प्रेरीत 1 - स्युबा

कोन्ज्योइ ताःम्ज्या पेःक्योक चाङ्मा ला

^1-2 च्याःम्बु थीयोफीलसज्यु, येशुइ लेःगा पेःगाला स्युःमीःजीक खुङ नाःम्खालीङला माःखेरथुप खुङगीइ पेःक्योक थाम्जेर तामक्या ङाःइ ख्याला तोःङ्‍गीइ पेज्याला प्रुःदी एः। येशुला नाःम्खालीङ खेर्चे तोःङ्ला खुङगीइ राःङगीइ दाम्क्योक प्रेरीतक्याला चाङ्मा लालाःम्‍ले आज्ञाक्या तेर्सी।

³ खुङ सीक्योक ङीःमा खाल ङीथुप खुङ ची ची पेःदेरा काःजे खेप खुङक्यासाःला थोङ्सी ओःले माःङ्बुरा दास्यीक्या तेर्ती राःङला सोम्बो एः लाःती तेङ्सी। खुङक्याइ येशुला थोङ्सी ओःले खुङगीइ खुङक्या ङीमु कोन्ज्योइ क्याःल्खापकीइ बारेला ताम लाःसी।

⁴ खेप चीग, येशु खुङक्या ङीमु रुःप काःल्दी साःप्च्या साःजेला तेःकासुना एःन्डुबा आज्ञा तेर्सी, “ख्योक्या यरुशलेमले काःलाङ माःकाल, इःनाङ ङाःइ आबाइ ताःम्ज्या पेःक्योक चाङ्मा लाला कुःदी तेः। दीखोइ बारेला ङाःइ ख्योक्याला तोःङ्लाङ लाःती एःके।

⁵ युहन्‍नाइदी छ्‍युइ बप्‍तीस्मा तेर्कुके, इःनाङ चीङ ङीःमा तीङ्ला ख्योक्याइ चाङ्मा लालाःम्‍ले बप्‍तीस्मा ज्योर्केन एः।”

येशुला नाःम्खालीङला खेर्क्योक

⁶ प्रेरीतक्या येशु ङीमु रुःप डोगासुना खुङक्याइ येशुला टीःसी, “प्रभु, ची ख्याइ ताःसेरा इस्राएल क्याःल्खापला रोमी शासनलाःम्‍ले खाफ्यादी फीर्च्या जोगेन एःपा?”

⁷ येशुइ खुङक्याला लाःसी, “दीखोइ तीःनाम नी आबा कोन्ज्योइ चीग्रा तोक्‍तीदी एः ओःले ओःखो ताम ख्योक्याइ सेमेःकोःए।

⁸ इःनाङ चाङ्मा ला ख्योक्याखाला ओःङ्मीःजीक ख्योक्याइ ल्हे ज्योर्केन एः, ओःले ख्योक्या यरुशलेमला, थाम्जेर यहुदीयाला, सामारीयाला ओःले जाम्बुलीङगीइ गुगुक्याला ङाःइ पाङ्बुक्या ओःङेन एः।”

⁹ खुङगीइ दी ताम लाःमीःजीक, खुङक्याइ तासुना तासुनारा खुङला याःरला मुक्पाला क्यासी ओःले खुङक्याइ खुङला माःथोङ।

¹⁰ खुङक्याइ नाम्सार्गाला तदीरा तेःकासुना एक्‍कासी मेःन्दा ङी कार्मु केःला केःङ्क्योक मीःक्या खुङक्याइ सुःरला लाःङ्सी।

¹¹ ओः मेःन्दा ङी मीःक्याइ लाःसी, “ए गालीलगीइ मीःक्या, ख्योक्या चीले दीला लाःङ्दी नाम्सार्गछ्‍योले तादेरा एःपा? येशुला नी नाःम्खालीङला खेर्ती एः। इःनाङ ख्याक्याइ खुङला काःन्डुले काःल्क्योक थोङ्बा, ओःन्डुरा पेःदी खुङ ङीःमा चीग जाम्बुलीङला फीर्च्या ओःङेन एः।”

यहुदाइ साटोला राःङ्सा प्रेरीत दाम्क्योक

¹² ओः तीङ्ला प्रेरीतक्या जैतुन काःङ पोःर्ती यरुशलेमला लोःदी काःल्सी। ओःलाःम्‍ले यरुशलेम कीलोमीटर चीग जे थारीःङ्बु एः।

¹³ यरुशलेमला लेप्मीःजीक खुङक्या तेःकेन तेङ्‍खाइ कोठाला खुङक्या काःल्सी। ओःला रुःप डोगेनक्या पत्रुस, युहन्‍ना, याकुब, अन्द्रीयास, फीलीप, थोमा, बारथोलोमाइ, मत्ती, अल्फयसकीइ पुः याकुब, देशभक्‍त सीमोन ओःले याकुबकीइ पुः यहुदा एःके।

