२ पत्रुस 1 - स्युबा1 येशु ख्रीष्टकीइ लाबु ओःले प्रेरीत सीमोन पत्रुसलाःम्ले, उःइ कोन्ज्यो ओःले थार्च्युगेन येशु ख्रीष्टकीइ धार्मीकतालाःम्ले ङीःक्याइ च्योःङ्रारा छ्योम्बो सेमल्हुक लुगेनक्याला दी इःगी प्रुःदेरा एः। 2 कोन्ज्योइ ख्याक्याला अनुग्रह ओःले ख्याक्याइ सेमला खाम्साङा तेर्च्युक चीलेलाःना ख्याक्याइ कोन्ज्योला ओःले उःइ प्रभु येशुला ङोःसेउए। कोन्ज्योइ केक्याःप्क्योक ओःले दाम्क्योक मीःक्या 3 चाङ्मा मीःजी ताङ्जेला उःक्याला कोःकेन थाम्जेर तामक्या कोन्ज्योइ ल्हेलाःम्लेरा उःक्याइ ज्योर्क्योक इःङे चीलेलाःना राःङगीइ महीमा ओःले श्रेष्ठतालाःम्ले उःक्याला केक्याःप्केन कोन्ज्योला उःइ ङोःसेदी एः। 4 एःन्डुले खुङगीइ उःक्याला ताःम्ज्या पेःक्योक माःङ्बुरा रीःन एःक्योक ओःले छ्योम्बो वरदानक्या तेर्ती एः। दी जाम्बुलीङला ख्रीष्टला सेमल्हुक मीलुगेन मीःक्याइ माःरीक्पा तामक्या पेःगेन सेम पेःक्योक च्योःङ्रा ख्याक्याइ ओःन्डुबा पेःजेलाःम्ले थार्च्युक लाःती ओःले ख्याक्याङ कोन्ज्यो च्योःङ्रारा याःबु काःल्ज्युक लाःती खुङगीइ एःन्डुबा ताःम्ज्या पेःक्योक इःङे। 5 ओः सोङ्गारा, ख्याक्याइ ख्रीष्टला सेमल्हुक लुक्योक सोङ्गारा, ख्याक्याइ खुबाथुप नाःमाङ याःबु तामक्या पेःजे छोल्दो, ओःले याःबु तामक्याइ नावा पाःदो, 6 राःङगीइ राःङला वशला ज्यो, धैर्य पेःदो, ओःले कोन्ज्योला सेम थेकेन पेःदी मीःली सेन्दो, 7 आतानोःक्या ओःले आजीनोःमोक्याला च्याःम्बु पेःदो, ओःले चीङ खोट म्याःक्योक च्याःम्बु पाःदो। 8 चीलेलाःना ख्याक्याला कोःकेन गुणक्या दीखोरा इःङे, ओःले दी तामक्या ख्याक्या ङीमु माःङ्बुरा पेःदी एः लाःना उःइ प्रभु येशु ख्रीष्टकीइ नावाला ख्याक्याइ माःङ्बुरा ब्रुम्दोक्या कोःङ्च्युगेन लेःगाक्या पेःजे खुगेन एः। 9 ओःले काःखो मीःक्या ङीमु दी गुणक्या म्याःबा, खुङक्यादी याःबुले मी मेःथोङेन मीःक्या च्योःङ्रा इःङे। खुङक्याइ राःङगीइ तोःङ्ला पेःक्योक लाःयोक्या कोन्ज्योइ क्षमा पेःतेर्क्योक तामक्याङ खुङक्याइ टेःम्बा चेःसीःङ्क्योक ओःङ्गुए। 10 ओः सोङ्गारा, ङाःइ रोःक्या, कोन्ज्योइ ख्याक्याला केक्याःप्क्योक ओःले दाम्क्योक तामला ख्याक्या ताःरुङ माःङ्बु साङ्बु ओःङ्जे छोल्दो। ख्याक्याइ एःन्डु पेःसी लाःना ख्याक्या राःङगीइ सेमल्हुक लुजेला नाःमाङ मीःरील्गेन एः। 