१ कोरीन्थी 1 - स्युबा1 कोन्ज्योइ सेमलाःम्ले येशु ख्रीष्टकीइ प्रेरीत ओःङ्जेला केक्याःप्क्योक पावललाःम्ले, ओःले उःइ नोः सोस्थेनेसलाःम्ले, 2 कोरीन्थीला एःक्योक कोन्ज्योइ कोःम्साइ मीःक्याला ङीःइ दी इःगी प्रुःदेरा एः। खुङगीइ ख्याक्याला कोन्ज्योइ चाङ्मा मीःक्या जोजेला केक्याःप्ती एः, ओःले खुङगीइ उःइ येशु ख्रीष्टकीइ मीःन लेःङेन थाम्जेरछ्योइ मीःक्याला येशु ख्रीष्टलाःम्ले चाङ्मा जोक्योक च्योःङ्रारा ख्याक्यालाङ चाङ्मा जोदी एः। ओःखोरा ख्रीष्ट खुङक्याइदी ओःले उःइदीङ प्रभु इःङे। 3 उःइ आबा कोन्ज्यो ओःले प्रभु येशु ख्रीष्टकीइ ख्याक्याला अनुग्रह ओःले खाम्साङ्बु तेर्च्युक। थुजीछे तेर्क्योक 4 ख्याक्याइ लागी ङाःइ कोन्ज्योला ङाः तेन्दुरा थुजीछे तेर्कुए, चीलेलाःना येशु ख्रीष्टलाःम्ले कोन्ज्योइ ख्याक्याला अनुग्रह तेर्सी। 5 चीलेलाःना ख्रीष्टलाःम्ले ख्याक्याइ थाम्जेर तामला माःङ्बुरा मोलाम ज्योर्ती एः। खुङगीइ ख्याक्याला ताम लाःखुगेन ल्हे ओःले थाम्जेर ताम सेखुगेन नावा तेर्ती एः। 6 दी तामगीइरा ख्रीष्टकीइ बारेला ङीःइ ख्याक्याला तेर्क्योक लेःङ्गो तेःन्दाम इःङे लाःती कोन्ज्योइ ख्याक्याला दास्यी पेःदी एः। 7 ओः सोङ्गारा, उःइ प्रभु येशु ख्रीष्ट फीर्च्या ओःङेन तामगीइ लाःम तादी तेःकासुना ख्याक्याला काःन्दीङ आत्मीक वरदानगीइ ताःसुक काःल्दी म्याः। 8 उःइ प्रभु येशु ख्रीष्ट ओःङेन ङीःमाला ख्याक्याला माःताक्पा म्याःक्योक पेःदी ज्याजेला, कोन्ज्योइ ख्याक्याइ सेमल्हुकला तीङथुपरा राःम्बु जोतेर्केन एः। 9 कोन्ज्यो भरपर्दो एः, ओःले खुङगीइरा राःङगीइ पुः उःइ प्रभु येशु ख्रीष्ट ङीमु ङीमुरा ओःङ्जेला ख्याक्याला केक्याःप्सी। कोःम्साला खाफ्याक्योक 10 ताः आतानोःक्या ओःले आजीनोःमोक्या, उःइ प्रभु येशु ख्रीष्टकीइ मीःनला ङाः ख्याक्याला वासी पेःगे, ख्याक्या थाम्जेर चीगकीइ राःङ्सा ङीमु ठुक्पा मास्योर, ओःले ख्याक्याइ कील्ला खामाःफ्या। ख्याक्या थाम्जेरकीइ चीग्रा सेम ओःले चीग्रा ठीवा पेःगेन्दी पेःदो। 11 ङाःइ आतानोःक्या ओःले आजीनोःमोक्या, ख्याक्याइ कील्ला ठुक्पा स्योर्तीए लाःती क्लोएइ खीम फेबे मीःक्याइ ङाःला लाःती। 12 ङाःइ कोःक्योक ताम दीखोरा इःङे, ख्याक्या नाःङ्ला लाःलेइ, “ङाः पावलगीइदी इःङे”, लाःलेइ “ङाः अपोल्लोसकीइदी इःङे”, लाःलेइगीइ “ङाः पत्रुसकीइदी इःङे” ओःले लाःलेइ “ङाः ख्रीष्टकीइदी इःङे” लाःलुङ चाउए लो। 13 ची ख्याक्याइ ख्रीष्टला केःजे खुउबा रा? ची पावल ख्याक्याइ लागी क्रुसला सीबा रा? ओःले ची पावलगीइ मीःनला ख्याक्याइ बप्तीस्मा लेःङ्बा रा? 14 ङाः कोन्ज्योला थुजीछे तेर्के, ङाःइ ख्याक्या नाःङ्ला क्रीस्पस रा गायसला बाहेक राःङ्सा सुलाङ बप्तीस्मा तेर्ती म्याः। 15 ओः सोङ्गारा, ङाःइ मीःनला बप्तीस्मा लेःङ्सी लाःती सुइयाङ लाःचे मेःज्योर्के? 16 (इःङे, ङाःइ स्तीफानकीइ खीम फेबेलाङ बप्तीस्मा तेर्सी। ओः बाहेक ङाःइ राःङ्सा सुलाङ बप्तीस्मा तेर्पा की मातेर्पा, ओःखो ङाःला टेःम्बा म्याः।) 