुङक्या थाम्जेरला ख्रीष्टला छार्ती कोन्ज्योइ तोःङ्ला खेर्चे खुगेन एः। 29 ओः सोङ्गारा, ख्रीष्टकीइ ङाः नाःङ्ला तेर्क्योक लेःगा पेःगेन छ्योम्बो ल्हेलाःम्ले ङाः माःङ्बुरा तुःक्पु पेःदी दी लेःगा पेःगे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.