ESTER 8 - BINOHẸ SUSI BAL᷊O MAPIA

Tau Yahudi e nioro apěndokạ sědụ e

¹ Su ěllo ene Ratu i Ahasyweros něngonggọu kal᷊awọu arětạ i Haman, sědụu tau Yahudi masaria su Ratu wawine i Ester. I Ester něhabarẹ̌ su ratu u i Mordekhai e kai manga anạ u sěngkataune, tangú rokeng bọu ene i Mordekhai nighěllirangu wuạ e waugu mẹ̌těngon datu maning tawe nikẹ̌kuiang kal᷊imona.

² Datu e něluạ sinsinge kụ seng nial᷊ạ e kapia wọʼi Haman kụ nionggọ e si Mordekhai. Mase i Ester něhengkẹ i Mordekhai e nakoạ měngangawasa arětạ i Haman.

³ Bọu ene i Ester nẹ̌těngon datu kapia, i sie nẹ̌tumpěkuhẹ̌ kạsangị e ringangu nẹ̌dorong tadeạu ratu e mapakatadiseng ol᷊ang dal᷊akisẹ̌ kụ nikoạ i Haman baugu tau Yahudi e.

⁴ Datu e něngul᷊uhu těkinge wul᷊aeng si Ester, mase nẹ̌buạ e i Ester dingangu nẹ̌bera,

⁵ ”Kereu i Tuan Datu e mal᷊uasẹ̌ kụ tumal᷊ěntụu ěllangu, kiwuạko i Tuange mapasěbangu suratu parenta waugu pěnawụ manga suratʼi Haman kụ lohone parenta waugu mapakawinasang kěbị tau Yahudi e su kararatuang ini.

⁶ Mariadiwe kereapa, ěllangu pakawala makasilo wansa ringangu manga anạ u sěngkatauku e masueng patene?”

⁷ Tangú angkuěngu Ratu i Ahasyweros su Ratu wawine i Ester dẹ̌duang Mordekhai, ”Mambeng kerene, iạ seng němiting si Haman ual᷊ingu i sie sarung mapakawinasan tau Yahudi, ringangu arětạ e sen takụ nionggọ si Ester.

⁸ Arawe suratẹ̌ kụ seng niwohẹ su arengu ratu mase nighěllirangu capẹ̌ u ratu e, tawe ikasawụ kapia. Kaiso, i kamene takụ iwala měmohẹ suratʼu maanun tau Yahudi, walạewe apa ikasilong kamene e mapia. Bohẹ e suratẹ̌ ene su arengku ringangu ěmboing capẹ̌ u kararatuang.”

⁹ Su ěllo ene lai, kụ su tanggalẹ̌ duam pul᷊o těllu, bul᷊ang katěllune, wul᷊ang Siwan, i Mordekhai nẹ̌kuiko apang měmamohẹ u ratu ringangu nẹ̌parenta si sire pěmẹ̌mohẹ suratẹ̌ su apan guběrnurẹ̌, manga bupati, dingangu apan těmbonange su propinsi 127 kal᷊awọe wọu India sarang Sudan. Manga suratẹ̌ ene niwohẹ su ral᷊ungu wera ringangu wohẹ u manga propinsi ene sěmbaụ-sěmbaụ. I sie lai něndingọ u suratẹ̌ ene su tau Yahudi su ral᷊ungu wera ringangu wohẹ u Yahudi.

¹⁰ Manga suratẹ̌ ene nitekenangi Mordekhai su arengu Ratu i Ahasyweros mase niěmboěngu capẹ̌ u kararatuang. Mase i Mordekhai e něndolohu manga rarolohange piněngěntudẹ̌ manga suratẹ̌ ene su apam propinsing kararatuang kụ nahunsake manga kawal᷊on datu masasahawụ.

¹¹ Manga suratẹ̌ ene mělẹ̌lahẹ u ratu e napakawalan tau Yahudi su apan soa e pẹ̌těngkasěmbaụ kụ pẹ̌tahutěndạu watangeng. Kereu i sire e aloěngu taumata piạ aghide wọu wansa ringangu propinsi lai sude, i sire e wotongewe rumokạ kụ měmate apang měngangalo e ene ringangu manga kawing dingangu manga anạ i sire e; i sire e wotonge lai měmpěmate manga rokạ i sire ene sarung pakasue, ringangu měhampasẹ̌ kal᷊awọu arětạ e.

¹² Parenta ene harusẹ̌ koateng su kasěllahu kararatuangu Persia su ěllo kụ seng nitantung Haman baugu měmate kal᷊awọu tau Yahudi, su tanggalẹ̌ mapul᷊o těllu, bul᷊ang kapul᷊o duane, wul᷊ang u Adar.

¹³ Suratu parenta ene harusẹ̌ isěbang kere atorange ringangu ipẹ̌kakeke su kěbị taumata su kěbị propinsi tadeạu tau Yahudi e sadia rumokạ sědụ e kereu ěllo ene e marěnta.

¹⁴ Tangú němpẹ̌dal᷊engke apan darolohang ene nahunsake kawal᷊on datu e. Kerene lai su Susan niupunangu soang něgara, parenta ene niwasa.

¹⁵ Bọu ene i Mordekhai něněntangu istana kụ něluheng pakeangu kararatuang awạ e wirụ dingangu mawira, kakingkaenge kamumụ bọu leneng al᷊usẹ̌ dingangu sakapetine wul᷊aeng kụ mal᷊ěngi-lěnggihẹ̌. Soang Susan němpẹ̌tahimokoin dal᷊uasẹ̌.

¹⁶ Tau Yahudi e nakapěndang nal᷊oahẹ̌ dingangu masěnaěng, mal᷊unsemahẹ̌, dingangu mal᷊uasẹ̌.

¹⁷ Kerene lai suapan soa ringangu propinsi e, ringangu su tampạ lai sude suratu parentan datu e niwasa, tau Yahudi e němpahul᷊uasẹ̌, němpahul᷊iagẹ̌ dingangu němpẹ̌sal᷊imbang. Mundangu l᷊ai lawọ wọu tumanạ e kụ nakoạ kawanua bọu Yahudi e, batụu i sire matakụ u wansa ini e.