२ युहन्‍ना 1 - स्युबा

¹ कोन्ज्योइ दाम्क्योक पेःन्पीःजा ओःले ओः मोःइ पुः पुःमोक्याला ङाः कोःम्साइ एल्डरकीइ दी इःगी प्रुःदेरा एः ओःले ङाः खुङक्याला तेःन्दामरा च्याःम्बु पेःगे, ओःखो ङाःइ चीग्रा मीःङे, इःनाङ तेःन्दामला ङोःसेगेन थाम्जेरकीइ ख्याक्याला च्याःम्बु पेःउए।

² ङीःक्या ख्याक्याला च्याःम्बु पेःउए चीलेलाःना तेःन्दाम उः ङीमु एः, ओःले ओः तेःन्दाम तेन्दुरा उः ङीमु ओःङेन एः।

³ आबा कोन्ज्यो ओःले आबाइ पुः येशु ख्रीष्टकीइ उःक्याला अनुग्रह, कृपा ओःले खाम्साङ्बु तेर्च्युक। दी थाम्जेर उः ङीमु तेःन्दामला ओःले च्याःम्बुला एःच्युक।

तेःन्दाम ओःले च्याःम्बु

⁴ ख्याइ पुःपुःमोक्या नाःङ्ला काःजेइदी आबा कोन्ज्योइ उःक्याला तेर्क्योक आज्ञा अनुसार तेःन्दामला काःल्क्योक फ्रेती ङाःला माःङ्बुरा केःदाङ काःल्सी।

⁵ ए ङाःइ च्याःम्बु आजी, ङाःइ ख्याला चीङ सेम्बा आज्ञा प्रुःदी म्याः। उः ङीमु तोःङ्मीःजीकरा एःक्योक आज्ञाइ बारेलारा ङाःइ प्रुःक्योक इःङे। उः थाम्जेरकीइ चीगकीइ राःङ्साला च्याःम्बु पेःगा।

⁶ कोन्ज्योइ आज्ञा ङीःन्दी डोजेरा च्याःम्बु पेःजे इःङे। ख्याइ तोःङ्मीःजीकरा कोःक्योक आज्ञा दीखोरा इःङे, ओः सोङ्‍गारा, ख्याक्याइ चीगकीइ राःङ्साला च्याःम्बु पेःराकोउए।

⁷ येशु ख्रीष्ट मीःइ छेन्दाला ओःङ्क्योक मीःङे लाःती छल पेःगेन मीःक्या जाम्बुलीङला माःङ्बुरा ओःङ्सीङ्दी एः। एःन्डुबा मीःक्यारा छल पेःगेन्दी ओःले ख्रीष्टला वीरोध पेःगेन्दीइ ला एःक्योक इःङे।

⁸ ओः सोङ्‍गारा, ख्याक्या च्यागाताःक्पु पेःदी तेः, उःक्याइ तुःक्पु पेःदी पेःक्योक लेःगाइ इनाम ख्योक्याइ एःन्दाराङ तोर्माच्यु इःनाङ ख्याक्या थाम्जेरकीइ इनाम ज्योर्केन मीःक्या ओःङ्जे खुज्युक।

⁹ ख्रीष्टकीइ शीक्षा भन्दा फीइ तामक्याला ङीःन्दी डोगेन मीःक्या ङीमु कोन्ज्यो मेःतेए। इःनाङ ख्रीष्टकीइ शीक्षा ङीःङेन मीःक्या ङीमुदी आबा रा पुः ङीक्‍कार तेःकेन एः।

¹⁰ ओः सोङ्‍गारा, दी शीक्षाबाहेक फीइ राःङ्सारा शीक्षाक्या ख्योङ्दी ओःङेन मीःक्याला ख्याक्याइ खीमला स्युःजेरा मातेर, ओःले खुङक्याला तासीदेलेङ माःलाःप।

¹¹ चीलेलाःना ओःन्डुबा मीःक्याला टासीदेले लाःचे लाःक्योकदी खोक्याइ माःइबा लेःगाला उःइ रोः पेःक्योक च्योःङ्‍रा इःङे।

¹² ङाःइ ख्याक्याला लाःकोःन तामक्या नी माःङ्बुरा एः, इःनाङ ङाः ख्याक्याला सीउ रा मासीलाःम्‍ले चीग्रा दी थाम्जेर मीःप्रु। बरु ख्याक्याला फ्रेतीरा थाम्जेर ताम लाःकेन रेःवा ज्यादी एः। ओः तीःजीला उः काःजे केःदाङ ओःङेन एः।

¹³ कोन्ज्योइ दाम्क्योक ख्याइ नोःमोइ पुःपोःमोक्याइयाङ ख्याक्याला तासीदेले लाःती एः।