Yoël 1 - BINOHẸ SUSI BAL᷊O MAPIA

¹ Seng ini e ipẹ̌paul᷊ị u Mawu si Yoël, anạ i Petuel.

Umatu Israel kụkěndung ual᷊ingu ghěsing sasuang kụ nikinạu kal᷊imbotong

² Daringihẹ̌ko ei apang maghaghurang; tatingangko, kal᷊awọu taumata su Yehuda. Hal᷊ẹ̌ kere ini e wọu nariadi ngae su tempong kamene, arau su tempom manga i upung i kamene tangu?

³ Pẹ̌běkengkong karariading ene e su manga anạ i kamene; tadeạu i sire e měhabarẹ̌ su manga anạ i sire wěke ene. Pal᷊ahěnto tuhụ e hinong dumaringihẹ̌ lai, ringangu maněpasu ene su manga hěnto tuhụ e.

⁴ Ghopol᷊angu kal᷊imbotong kụ tawe kinarekeng kal᷊awọe, němpẹ̌dorọ su manga ansedẹ̌ kụ němpẹ̌kinạ manga wuane. Apang nipẹ̌gagholọ u ghopol᷊angu sěmbaụ e, niěnsueěngu ghopol᷊ange lai wal᷊ine.

⁵ Ei apang bukaneng, pẹ̌bangungke! Ei apan tahainung, pěmpẹ̌kiạ e! U anggorẹ̌ buhu e seng nipul᷊aho wọu mohongu.

⁶ Gapaěngu kal᷊imbotong nẹ̌sal᷊igoahẹ̌ su wanuang kitẹ; i sire enẹeng katoghase ringangu tawe ikatiạ kakěpal᷊e, isine mal᷊ahoro kere kahorong isin singa wawine kakahutabẹ̌.

⁷ I sire nakapate kalung anggorʼi kitẹ, dingangu kalung arang kitẹ, kụ kate nal᷊ěmbe tuide. Manga kalune niwěnị i sire, hakịu manga lelange nakoạ mawira.

⁸ Kiạ e manga umatẹ̌, kere mahuala mělẹ̌lutu sụsangị u papateng kaghiange ikẹ̌kěndagẹ̌.

⁹ Gandung dingangu anggorẹ̌ e seng nailang bọu Wal᷊eʼm Mawu. Tangú nělutu e manga imang, kụ satia mẹ̌tangkiang Mawu.

¹⁰ Manga rahami e ini seng nahěgu. Ěntana seng nělusiang; watụ u kai seng něngkaupu kal᷊awọu gandung, buang anggorẹ̌ něngkaupu, kụ nasuẹ e lanan zaitun.

¹¹ Ei mělahěnsinuang, pěmpẹ̌kěndungko! Ei měndariagạ baelu anggorẹ̌ e, pěmpẹ̌sangị e! Batụu gandung, bakị e ringangu kal᷊awọu apang nipěnsạ e nasue naupu.

¹² Manga kakaluang piạ buane nasue něngkahěgu: kalung anggorẹ̌, apel, ara, korma ringangu dělima. Tangu kawanua e selain tawẹ karal᷊uase.

¹³ Ei manga imang kụ mẹ̌tẹ̌tangkiang su pananěmbaěng, pěluhengkong karong, dingangu pěmpẹ̌sangị e. Suẹ̌ko su Wal᷊em Mawu e kụ pahunsangịko sěhěbi tinalung, u tawẹ apa sasěmba anggorẹ̌ dingangu gandung baugu Ruatanu.

¹⁴ Pěngoroko umatu e pẹ̌puhědang, pěhabarẹ̌kong pẹ̌sasombang masaria! Pẹ̌gausẹ̌ko manga těmbonange ringangu manga matatimadẹ̌ ore lai kal᷊awọu tumanạu Yehuda, tadeạu ruměnta su Wal᷊en Duata, mědeạu kumahiorọ u mẹ̌dorong tul᷊umang si Sie.

¹⁵ Ěllom Mawu e seng masandigẹ̌, ěllọ e makạbintogẹ̌; tempọeng Limembong Kawasa e makakarěntang kawawinasa.

¹⁶ Laidopẹ̌ e nasue nawinasa su těngom matang kitẹ su Wal᷊en Duatang kitẹ e, kụ sen tawẹ apa lai parahul᷊uasẹ̌ dingangu parahul᷊iagẹ̌.

¹⁷ Bine e nate su ěntana mamara-mara. Tạ apa gandung desokang, kụ manga wasunge tawẹ lohone kụ seng nasue nakadodọ.

¹⁸ Binatang piara e lụhuang dingangu kal᷊inso; sen tawẹ lai manga rěmpugẹ̌ bauge. Ghapaěngu domba e mal᷊aing lụhumpinausang.

¹⁹ Iạ e mẹ̌dẹ̌dorong tul᷊ung si Kau, o Mawu, u manga wimbaengu rěmpugẹ̌ e nahěngi-hěngisẹ̌, manga kakaluang e nahěgu ringangu nate tabidạu nikaěngu putung.

²⁰ Saral᷊aing manga binatang dul᷊u su kěhu e kụkahiorọ si Kau mẹ̌dorong ontol᷊ẹ̌. I sire tawe nakawatụ kapulu měnginung, batụu manga sal᷊ụ e nasue něngkal᷊ěsa.