ESTER 5 - BINOHẸ SUSI BAL᷊O MAPIA

I Ester nẹ̌gausẹ̌ datu ringangu si Haman su kakanengang

¹ Su ěllo katěllune su pẹ̌papuhědange, i Ester něluhem pakeangu ratu e, wọu e nakoạ sarang děllahẹ̌ su ral᷊ungu istana kụ dimarisị su těngon tukadu pandopo. Datu e kạkaiange rasị su wowong kal᷊aianenge tụtatěngo tukadẹ̌ ene.

² Piạ i sie nakasilo Ratu wawine i Ester dụdarisị su l᷊ikude, i sie timal᷊ěntụ e kụ něngul᷊uhu těkinge wul᷊aeng si sie. Tangú nẹ̌těngkaranị e i Ester, mase něngumpelẹ pondol᷊u těking ene.

³ Mase nakiwal᷊ọ e ratu, ”Kai piạ a? I Ratu wawineku? Kai a kapulunu? Paul᷊ịko! Manilaing dorongangu e sěmběka wọu kararatuangku, man takụ onggotang lai.”

⁴ I Ester simimbang, ”Kereu i Tuan Datu mahaěng, ute karimạko hěbi ini e i Tuang dingangu i Haman duměnta su pẹ̌sasimokol᷊ang nikoạ u ěllangu waugʼi Tuan Datu.”

⁵ Datu e něngoro si Haman pakarol᷊ạ duměnta tadeạu i rẹ̌dua e makaitụ gaghausʼi Ester. Tangú riměntạ e i rẹ̌dua sarang pẹ̌sasimokol᷊ang kụ nikoạ i Ester ene.

⁶ Su tempọeng něnginung anggorẹ̌, datu e nakiwal᷊o, ”Ini e paul᷊ịko kai apa kapulunu. Waẹbe apa rorongangu e man takụ onggotang, manilaing sěmběka wọu kararatuangku!”

⁷ I Ester simimbang,

⁸ ”Kereu i Tuang mal᷊uasẹ̌ dumaringihẹ̌ dorongu ěllangu e, karimạko i Tuang dingangu i Haman delain duměnta su pẹ̌sasimokol᷊ang kụ nikoạ u ěllang diěllo hěbi. Kụ hědo su pẹ̌sasimokol᷊ang ene wuhụ e takụ ihabarẹ̌ dorongu ěllang si Tuan Datu.”

I Haman piạ ol᷊ange měmate si Mordekhai

⁹ I Haman napul᷊ẹ bọu pẹ̌sasimokol᷊ẹ̌ anun Datu wawine i Ester kụ měngkai mal᷊uasẹ̌. Kaiso sarětạeng su tukadu pasěllangengu istana e i sie nakasilo si Mordekhai kụ tawe rimarisị nẹ̌gěllịu adatẹ̌ si sie, ute i sie mangkeweng nẹ̌bawal᷊uang marehe.

¹⁰ Kaiso i sie nẹ̌tingkědang u watangenge kụ napul᷊ẹ sarang bal᷊ene. Nasongọ e paịse i sie němatuhung manga hapị e aparěnta ringangu nẹ̌dorong tadeạu i Zeres, kawinge apakaiang dingang i sire.

¹¹ Mase i Haman nẹ̌bisara mạpasiala si sire, mạngobotu kakakalạ e, anạ e manga esẹ mal᷊awọ, kakaianenge mapia nionggọu ratu, ringangu pangkate něngalembong karangẹ e wọu manga sawohị bal᷊ine.

¹² Angkuěnge lai, ”Hakịu Ratu wawine i Ester mal᷊aing kětạeng měnẹ̌notẹ̌ u iạ dingangu ratu su pẹ̌sasimokol᷊ang kụ nikoạ e waugi kami, ringangu rịěllo hěbi i kami e mal᷊aing inotẹ̌ e kapia.

¹³ Arawe kěbị ene tawẹ mangal᷊ene, karěngụ e wědang takụ ikasilo i Mordekhai, tau Yahudi ene, maiang su tukadu pasěllangengu istana.”

¹⁴ Nakaringihẹ̌ ene, kawing dingangu manga hapị e kěbị e něněgu kere ini, ”Měngkate oro pẹ̌koạ dihing pěmamitingang karangẹ e ruam pul᷊o dua su metere. Kụ sěngkarịěllone, deng mal᷊uka-l᷊ukadẹ̌ e pẹ̌dorongko loahe su ratu pěmitingang si Mordekhai su rihi ene. Ual᷊ingu kawe kerene i kau e wotonge kakoạ sarang pẹ̌sasimokol᷊ang ene e, ringangu naung pakatatapẹ̌.” Těgu ene nẹ̌tatal᷊ahino kahěngang si Haman, ual᷊ingu ene i sie masahawụ něngoro pinẹ̌koạ dihing pěmamitingang ene.