HOSEA 1 - BINOHẸ SUSI BAL᷊O MAPIA

¹ Ini e kai tita nionggọ u Mawu e si Hosea anạ i Beeri su tempong kararatuang u Yehuda e měgẹ̌gaghintol᷊e su parentan Datu i Uzia, i Yotam, i Ahas, ore lai i Hizkia, ringangu kararatuangu Israel su parentan Yerobeam ahusʼi Yoas.

Kawing dingangu manga anạ i Hosea

² Su tempong Mawu e humotong-motong nẹ̌bisara su tau Israel limiung iạ, Mawu e něhengetang, ”Hosea pẹ̌kawingkon sěngkatau wawine puluang mawuang, dingangu manga anạu e lai sarung makoạ kere i sie. Umatẹ̌-Ku e mẹ̌sul᷊ungu kawingu ene; i sire tawẹ satiane si Siạ, dingangu maněntangu Iạ.”

³ Tangu iạ mẹ̌kawingu sěngkatau wawine arenge i Gomer anạ i Diblaim. Sarětạeng i sie něhěndingu anạ i kandua humotong e, sěngkatau rariọ esẹ,

⁴ Mawu něhengetang si siạ, ”Sěbạko arengu anạu e si Yisreel u tawẹ kaděngụ e lai Iạ sarung měhukungu ratung Israel ual᷊ingu pěmamate nikoạ i Yehu, i upunge, su Yisreel. Iạ sarung mangěnsue pẹ̌paparentang pal᷊ahiten Yehu.

⁵ Su tempo ene su Wal᷊ang Yisreel Iạ hědo sarung měnggoghahẹ̌ katoghasu sordadong Israel.”

⁶ Bọu ene kawingku e něhěndingu anạ i kandua karuane, sěngkatau rariọ bawine. Mawu e něhengetang si siạ, ”Hosea, sěbạko anạ u ene si ’Anu Tawe Nikěndagẹ̌’, u Iạ e sen tawe lai saụ kuměndagu tau Israel, dingangu mamben tawe mẹ̌gěllịu ampung si sire.

⁷ Arawe tau Yehuda e Takụbe sarung ikěndagẹ̌, u Iạ e kai Mawu, Ruatan sire, sarung mapakasal᷊amatʼi sire, katewe wal᷊inewe ual᷊ingu pẹ̌sasekẹ, dingangu wal᷊inewe ual᷊ingu warạ arau papitị arau kawal᷊o ringangu manga sasakene.”

⁸ Sarạeng anạ i kami karuane sen tawe nipasusu, kawingku e saụ nẹ̌bawa kapapia kụ něhěndingu sěngkatau rariọ esẹ.

⁹ Mawu e něhengetang si siạ, ”Sěbạko arengu anạu ene, ’Bal᷊inewe Umatẹ̌-Ku’, u tau Israelẹ̌ e wal᷊inewe umatẹ̌-Ku, ringangu Iạ e wal᷊inewe Ruatan sire.”

Kakakoạ u Israel sarung ipakaul᷊ị kapia

¹⁰ Tau Israel sarung makoạ kere ěne kakěpal᷊e su apeng, hakịu tawe ikaukurẹ̌ arau ikarekeng. Orasẹ̌ ini e Mawu Kasěllahenge něhengetang si sire, ”I kamene wal᷊inewe umatẹ̌-Ku,” kaiso sarung nidatingu tempone i Sie sarung mẹ̌bera si sire, ”Iạ e kai Ruata wiahẹ̌ dingangu i kamene kai manga anạ-Ku!”

¹¹ Tau Yehuda ringangu tau Israel sarung ipakasěmbaụ kapia. I sire sarung měhengkẹ u sěngkatau pangahạ e, ringangu i sire sarung mahengkeng dingangu sumombọ kapia pẹ̌bawiahʼi sire su wanuan sire. Mamben těngadẹ̌, ěllong Yisreel sarung makoạ ěllo masaria!