11 एःन्डुले उःइ प्रभु ओःले थार्च्युगेन येशु ख्रीष्टकीइदी नाःमाङ मीःसीःङेन क्याःल्खाप नाःङ्ला ख्याक्याला छ्योम्बो तोःङ्ज्याङ पेःदी केक्याःप्केन एः। 12 इःङ्जे नी ख्याक्याइ दी तामक्या थाम्जेर सेदी एः ओःले ख्याक्याइ ज्योर्क्योक तेःन्दामगीइ वचनला ख्याक्या राःम्बु काःल्दी तेःतीङ एः, इःनाङ ङाः ख्याक्याला दी तामक्या तेन्दुरा टेःम्बा साल्च्युगे। 13 तेःन्दामरा, ङाः सोम्बो एःथुप ङाःइ ख्याक्याला दी तामक्या टेःम्बा साल्च्युदीरा तेःचे ङाःला याःबु नेसी। 14 ङाःइ दी तामाङ छोर्ती एः, ताः ङाः गेबुरा सीगेन एः चीलेलाःना दी ताम उःइ प्रभु येशु ख्रीष्टकीइ ङाःला साङ्बु पेःदी तेङ्तेर्ती एः। 15 ङाः सीमीःजीकाङ ख्याक्याइ दी तामक्याला तेन्दुरा टेःम्बा साल्खुज्युक लाःती खुबाथुप ङाःइ ख्याक्याला दी तामक्या लोप्ती ज्यागे। ख्रीष्टकीइ महीमाइ पाङ्बु 16 ङीःइ ख्याक्याला उःइ प्रभु येशु ख्रीष्टकीइ ल्हेला ओःङेन ङीःमाइ बारेला लाःकासुना मीःक्याइ एःन्दाराङ जोक्योक पेदामक्या लाःती म्याः, इःनाङ ङीःइ राःङगीइ मीइ खुङगीइ छ्योम्बो महीमा थोङ्दी एः। दीखोइ पाङ्बु ङीःक्यारा इःङे। 17 खुङगीइ आबा कोन्ज्योलाःम्ले सेःसा ओःले महीमा ज्योर्कासुना ङीः ओःलारा एःके, ओःले ओःला नाःम्खालीङलाःम्ले एःन्डुबा के खुङसाःला ओःङ्सी, “दी ङाःइ च्याःम्बु पेःक्योक पुः इःङे, खुङ ङीमु ङाः माःङ्बुरा केःदाङ काःल्दी एः।” 18 ओः चाङ्मा काःङ्ला ङीः प्रभु ङीमु एःकासुना नाःम्खालीङलाःम्ले ओःङ्क्योक दी के ङीः राःङगीइरा कोःदी एःके। 19 ओः सोङ्गारा, कोन्ज्योइ लेःङ्गो तेर्केन मीःक्याइ येशु ख्रीष्टकीइ बारेला तेर्क्योक लेःङ्गो तेःन्दामरा इःङे लाःती ङीःक्याइ सेसी। ख्याक्याइ दी लेःङ्गोला सेम तेर्सी लाःना ख्याक्याइ याःबु पेःगेन एः, चीलेलाःना दी लेःङ्गोदी ख्याक्याइ सेमगीइ लागी नाःम माःलाङथुप नाक्जुकला बार्केन छेमी च्योःङ्रा इःङे ओःले ङामु स्यार्केन कार्माइ ज्योती च्योःङ्रा इःङे। 20 इःनाङ ख्याक्याइ दी ताम सेदो, छ्येइ पेज्याला कोन्ज्योइ लेःङ्गो तेर्केनक्याइ लाःक्योक ताम खुङक्याइ राःङगीइ सेमलाःम्ले एःन्दाराङ जोदी प्रुःक्योक मीःङे। 21 चीलेलाःना कोन्ज्योइ लेःङ्गो तेर्केनक्याइ लाःक्योक लेःङ्गो मीःइ सेमलाःम्ले माःयुङ, इःनाङ खुङक्याइ चाङ्मा लालाःम्ले प्रेरणा ज्योर्ती कोन्ज्योलाःम्ले लाःक्योक लेःङ्गो इःङे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.