17 चीलेलाःना ख्रीष्टकीइ ङाःला बप्तीस्मा तेर्चेला मीःङे, इःनाङ याःबु लेःङ्गो प्रचार पेःजेला ताङ्क्योक इःङे। ङाःइ जाम्बुलीङगीइ नावालाःम्ले प्रचार मेःबेए, मीःङे लाःना नी क्रुसला ख्रीष्ट सीक्योक नी एःन्दाराङ ओःङ्जे एःके। ख्रीष्टरा कोन्ज्योइ ल्हे ओःले नावा इःङे 18 सीःङ्दी डोगेन मीःक्याइ लागी ख्रीष्टकीइ क्रुसला सीक्योक ताम आक्याक्पा च्योःङ्रा इःङे, इःनाङ उः थार्चे ज्योर्केनक्याइ लागी दीखो कोन्ज्योइ ल्हे इःङे। 19 चीलेलाःना छ्येइ पेज्याला एःन्डुबा प्रुःदी एः, “ङाः नावा साल्बु मीःक्याइ रीःक्पा सीःङ्दा चेतेर्के, ओःले च्याङ्बु मीःक्याइ नावा नोङ्तेर्के।” 20 रीःक्पा साल्बु काःला एःपा? शास्त्री काःला एःपा? दी जाम्बुलीङगीइ टाःटेः पेःगेन्दी काःला एःपा? ची कोन्ज्योइ दी जाम्बुलीङगीइ रीःक्पाला आक्याक्पा माःजोबा रा? 21 जाम्बुलीगीइ मीःक्याइ राःङगीइ रीःक्पालाःम्ले कोन्ज्योला नाःमाङ ङोःसेमीःखु लाःती कोन्ज्योइ नावाइ थोङ्सी। ओः सोङ्गारा, कोन्ज्योइ उःइ प्रचार पेःगेन आक्याक्पा च्योःङ्रा याःबु लेःङ्गोला सेमल्हुक लुगेन मीःक्याला चीग्रा थार्च्युजे खुङला सेम थेसी। 22 चीलेलाःना यहुदीक्याइ नी चुःन्डुल छोल्गुए ओःले ग्रीकक्याइ रीःक्पाला छोल्गुए। 23 इःनाङ उः दी क्रुसला प्याङ्क्योक ख्रीष्टकीइ बारेला लेःङ्गो लाःकुए। ओःखो लेःङ्गो यहुदीक्याइ लागी नाःर्तोक क्याःप्केन तोः च्योःङ्रा ओःले राःङ्सा क्युःपाक्याइ मीःक्याइ लागी आक्याक्पा च्योःङ्रा इःङे। 24 इःनाङ यहुदी एःनाङ ओःले राःङ्सा क्युःपाइ मीः एःनाङ, कोन्ज्योइ केक्याःप्क्योक मीःक्याइ लागी नी ख्रीष्ट कोन्ज्योइ ल्हे ओःले कोन्ज्योइ रीःक्पा इःङे। 25 चीलेलाःना कोन्ज्योइ आक्याक्पा ताम मीःइ नावालेङ छ्योम्बो एः ओःले कोन्ज्योइ कम्जोरी मीःइ ल्हे भन्दा छ्योम्बो एः। 26 ङाःइ आतानोःक्या ओःले आजीनोःमोक्या, ख्याक्याला केक्याःप्कासुना ख्याक्या काःन्डुबा एःके ओःखो टेःम्बा साल्दो। जाम्बुलीङगीइ मीःक्याइ ख्याक्या नाःङ्ला माःङ्बु च्योःङ्राला नावा साल्बु मेःलाःप्के। ख्याक्या नाःङ्ला माःङ्बु च्योङ्राइदी ल्हे म्याःके, ओःले ख्याक्या नाःङ्ला माःङ्बु च्योःङ्रा छ्युक्पु खीमलाःम्ले म्याःके। 27 इःनाङ रीःक्पा एःक्योकक्याला ङोःछाबु जोजेला, कोन्ज्योइ जाम्बुलीङगीइ आक्याक्पा तामक्याला दाम्सी ओःले ल्हे एःकेनक्याला ङोःछाबु जोजेला कोन्ज्योइ जाम्बुलीङगीइ ल्हे म्याःक्योकक्याला दाम्सी। 28 जाम्बुलीङगीइ मीःक्याइ महत्वपुर्ण लाःकेन तामक्याला नष्ट जोजेला, कोन्ज्योइ खुङक्याइ छ्यामे ओःले तुच्छ पेःक्योक तामक्याला, ओःले लेःगा म्याक्योक्या तामक्याला दाम्सी। 29 ओः सोङ्गारा, काःन्दीङ मीःइ कोन्ज्योइ तोःङ्ला घमण्ड पेःजे मीःखुए। 30 कोन्ज्योइ पेःगासुनारा ख्याक्या येशु ख्रीष्ट ङीमु एः। कोन्ज्योइ ख्रीष्टला उःइ ज्योर्केन रीःक्पा जोतेर्ती एः। खुङगीइरा उःक्याला कोन्ज्योइ तोःङ्ला ताःक्पा ओःले चाङ्मा जोदी एः, ओःले खुङगीइरा उःक्याला लाःयोलाःम्ले थार्च्युदी एः। 31 ओः सोङ्गारा, छ्येइ पेज्याला एःन्डु प्रुःदी एः, “घमण्ड पेःगेन्दीइ प्रभुइ ची पेःबा ओःखोइ लागी चीग्रा घमण्ड पेःज्युक।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.