२ कोरीन्थी 1 - स्युबा1 कोन्ज्योइ सेमलाःम्ले येशु ख्रीष्टकीइ प्रेरीत काःल्क्योक ङाः पावल ओःले उःइ नोः तीमोथीलाःम्ले, कोरीन्थीला एःक्योक कोन्ज्योइ कोःम्साइ मीःक्याला ओःले अखैया क्षेत्रला एःक्योक थाम्जेर कोन्ज्योइ मीःक्याला दी इःगी प्रुःदेरा एः। 2 उःइ आबा कोन्ज्यो ओःले प्रभु येशु ख्रीष्टकीइ ख्याक्याला अनुग्रह ओःले खाम्साङ्बु तेर्च्युक। 3 उःइ प्रभु येशु ख्रीष्टकीइ आबा कोन्ज्योला थुजीछे तेर्का। आबा कोन्ज्योइ उःक्याला नीङ च्योःउए ओःले उःक्याला तेन्दुरा उत्साह तेर्कुए। 4 कोन्ज्योइ उःक्या थाम्जेर खालेइ तुःक्पुक्याला लेप्कासुना उःला उत्साह तेर्कुए, ओःले उःक्याइयाङ कोन्ज्योलाःम्ले ज्योर्क्योक ओः उत्साहलाःम्लेरा राःङ्सा तुःक्पु नेक्योक मीःक्याला उत्साह तेर्चे खुउए। 5 चीलेलाःना उःक्याइ ख्रीष्टकीइ लागी तुःक्पु खुर्केन च्योःङ्रारा, ओःन्डुरा पेःदी कोन्ज्योइ ख्रीष्टलाःम्ले उःला माःङ्बुरा सान्त्वना तेर्कुए। 6 ङीःइ तुःक्पु ज्योर्सी लाःना, ओःखो ख्याक्याइ सान्त्वनाइ लागी ओःले ख्याक्या थार्चेइ लागी इःङे। ओःले कोन्ज्योइ ङीःला सान्त्वना तेर्सी लाःना ओःखोलाःम्ले ख्याक्यालाङ सान्त्वना ज्योर्कुए। ओःले ओः सान्त्वनालाःम्ले ङीःइ खुर्क्योक तुःक्पुक्या च्योःङ्रारा ख्याक्याइयाङ धैर्य पेःदी नाजे खुगेन एः। 7 ख्याक्याइ लागी ङीःइ रेःवा नाःमाङ याःर माःर मेःन्डोगेन एः। चीलेलाःना ङीःइ तुःक्पुला ख्याक्याइयाङ काःन्डुले तुःक्पु खुर्पा ओःन्डुरा पेःदी कोन्ज्योइ ङीःला खाम्साङ्बु तेर्कासुना ख्याक्यालाङ खाम्साङ्बु तेर्केन एः लाःती ङीःइ छोर्ती एः। 8 आतानोःक्या ओःले आजीनोःमोक्या, ङीःइ एशीयाला खुर्क्योक तुःक्पुइ बारेला ङाः ख्याक्याला लाःके। चीलेलाःना ङीःइ नारामीःखुगेनथुपकीइ तुःक्पुक्या ङीःखाला लेप्सी, ओःले ओःखोलाःम्ले सेन्डो लाःती नी ङीःइ रेःवारा पेःदी म्याःके। 9 ङीःला नी ताः सीगेन ङीःमा ओःङ्सीःङ्दु लाःती नेती एःके। उःक्या राःङखाला मीःङे इःनाङ सीक्योक्याला सोम्बो लोगेन कोन्ज्योखाला भर पेःजे खुज्युक लाःतीरा एःन्डुबा काःल्क्योक इःङे। 10 खुङगीइ ङीःक्याला ओःन्डुबा छ्योम्बो सीबुलाःम्ले सेन्च्युसी, ओःले तीङ्लाङ ओःन्डुलेरा सेन्च्युगेन एः। खुङगीइ ङीःक्याला फीर्च्याङ सेन्च्युगेन एः लाःती ङीःक्याइ खुङखालारा रेःवा पेःदी एः। 11 ख्याक्याइयाङ दी तामक्याइ लागी प्रार्थना पेःदी ङीःला रोः पेःतेर्ती एः। ओः सोङ्गारा, माःङ्बुरा मीःक्याइ ङीःइ लागी प्रार्थना पेःक्योक सोङ्गारा कोन्ज्योइ ङीःला मोलाम तेर्केन एः ओःले माःङ्बुरा मीःक्याइ कोन्ज्योइ ङीःइ रोः पेःक्योककीइ लागी खुङला थुजीछे तेर्केन एः। पावल कोरीन्थीला माःकाल्क्योक 12 ङीः गर्व पेःदी ओःले याःबु सेम लेःङ्दी लाःचे खुगे, ङीः दी जाम्बुलीङला चीग्रा मीःङे इःनाङ ख्याक्याइ तोःङ्लाङ ङीः राःङगीइ डोलुङ तेःलुङला चीङ ताम माइप्पा ओःले इमान्दार पेःदी तेःसी। ङीःइ ओःन्डुबा कोन्ज्योइ अनुग्रहइ पेःगासुना पेःक्योक इःङे, मीःइ नावाइ पेःगासुना मीःङे। 