¹⁴ खुङक्या थाम्जेर रुःप चीःदी येशुइ आमा मरीयम, चीङ पेःन्पीःजाक्या ओःले येशुइ नोःक्या ङीमु प्रार्थना पेःदीरा तेःकुके।

¹⁵ चीङ ङीःमा तीङ्ला ओःला मेःन्दा क्याः चीग रा ङीःस्युजे येशुला सेमल्हुक लुगेन मीःक्या रुःप काःल्दी एःके। पत्रुसकीइ खुङक्याइ तोःङ्ला लाःङ्सी ओःले लाःसी,

¹⁶ “आतानोःक्या, छ्‍येला प्रुःक्योक ताम तेःन्दामरा छाङ्‍कोःचे एःके, ओः छेइ तामलादी चाङ्मा लाइ क्याःल्बु दाऊदलाःम्‍ले यहुदाइ बारेला माःङ्बुरा तोःङ्ला लाःती एःके। खुङगीइरा यहुदीक्याइ तोङ क्याःप्केन मीःक्याला तोःङ क्याःप्‍ती येशुला जुम्जेला रोः पेःसी।

¹⁷ खुङ ङीः च्योःङ्‍रारा मेःन्दा चीग प्रेरीत एःके ओःले ङीःइ च्योःङ्‍रारा प्रभुइ लेःगा पेःजेला खुङला दाम्दी एःके।”

¹⁸ यहुदाइ माःताक्पा च्याःङ्दी ज्योर्क्योक डेबाइ सीःङ चीग ङ्‍योःसी। ओः सीःङ्लारा खुङ फीङ्ग्योलोक पेःदी ताःप्सी ओःले खुङगीइ टोःपा केःती क्युःमाक्या पाङ्ला थेङ्दी सीसी।

¹⁹ दी ताम यरुशलेमगीइ थाम्जेर मीःक्याइ कोःसी ओःले खुङक्याइ ओः सीःङगीइ मीःन खुङक्याइ तामलाःम्‍ले “आखेल्दामा” लाःती ज्यासी। ओःखोइ लेःनदी ठाइ सीःङ इःङे।

²⁰ पत्रुसकीइ फीर्च्या लाःसी, “भजनसंग्रहइ पेज्याला दाऊद क्याःल्बुइ एःन्डुले प्रुःदी एः, ‘ओःखोइ खीमाङ तोङ्‍राङ काःल्ज्युक, ओःखोला सुङ माःतेच्युक।’ ओःखोला एःन्डुबाङ प्रुःदी एः, ‘खुङगीइ पेःगेन लेःगा राःङ्साइरा खेर्च्युक।’

^21-22 ओः सोङ्‍गारा, येशु सीक्योकलाःम्‍ले सोम्बो काःल्क्योक तामगीइ बारेला उः ङीमुरा पाङ्बु तेर्चेला उःक्यालाःम्‍ले मेःन्दा चीगला दाम्रा कोःउए। ओःखो मीःदी येशु ङीःक्या ङीमु एःकासुना तेन्दुरा ङीःक्या ङीमु तेःक्योक मीः कोःउए। खुङ युहन्‍नाइ बप्‍तीस्मा तेर्केन तीःनाममीःजीक प्रभु येशुला नाःम्खालीङला खेर्क्योक ङीःमाथुप ङीः ङीमुरा तेःक्योक मीः कोःउए।”

²³ ओःले ओःला रुःप काःल्क्योक मीःक्याइ मेःन्दा ङीला तोःङ्ला ज्यासी। मेःन्दा चीगदी बारसाबास लाःकेन योसेफ एःके (खुङला युस्तसाङ लाःकुके) ओःले राःङ्सादी मतीयास एःके।

^24-25 खुङक्याइ एःन्डुले प्रार्थना पेःसी, “ए प्रभु, ख्याइ थाम्जेर मीःक्याइ सेमगीइ ताम ङोःसेउए। ओः सोङ्‍गारा, ख्याइ दी मेःन्दा ङीलाःम्‍ले सुलादी प्रेरीतकीइ लेःगा पेःजेला दाम्दी एःपा ओःखो ङीला तेङ्तेर। चीलेलाःना यहुदाइ दी लेःगा पोःर्ती खुङ काःलाइदी इःङे ओःलारा काःल्सी।”

²⁶ ओः तीङ्ला खुङक्याइ ओः मेःन्दा ङीइ मीःनला चीठ्‍ठा लुसी। चीठ्‍ठाला मतीयासकीइ मीःन पर्तीसी ओःले खुङ मेःन्दा च्युजीक प्रेरीतक्या ङीमु पाःसी।