२ थेसलोनीकी 1 - स्युबा

¹ दी इःगीदी पावल, सीलास ओःले तीमोथीलाःम्‍ले उःक्याइ आबा कोन्ज्यो ओःले प्रभु येशु ख्रीष्टला सेमल्हुक लुगेन थेसलोनीका क्याःसाइ कोःम्साक्याइ मीःक्याइ लागी इःङे।

² आबा कोन्ज्यो ओःले प्रभु येशु ख्रीष्टकीइ ख्याक्याला अनुग्रह ओःले खाम्साङ्बु तेर्च्युक।

ख्रीष्टकीइ पेःगेन ठीम

³ ङाःइ च्याःम्बु पेःक्योक रोःक्या, ख्याक्याइ बारेला ङीःक्याइ तेन्दुरा कोन्ज्योला थुजीछे तेर्कुए। ख्याक्याइ सेमल्हुक माःङ्बुरा बढ्तीदेरा काःल्दी एः ओःले चीगकीइ राःङ्साला पेःगेन च्याःम्बु बढ्तीदेरा एः।

⁴ ओः सोङ्‍गारा, ख्याक्याला काःन्डुबारा तुःक्पु ओःले सतावटक्या ओःङ्नाङ ख्याक्या स्थीर काःल्दी कोन्ज्योला सेमल्हुक लुदी तेःक्योक बारेला कोन्ज्योइ कोःम्साक्याइ मीःक्याला ङीः घमण्ड पेःदी लाःचे खुगे।

⁵ दी थाम्जेरकीइ तामगीइ कोन्ज्योइ थाम्जेर मीःक्याला डीक्पु पेःदी ठीम पेःगेन एः लाःती तेङ्‍गुए। ओःले ख्याक्याइ कोन्ज्योइ क्याःल्खापकीइ लागी ताःसे तुःक्पु खुर्तेरा पेःक्योक सोङ्‍गारा कोन्ज्योइ ख्याक्याला खुङगीइ क्याःल्खापला स्युःजेला ख्याक्या डीक्पु एः लाःती लाःकेन एः।

⁶ उःइ कोन्ज्योइ डीक्पु ची एःपा ओःखोरा पेःउए, ओः सोङ्‍गारा, ख्याक्याला तुःक्पु तेर्केनक्याला खुङगीइरा सजाय तेर्केन एः।

⁷ ओःले ख्याक्या तुःक्पु ज्योर्केनक्याला ओःले ङीःक्याला खुङगीइ थाङ सोच्युगेन एः। ओःले प्रभु येशु नाःम्खालीङलाःम्‍ले छ्‍योम्बो ल्हे एःक्योक स्वर्गदुतक्या ङीमु बार्तेरा पेःक्योक मेः नाःङ्ले पेःदी माःर्ला ओःङ्‍गासुना कोन्ज्योइ दी थाम्जेर उःक्याइ लागी पेःगेन एः।

⁸ ओःले कोन्ज्योला ङोःमेसेगेनक्या ओःले उःक्याइ प्रभु येशुइ याःबु लेःङ्‍गोला मीःङीःङेनक्याला खुङगीइ दण्ड तेर्केन एः।

⁹ ओःले खुङक्याइ तेन्दुइ लागी सीःङ्दाक डोगेन दण्ड ज्योर्केन एः, ओःले खुङक्या प्रभुलाःम्‍ले ओःले खुङगीइ ल्हेइ महीमालाःम्‍ले खाफ्यागेन एः।

¹⁰ प्रभु ओःङ्‍गासुना खुङगीइ राःङगीइ चाङ्मा मीःक्यालाःम्‍ले महीमा ज्योर्केन एः, ओःले खुङ ओःङेन एः ओःले खुङला सेमल्हुक लुगेनक्या थाम्जेर याःमाछाक डोगेन एः। ओः तेःकासु ख्याक्याङ खुङक्या ङीमुरा ओःला ओःङेन एः, चीलेलाःना ङीःइ ख्याक्याला लाःक्योक याःबु लेःङ्‍गोला ख्याक्याइ सेमल्हुक लुसी।

¹¹ ओः सोङ्‍गारा, उःक्याइ कोन्ज्योइ ख्याक्याला काःखो मीःलीइ लागी केक्याःप्‍ती एःपा ओःखो मीःलीइ लागी ख्याक्या डीक्पु जोज्युक लाःती ङीःक्याइ ख्याक्याइ लागी तेन्दुरा प्रार्थना पेःउए। ओःले ख्याक्याला याःबु नेक्योक थाम्जेर तामक्या पेःजेला ओःले ख्याक्याइ सेमल्हुककीइ लेःगाक्या पुरा पेःजेला कोन्ज्योइ ख्याक्याला ल्हे तेर्च्युक।

¹² ओःले ख्याक्याइ एःन्डु पेःक्योक सोङ्‍गारा उःक्याइ प्रभु येशुइ मीःनला महीमा ओःङेन एः ओःले ख्याक्यालाङ खुङगीइ महीमा पेःगेन एः। दी थाम्जेर तामक्या उःक्याइ आबा कोन्ज्यो ओःले प्रभु येशु ख्रीष्टकीइ उःक्याला अनुग्रह पेःक्योक सोङ्‍गारा ओःङेन एः।