१ थेसलोनीकी 1 - स्युबा

¹ दी इःगीदी पावल, सीलास ओःले तीमोथीलाःम्‍ले आबा कोन्ज्यो ओःले प्रभु येशु ख्रीष्टला सेमल्हुक लुगेन थेसलोनीका क्याःसाइ कोःम्साक्याइ मीःक्याइ लागी इःङे। ख्याक्याला कोन्ज्योइ अनुग्रह ओःले खाम्साङ्बु तेर्ती मोलाम तेर्च्युक लाःती ङीः प्रार्थना पेःगे।

थेसलोनीकाइ मीःक्याइ सेमल्हुक

² ङीःक्याइ तेन्दुरा ख्याक्या थाम्जेरकीइ लागी कोन्ज्योला थुजीछे फुल्गुए ओःले तेन्दुरा प्रार्थना पेःगासुना ख्याक्या थाम्जेरला टेःम्बा साल्गुए।

³ चीलेलाःना उःइ आबा कोन्ज्योइ तोःङ्ला ख्याक्याइ सेमल्हुककीइ लेःगा ओःले च्याःम्बु पेःदी पेःक्योक तुःक्पु ओःले उःइ प्रभु येशु ख्रीष्टला मेःबा पेःक्योक तामला ख्याक्याइ रेःवा पेःदी कुःदी तेःती एः लाःती ङीःइ तेन्दुरा टेःम्बा साल्देरा एः।

⁴ कोन्ज्योइ च्याःम्बु पेःक्योक ङाःइ रोःक्या, ख्याक्याला कोन्ज्योइरा खुङगीइ मीःक्या जोजेला दाम्क्योक इःङे लाःती ङीःइ छोर्ती एः,

⁵ चीलेलाःना ङीःक्याइ ख्याक्याला कोःच्युक्योक याःबु लेःङ्‍गो ताम चीग्रा म्याःके। इःनाङ चाङ्मा ला ओःले ल्हेलाःम्‍ले कोःच्युक्योक तेःन्दामगीइ याःबु लेःङ्‍गो एःके। ङीःक्या ख्याक्या ङीमु एःकासुना काःन्डुले ख्याक्याइ लागी तेःपा ओःखो ख्याक्याइ याःबुले छोर्तीरा एः।

⁶ ओःले ख्याक्याइ काःजेरा माःङ्बु तुःक्पु ज्योर्नाङ ख्याक्याइ याःबु लेःङ्‍गोला चाङ्मा लाइ खाम्साङ्बुइ पेःदी याःबुले लेःङ्जे खुसी। एःन्डुले ख्याक्याइ नी ङीःइ च्योःङ्‍रा ओःले प्रभुइ च्योःङ्‍रा पेःदी एः।

⁷ ओः सोङ्‍गारा, ख्याक्या नी माकेडोनीया ओःले अखैयाला एःक्योक प्रभुला सेमल्हुक लुगेन थाम्जेर मीःक्याइ लागी उदाहरण च्योःङ्‍रा काःल्दी एः।

⁸ ओःले ख्याक्याइ पेःगासुना प्रभुइ लेःङ्‍गो माकेडोनीया ओःले अखैयाला चीग्रा मीःङे, इःनाङ थाम्जेरछ्‍योले टाःम्दी एः। ताः ख्याक्याइ कोन्ज्योला सेमल्हुक लुक्योक ताम थाम्जेर जाम्बुलीङ काःङ्‍रा टाःम्दी एः, ओःले दीखोइ बारेला ङीःइ माःङ्बु लाःकोःचे म्याः।

⁹ चीलेलाःना ङीःक्या ख्याक्यासाःला ओःङ्‍गासुना ख्याक्याइ ङीःक्याला तोःङ्ज्याङ पेःसी ओःले कुक्याला पोःर्ती सोम्बो रा तेःन्दामगीइ कोन्ज्योला मेःबा पेःजेला ख्याक्या लोःसी। दी तामक्या नी थाम्जेर मीःक्याइरा लाःतेरा एः।

¹⁰ खुङक्याइ एःन्डुबाङ लाःतेरा एः, नाःम्खालीङलाःम्‍ले ओःङेन कोन्ज्योइ पुः येशुला ख्याक्या कुःदी तेःती एः। कोन्ज्योइरा खुङला सीक्योकलाःम्‍ले सोम्बो जोसी, ओःले ठीम पेःगेन ङीःमाला येशुइरा उःला कोन्ज्योइ सीःताङलाःम्‍ले थार्च्युगेन एः।