IBRANI 1 - BINOHẸ SUSI BAL᷊O MAPIA

Mawu Ruata e mělẹ̌hengetang limiun AhusʼE

¹ Nạung su tempo kal᷊amona masau susul᷊ene Mawu Ruata e mělẹ̌hengetang su manga i upung i kitẹ e pinakiwerane su manga nabi e ringangu haghing kakakoạ e.

² Arawe tempo samuri ini e i Sie mělẹ̌hengetang si kitẹ e limiung AhusʼE. Limiung AhusʼE ini e Ruata něndiadi langị dingangu dunia patikụ. Dingangu Mawu e seng napakasahẹ u AhusʼE ini e mal᷊aing kawasa managhuang patikụ.

³ Kụ kai i Sie makạsarěnsangu kawawantugʼu Ruata e sụsěnnang. I Sie kai awẹ u Ruata sẹ̌sane. Kụ kawe mal᷊aing i Sie měpẹ̌padul᷊i kal᷊ahěmpukang u dunia ini e ringangu hengetangʼE makawasa. Bọuten i Sie nakakariadin taumata e mal᷊iwirẹ̌ bọu kal᷊awọu rosan sire e tangu, i Sie naintol᷊angke su kaderang paparentaěng su Sorga sěngkakaintol᷊ang dingangu Mawu Ruata, Mangangawasa Karangetange.

Kawawantugu Ahusʼu Ruata

⁴ Ahusẹ̌ ene nakaěbạ kal᷊aianenge limembom marangẹ bọu malạekatẹ̌, dingangu areng nionggọ u Ruata si Sie mal᷊aing limembom maadatẹ̌ bọu areng nionggọ su malạekatẹ̌.

⁵ Tawẹu sarang sěnsul᷊e Duata e něhengetang kere ini sarang l᷊ai su sěngkatau malạekatẹ̌, ”I Kau e kai Ahusẹ̌-Ku; su sěhěllo ini e Iạ makoạ i AmangʼU.” Tawẹ lai Mawu Ruata e něhengetang kere ini mạanun malạekatẹ̌ balạewe měnsang sude lai, ”Iạ e sarung makoạ i AmangʼE, dingangu i Sie sarung makoạ Anạ-Ku.”

⁶ Kai su tempon Duata e něndolohʼu AhusʼE kaiakanenge sol᷊ong dunia ini, Mawu Ruata e něhengetang kere ini, ”Kal᷊awọu malạekatẹ̌ e hinong mẹ̌suba Ahusẹ̌ ene.”

⁷ Mạanụeng manga malạekatẹ̌ e Mawu Ruata e něhengetang kere ini, ”Duata e napakariading manga malạekatʼE e nakoạ anging, dingangu manga mẹ̌tatangkiangʼE nakoạ děllị u putung.”

⁸ Arawe su Ahusẹ̌ ene Ruata něhengetang, ”KararatuangʼU, e Mawu, kai kakalẹ̌ sarang karěngụe! KararatuangʼU e kai kararatuang maadilẹ̌.

⁹ I Kau e puluang bue su kạadilẹ̌, dingangu měbẹ̌binsị u apan tawẹ katul᷊ide; kụ kai ene hakịu Ruata, RuatanʼU e, němile si Kau ringangu něngonggọ kal᷊aadatẹ̌ si Kau kụ makạkaděntan dal᷊uasẹ̌, nangělembo wọu manga hapịʼU.”

¹⁰ Duata e mal᷊aing něhengetang, ”I Kau e, Mawu, kụ nạung su tětạ e něndiadi dunia, ringangu i Kau sẹ̌sanu nẹ̌koạ l᷊angị.

¹¹ Patikụ ene sarung maparung, dingangu matěbe kere lakụ; arawe i Kau e mang tạ pěbawal᷊uine.

¹² Kaguwạu dunia ini e sarung ipẹ̌dal᷊ěkunʼU kere lakụ, kụ hědọ e sarung i Kau pěngawengu wal᷊ine. Arawe i Kau e mang těbe kerene, ringangu pẹ̌bawiahʼU e tawẹ kahěpusange.”

¹³ Mawu Ruata e tawe kadiongeng něhengetang su sarang lai sěngkatau malạekatẹ̌ u, ”Kaiangke su koaneng-Ku, sarangkewe manga rumarokạ si Kau e Takụ ipakaěnsu su těngonʼU.”

¹⁴ Mạeng kerene, kai i sai wue tangu manga malạekatẹ̌ e? I sire e kai manga rohkẹ̌ kụ mẹ̌tẹ̌tangkiang Duata, ringangu irẹ̌dolohʼu Ruata tadeạu ipẹ̌tul᷊ung si sire apan sarung manarimạ u kasasal᷊amatẹ̌.