MUNANASI 1 - BINOHẸ SUSI BAL᷊O MAPIA

¹ Apam bawera su ral᷊ungu bukẹ̌ ini e nẹ̌buạ bọu Mẹ̌tatiněnnane, ahusi Daud nakoạ datu něngaweng si amange su Yerusalem.

² Mẹ̌tatiněnnane nẹ̌bera: Kěbị e mang sia-sia ringangu tawẹ gunane! Pẹ̌bawiahẹ̌ ini e tawẹ pul᷊ise apa, kěbị e tawẹ mangal᷊ene.

³ Kanandung pẹ̌bawiahi kitẹ e mělẹ̌hal᷊ẹ̌, mẹ̌tatahangu liagha. Kaiso, kawe suapa pul᷊ise kụ botonge i kal᷊esạ i kitẹ tangu?

⁴ Hěnto sěmbaụ suměpụ dingangu hěnto wal᷊ine e mạpuạ tawẹ dise, arawe dunia e měngkate těbe mẹ̌sul᷊ung.

⁵ Matangěllo e wědang sụsěbang dingangu wědal᷊aing sụsědạ. Maning seng nal᷊owe kaiso i sie man saụ mẹ̌sul᷊e kạpia su tampạ e kal᷊imona, wọu e saụ sumẹ̌bang.

⁶ Anging tumiụ sol᷊ong timuhẹ̌, bọu e tumiụ sol᷊ong sawěnahẹ̌; i sie mẹ̌tumbihing kụ saụ mẹ̌sul᷊e kạpia.

⁷ Kěbị sal᷊ụ e maelehẹ̌ sol᷊ong laudẹ̌, kaiso laudẹ̌ e mang tawẹ běke mapenẹ. Akene mẹ̌sul᷊e kapia sol᷊ong ul᷊un sal᷊ụ, bọu e manětạ melehẹ̌ kạpia.

⁸ Kěbị-kěbị e makạboehẹ̌ dingangu kawawoehẹ̌ ene e tawe ikawera. Matang kitẹ e tawẹ běke reng mal᷊aedẹ̌ měmanda; tul᷊ing kitẹ e tawe masasahe rumaringihẹ̌.

⁹ Barang kụ sem bọu mạdiadi e, saụ mariadi kapia. Apan sem bọu kinoạ e saụ lai koateng. Tawẹ apa sěmbaụ barang buhu su dunia ini e.

¹⁰ Piạu mẹ̌bẹ̌bera u, ”Kakěllako ini e kai wuhu!” Kaiso, ene e seng ene kal᷊amonang kitẹ e kinawantelẹ̌.

¹¹ Taumata e tawe makatahěndung apan nariadi su tempo nal᷊iu. Kerene lai karariadi orasẹ̌ ini e ringangu sarung, tawe i katiwạ u taumata su tempo ramahi e.

Ěbạ u Mẹ̌tatiněnna

¹² Iạ Mẹ̌tatiněnna e, mẹ̌parenta su Yerusalem kere ratu waugu Israel.

¹³ Iạ e piạ kapuluku měnanẹ̌sui ringangu měngěndung pakapelesa kal᷊awọu apang mạdiadi su dunia ini. Kakakoạ u pẹ̌bawiahẹ̌ niriahin Duata waugi kitẹ e apạ e makạkěndung.

¹⁴ Iạ e seng nakasilo kal᷊awọu kakanoạ u taumata su dunia ini. Pangimangke, kěbị ene e sia-sia, kere munara kụ měnẹ̌nahusu anging.

¹⁵ Apam bengkọ e tawe i katul᷊idẹ̌ e, ringangu apan tawẹ apa e tawe ikarekeng.

¹⁶ Tiněnnaku e, ”Iạ ini e seng nakoạ taumata mapia, ringangu pelesa, limembong kapelesane wọu kěbị taumata apang nẹ̌parenta su Yerusalem kal᷊amonang iạ. Iạ e měnampungu kasingkạ mal᷊awọ dingangu ěndung.”

¹⁷ Tangu iạ e mẹ̌ngol᷊angu mẹ̌deạ u makasingkạ u pẹ̌dal᷊ahaedangu kasingkạ dingangu karal᷊ongong, wọu kapelesa ringangu kawawodokẹ̌ e. Kaiso nal᷊ahẹ u iạ ini e měngkate mẹ̌sul᷊ungu měnẹ̌nahusu anging samatang.

¹⁸ U mangkeng kakạl᷊awọe kapelesang kitẹ e, kakạl᷊awọe lai gaghiantang i kitẹ. Mangkeng kakạl᷊awọe kasingkạ i kitẹ e, mangkeng kakạl᷊awọe lai kasasigěsạ i kitẹ.