13-14 ङीःइ दी इःगीला ख्याक्याइ टोःजे मीःखुगेन्दी ओःले सेजेरा मीःखुगेन तामक्या प्रुःदी म्याः। ओःले ङाः रेःवा पेःगे, ख्याक्याइ ङीःक्याला तीबी रेःरे सेक्योक च्योःङ्रा, ङीःमा चीग ख्याक्याइ ङीःला पुरा रुपले ङोःसेगेन एः। ओःले उःइ प्रभु येशु फीर्च्या ओःङेन ङीःमाला, ङीःइ ख्याक्याइ बारेला घमण्ड पेःक्योक च्योःङ्रारा ख्याक्याइयाङ ङीःइ लागी घमण्ड पेःजे खुगेन एः। 15 ङीःइ चीगकीइ राःङ्साला याःबु पेःदी ङोःसेउए लाःकेन ताम ङाःइ तेःन्दामरा छोर्ती एः, ओः सोङ्गारा, ख्याक्याला खेप ङी मोलाम ज्योर्च्युक लाःती ङाः ख्याक्याला फ्रेकाला तोःङ्ला डोगे लाःती तेःदाम पेःसी। 16 माकेडोनीयाला डोगासुनाङ ख्याक्याला फ्रेती डोगे ओःले लोःदी ओःङ्गासुनाङ ख्याक्याला फ्रेके ओःले ओःलाःम्ले यहुदीयाला डोगासुनादी ख्याक्याइ ङाःला लाःमगीइ लागी रोः पेःतेर्केन एः लाःती ङाःइ सेम ज्यादी एः। 17 एःन्डु पेःगेन ठीवा चेकासुना, ची ङाःइ सेम वशला म्याःक्योक मीःक्याइ च्योःङ्रा चेपा पेःबा रा? ची ङाःइ राःङगीइ लेःगाक्याइ बारेला तेःदाम पेःगासुना जाम्बुलीङगीइ मीःक्याइ च्योःङ्रा चीग्रा खाइ नाःमचीग “इःङे” ओःले ओःखोरा खाइ नाःमचीग “मीःङे” लाःपा रा? 18 कोन्ज्यो सेमल्हुक लुजेला डीक्पु एःक्योक च्योःङ्रा ङीःइ ख्याक्याला लाःक्योक लेःङ्गो “इःङे” ओःले “मीःङे” काःल्दी म्याः। 19 चीलेलाःना सीलास, तीमोथी, ओःले ङाःइ ख्याक्याइ कील्ला प्रचार पेःक्योक कोन्ज्योइ पुः येशु ख्रीष्ट “इःङे” ओःले “मीःङे” लाःकेन ताम म्याःके। इःनाङ खुङगीइ “इःङे” लाःसी लाःना, खुङगीइ ओःखो तेन्दुरा पेःउए। 20 चीलेलाःना कोन्ज्योइ पेःक्योक थाम्जेर ताःम्ज्याक्या येशु ख्रीष्टला “ओःङे” ओःङ्गुए। ओः सोङ्गारा, येशु ख्रीष्टलाःम्ले कोन्ज्योइ महीमा ओःङ्ज्युक लाःती ङीः “आमेन” लाःकुए। 21 ताः ङीःला ओःले ख्याक्याला ख्रीष्टला लुगेन सेमल्हुकला राःम्बु जोगेन्दी ओःले ङीःला अभीषेक पेःगेन्दी कोन्ज्योरा इःङे। 22 ओःले उःक्या खुङगीइदी इःङे लाःती तेङ्जेला खुङगीइ उःखाला राःङगीइ पार क्याःप्ती एः, ओःले खुङगीइ पेःक्योक थाम्जेर ताःम्ज्याक्या उःइ ज्योर्केन एः लाःकेन ताम खुङगीइ उःइ सेमला तेङ्जेला चाङ्मा ला तेर्ती एः। 23 कोन्ज्योरा ङाःइ पाङ्बु इःङे, ख्याक्याला ङाःइ माःङ्बुरा केताङ्माःकोःज्युक लाःतीरा ङाः कोरीन्थीला लोःदी माःयुङ्क्योक इःङे। 24 ख्याक्याइ सेमल्हुकखाला ङीः आङ्ज्या मेःबेए, इःनाङ ख्याक्याइ खाम्साङ्बुइ लाःगी ख्याक्या ङीमु डीक्ती लेःगा पेःउए। चीलेलाःना ख्याक्या येशु ख्रीष्टला सेमल्हुक लुदी राःम्बु पेःदी तेःकुए। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.