ESTER 9 - BINOHẸ SUSI BAL᷊O MAPIA

Tau Yahudi nẹ̌kakal᷊ẹ̌kadẹ̌ dumokạ manga sědụ e

¹ Pěngěnsueěnge nịdatingkeng tanggalẹ̌ mapul᷊o těllu su wul᷊ang u Adar, kụ kai ěllo nipoěng baugu měndal᷊engu parentan datu waugu tau Yahudi. Ěllo ene seng pẹ̌pahědoěngu manga rokạ u tau Yahudi waugu mẹ̌kawasa kawanua ene. Kaiso nal᷊ahẹ u kawe tau Yahudi e nakawatạ si sire.

² Su apan soa, tau Yahudi e měmpẹ̌tẹ̌tampung dingangu mẹ̌tẹ̌těngkasěmbaụ baugu měngalo kěbị taumata apang piạ ol᷊ange ral᷊akisẹ̌ baugʼi sire. Manga wansa e waẹbe suapa měngkạtakụ i sire, hakịu tawẹ u sarang sěngkatau kụ bahani mẹ̌těngon sire.

³ Mundangu kěbị těmbonangu propinsi, apang guběrnurẹ̌, bupati ringangu mapapangkatu kararatuange lụontol᷊ẹ̌ su tau Yahudi batụu kěbị e mạtakụ i Mordekhai.

⁴ Su kạguwạu kararatuange taumata e masingkạ u i Mordekhai e lẹ̌lahunggeětang su istana ringangu mangkeng sahuneng nẹ̌kawasa.

⁵ Kerene katatainge tau Yahudi e makapẹ̌batụ kapulune miěbạ dokạ i sire, u i sire e měmpěngalong peda mase měmate.

⁶ Su Susan, niupunangu soa su něgara, tau Yahudi měmate lima hasụ su kataune.

^7-10 Su tal᷊oarane e kaěbakeng i sire mapul᷊o manga esẹ anạ i Haman anạ i Hamedata, sědụ u tau Yahudi matědụ e. I sire ene ute kai: i Parsandata, i Dalfon, i Aspata, i Porata, i Adalya, i Aridata, i Parmasta, i Arisai, i Aridai ringangu i Waizata. Arawe tau Yahudi e tawe něhampasẹ̌.

¹¹ Su ěllo ene lai taumata e něhabarẹ̌ su ratu kal᷊awọu taumata kụ nate su Susan.

¹² Angkuěng ratu su Ratu wawine i Ester, ”Kětạeng su Susan tau Yahudi e seng nakapate 500 su kataune, nasowa lai anạ i Haman i sire mapul᷊o. Něngalembọete su apam propinsi! Měnsang apạe nikakoạ i sire e paịse? Kụ apa lai wědang dorongangu e ini? Měngkate pẹ̌bera, i kau e nal᷊ahẹu sarung makahombang!”

¹³ I Ester simimbang, ”Kereu i Tuang mal᷊uasẹ̌, ute kěnangko tau Yahudi kụ apaʼm mạtanạ su Susan ini e riěllo mal᷊ukadẹ̌ e ipakawala saụ mělukạ u apan seng nịkakoạ e sěhěllo ini. Kutẹu l᷊ai, karimạko maietu manga anạ i Haman ene e i ghantong su manga rihing pěnggaghantongang.”

¹⁴ Bọu e ratu mapasěbangu parenta waugu rụdaringihẹ̌ dorong i Ester; suratu parenta waugu soan Susan nisěbang dingangu manga maietu anạ i Haman mapul᷊o e nịgaghantong.

¹⁵ Ene su tanggalẹ̌ mapul᷊o ěpạ bul᷊ang u Adar, tau Yahudi su Susan nẹ̌tampung kapia ringangu němate 300 su kataune lai su soa ene. Kụ sěnsul᷊e ini lai i sire tawe něhampasẹ̌.

¹⁶ Tau Yahudi kụ mạtanạ su manga propinsi e lai seng němpẹ̌tampung dingangu mẹ̌tahutěndạ u watangeng i sire. I sire e němpěmatạ sědụ e ringangu němpěmate 75.000 su kataune kụ mạběnsing i sire. Kaiso i sire e tawe něhampasẹ̌.

¹⁷ Hal᷊ẹ̌ ene nariadi su tanggalẹ̌ mapul᷊o těllu bul᷊ang u Adar. Ěllo tuhụ e, su tanggalẹ̌ mapul᷊o ěpạ, i sire e tawe němate si sai-sai, kaiso němantugẹ̌ ěllo ene ringangu ral᷊uasẹ̌.

¹⁸ Arawe tau Yahudi kụ ene su Susan měmẹ̌mantugẹ̌ tanggalẹ̌ mapul᷊o l᷊ima kere ěllo ghẹ̌guwạ, batụu i sire e seng němpěmate rokạ e su tanggalẹ̌ mapul᷊o těllu, ringangu mapul᷊o ěpạ, mase něngirul᷊e su tanggalẹ̌ mapul᷊o l᷊ima.

