OBAJA 1 - BINOHẸ SUSI BAL᷊O MAPIA

Mawu e sarung měhukung Edom

¹ Seng ini e ol᷊ang i Obaja; i sie mělẹ̌habaru tatanatang Mawu Karangetange mạanun tau Edom: Mawu e seng něndingọ u rarolohangʼE su manga wansa, dingangu i kitẹ seng nakaringihẹ̌ tatanata niwawane kere ini, ”Pěmpẹ̌dariahị e waugu mẹ̌sekẹ! Mahịe i kitẹ tamai měnekẹ Edom.”

² Kụ Mawu e něhengetang su Edom, ”I kau Takụ ipělome mědeạu hinakanengu patikụ bansa.

³ I kau e nikaakal᷊engu naungu e maobotẹ̌. Niupunangu soanu e kai wul᷊udu watu hanibẹ̌; tampạ katatanakengu e kai wul᷊ude marangẹ. Ual᷊ingu ene i kamene mạngěnna u, ’Kai i sai makaumal᷊ẹ̌ mapakanawong Iạ e?’

⁴ Manilaing bal᷊enu koateng kere sal᷊ehu kasiahe karangẹ e ringangu kere karangẹ u manga wituing su l᷊angị, i kau e mamben sarung Takụ ipakanawo.

⁵ Tahatako arau tahahampasẹ̌ kụ diměnta su tempong hěbi, tumbạeng mạngal᷊ạ apang ilẹ̌ěnninge. Taumata kụ měnẹ̌nipo anggorẹ̌ e su rahami e, masau su sul᷊ene mělẹ̌lěmbeng pirang baụ. Arawe i kau e niěmmụ pinakasue kahiang manga sědụu.

⁶ Ei kal᷊awọu hěntong Esau i kau e nighaleda ringangu arětạ u kạbawuni e mal᷊aing nipul᷊aho.

⁷ I kau e niakal᷊eng u manga hapị u, ringangu nitokol᷊e bọu wanuanu. I kau kinawatạ u manga hapị u nihěgateng u tau kimaěng dingangu. I sire mẹ̌kẹ̌kibal᷊ong kakakoạu watangengu, ’Kụ kai suapa orasẹ̌ ini e kal᷊awọu kapandene?’

⁸ Su ěllong Iạ měhukung u Edom, kal᷊awọu taumatane kụ pelesa e Takụ pakawinasa. Dingangu kal᷊awọu kapelesan sire e, sarung mailang, tawẹ ěnnạe.

⁹ Manga matatebone wọu Téman sarung měngkatakụ, dingangu kal᷊awọu sordadong Edom sarung mawihua.”

Unụ e Edom nihukung

¹⁰ ”I kau tumanịu matingkaị niěbạ manga anạ u sěngkataunu hěnton Yakub. Ual᷊ingu ene i kau sarung ipakawinasa, dingangu ipěheghesu taumata sěntiniạ tempo.

¹¹ I kau rụdarisị su kẹ̌karauang, su ěllong sekẹ e něnggagholang tukadu Yerusalem dingangu němatạ soa ene. I kau e měngkate marěmasẹ̌ piạ i sire němpěhuwo kal᷊awọu kakakalạ u Yerusalem mase pinẹ̌papahiạ su tal᷊oaran sire. I kau e mẹ̌sul᷊ung karal᷊akise ringangu sědụ ene.

¹² Tawe hinone i kau e mal᷊uasẹ̌ baugu soen tau Yehuda ringangu rụl᷊uasẹ̌ su tempong ěllong anạu sěngkataunu e mawinasa. Tawe hinone i kau e měngkai tụtal᷊iodosu tal᷊ewa su tempong i sie naunge masusa.

¹³ Tawe hinone i kau e sumuẹ̌ soang umatẹ̌-Ku, ringangu lụl᷊uasu taumata kapẹ̌tatahange sunsara, něngalembọete wue měhampasẹ̌ darotonge su ěllong kasasoene.

¹⁴ Tawe hinone i kau rumarisị su pẹ̌kontol᷊angu ral᷊eng, měhěso taumata tụtal᷊ang u watangenge wọu sědụ e arau měnarakang i sire su sědụ su ěllong i sire kinahombangengu susa.”

Duata e sarung měhukung manga wansa

¹⁵ ”Mamben těngadẹ̌, seng masandigẹ̌ ěllone, Iạ, Mawu e měhukungu manga wansa. Apang nạung kinoạ i Edom sarung bal᷊isang si sie. I sie sarung makapěndang lai apan nạung seng nịkakoạ e.

¹⁶ Su wowong bul᷊udẹ̌-Ku susi e, umatẹ̌-Ku seng něnginung inumang kụ měnẹ̌nul᷊adang hukumange. Arawe inumang baugu manga wansa su dunia ini e něngalembong lai kapaị e. Hukumang ene e tawe ikatihọ i sire. I sire harusẹ̌ měnginung sarang pakasue, bọu ene i sire sarung maghěngging tawẹ ěnạe.”

Kal᷊auntu waugu Israel

¹⁷ ”Arawe su Wul᷊udu Sion, sarung piạ u masal᷊amatẹ̌, dingangu wul᷊ude ene makoạ tampạ tani waugu Iạ. Tangú hěnton Yakub sarung měnaghuang kapia ěntana pusakạ i sire.

¹⁸ Umatẹ̌-Ku Israel sarung kere putung kụ měnutung hěntong Esau pakasue, kere putung kụ měnutung kalung ěmme mahěgu pakasue su rahami. Tawẹu sarang sěngkatau wọu hěntong Esau sarung mal᷊iwirẹ̌. Iạ e Mawu e seng nẹ̌bisara!

¹⁹ Tau Yehuda sěmběkan Timuhẹ̌ sarung maiang su Edom. Taumata apaʼm bọu wawul᷊urange sěmběkaʼm bahẹ e sarung makawatạ ěntanang Pilistin. Hěnton Benyamin sarung makakaiang su Gilead, dingangu Israel umatẹ̌-Ku sarung mẹ̌kawasa kasěllahu Efraim dingangu Samaria.

²⁰ Taumatang Israel sěmběkan Sawěnahẹ̌ e sarung masul᷊e wọu kinawembangeng kụ makakaiang Fenisia sarang Zarfat. Tau Yerusalem kụ nirěmmẹ su Sardis, sarung mẹ̌sul᷊e kụ měnaghuang kal᷊awọu soa su wahageang timuhẹ̌ bọu Yehuda.

²¹ Tumanạu Yerusalem kụ matoghasẹ̌ e sarung měnekẹ Edom kụ sarung makawatạ. Tangu Iạ e Mawu sarung mẹ̌parenta kere sěngkatau ratu!”