¹⁹ Kai ual᷊ingu ene hakịu tau Yahudi e mạtanạ su manga soa rarodọ měmpẹ̌tẹ̌tahěndung tanggalẹ̌ mapul᷊o ěpạ bul᷊ang u Adar kere ěllon dal᷊uasẹ̌, ěllo waugu mẹ̌sal᷊iwang mapia kụ mẹ̌bẹ̌bawihing lawọ mẹ̌gaghěllịu poroseěngu kaěng.

Pěmamantugẹ̌ Sal᷊imbangu Purim

²⁰ Bọu ene i Mordekhai němohẹ kal᷊awọu apan nariadi ene, ringangu něndohon suratẹ̌ su kěbị tau Yahudi su kạguwạu kararatuangu Persia, waẹbe marau, arau waẹbe marani.

²¹ Lohon suratẹ̌ ene ute parenta waugu měmantugẹ̌ tanggalẹ̌ mapul᷊o ěpạ ringangu tanggalẹ̌ mapul᷊o l᷊ima su wul᷊ang u Adar apan taung.

²² U suapang ěllo ene e i sire seng němatạ manga sědụ i sire, hakịu ral᷊umpasiang dingangu susan naung i sire e nẹ̌bal᷊ui nakoạ dal᷊uasẹ̌ dingangu karal᷊unsemahẹ̌. Ual᷊ingu ene tangú, i sire e harusẹ̌ měmantugẹ̌ manga ěllo ene ringangu sal᷊imbang dingangu pẹ̌sasimokol᷊ẹ̌ baugu lawọ mạhěnggěllikangu kaěng dingangu mẹ̌papahiạ u siděka waugu taumata kasiang.

²³ Tau Yahudi e tụtuhụ parentang Mordekhai ene ringangu kerene sal᷊imbang ene e makoạ tundung apan taung.

Guwal᷊e

²⁴ I Haman anạ i Hamedata, hěntong Agag, sědụu tau Yahudi matědụ e, seng něnawụ lotẹ̌ kụ nisěbạ lai, ”purim” baugu měnantung ěllo waugu měmate tau Yahudi; i sie seng nẹ̌karaki baugu mapakaupun sire.

²⁵ Arawe i Esterẹ̌ e nẹ̌těngon datu, ringangu ratu e nẹ̌gěllịu tita kạbawohẹ kụ nakakoạ karaki ral᷊akisẹ̌ nikoạ i Haman nakawal᷊u watangenge hala e, hakịu i sie ringangu manga anạ e nighantong su rihing pěnggaghantongang.

²⁶ Ual᷊ingu ene manga ěllo gẹ̌guwạ ene e nisěbạ Purim. Suratʼi Mordekhai ringangu kal᷊awọu apan seng nikahombangengu tau Yahudi e,

²⁷ nakakariadin sire e němpẹ̌koạ pělatorang sěmbaụ baugu watangeng i sire hala e, waugu hiten sire e, ringangu waugu kěbị taumata kụ sarung makoạ dal᷊ohong kawanuang Yahudi. Tumuhụ pělatorang ene e apan taung i sire harusẹ̌ měmantugẹ̌ ěllo rarua kụ seng nitantu kahiang Mordekhai.

²⁸ Nitantu l᷊ai waugu sarang marěngụ-děngụ manga ěllom Purim ene harusẹ̌be tahěndungang dingangu wantugangu apam balagu Yahudi bọu kal᷊awọu hěnto měbẹ̌bawělasẹ̌ su ral᷊ungu apaʼm propinsi ringangu apan soa.

²⁹ Su l᷊iung ene e, sěngkahindọ dingangu suratʼi Mordekhai, Ratu wawine i Ester anạ i Abihail němohẹ u suratẹ̌ karuane, kụ něnoghasẹ̌ lohon suratʼi Mordekhai mạanum Purim ene.

³⁰ Suratẹ̌ ene niringọ sarang kěbị taumatang Yahudi, ringangu apan salinange niroho sarang propinsing kararatuangu Persia 127 kal᷊awọe. Suratẹ̌ ene niringanengu kakal᷊iomaneng tadeạu tau Yahudi e sěntiniạ mal᷊unsemahẹ̌ dingangu mal᷊enehẹ̌.

³¹ Suratẹ̌ ene mal᷊aing mẹ̌mahansang u tadeạu i sire ringangu manga hiten sire e měmpẹ̌tahěndung dingangu manga ěllong Purim su tempone nẹ̌kětạ, kerẹwe lai i sire měmpẹ̌tẹ̌tahěndung tempom puhědang tempom pěndal᷊utu e. Seng ene e lohong suratʼi Mordekhai ringangu Ratu wawine i Ester.

³² Parentang Ester kụ něnantung manga pělatorangu Purim, niwohẹ su ral᷊ungu bukẹ̌.