ESTER 4 - BINOHẸ SUSI BAL᷊O MAPIA

I Mordekhai nakiontol᷊ẹ̌ si Ester

¹ Ene i Mordekhai nakaringihe apạ e nariadi, i sie něnggehẹ pakeange ringangu něluheng karong al᷊ingkai tatialang nělutu. I sie něngaesu awul᷊ẹ̌ su těmbọ e, wọu e rimal᷊eng su soa kạkiạ e maihạ, makạtatal᷊ěntụ.

² Su těngon tukadu pasěllangengu istana i sie něngědung, batụu i sain něluheng karong isẹ̌sěding sumuẹ̌.

³ Kerene lai su kěbị propinsi, tau Yahudi mạhul᷊ungkang sarangke parentang datu e niwohang. I sire e nẹ̌puhědang, nahungkiạ dingangu němpẹ̌galundung, dingangu mal᷊awọ bọu tal᷊oaran sire e němpěluheng karong dingangu rimal᷊oka su wowong awul᷊ě.

⁴ Piạ e mal᷊ahuala ringangu mapapangkatẹ̌ tani kụ mẹ̌tẹ̌tangkiang Datu wawine i Ester naul᷊ị si sie apan nikakoạ i Mordekhai, i Ester mamben nasusa naunge. I sie něndohong pakeang si Mordekhai laaweng pakeange karong, kaiso i Mordekhai tawe měnarimạ.

⁵ Bọu ene i Ester nẹ̌kui si Hatah sěngkatau wọu tal᷊oaran mapapangkatẹ̌ tani kụ nioron datu pẹ̌tẹ̌tangkuang si Ester. Nirolohe i Hatah pakịbal᷊o si Mordekhai, měnsang kai apa nariadi, kawe unụe i sie nẹ̌koạ kerene.

⁶ Tangú tamaị e i Hatah sarang anum Mordekhai su wimbaengu soa su těngon tukadu pasěllangengu istana.

⁷ I Mordekhai nẹ̌běke si sie apan seng nariadi ringangu pirang kal᷊ěpa roitẹ̌ sal᷊aka kụ nirianding Haman baugu i suẹ̌ su ral᷊ungu kasẹ̌ u ratu, mạeng seng kěbị tau Yahudi e nipakawinasa.

⁸ I Mordekhai mal᷊aing něngonggọ si Hatah salinangu suratu ratu kụ seng nisěbang su Susan, kụ piạ lohone parenta waugu mapakawinasan tau Yahudi. I sie něngoro si Hatah pẹ̌gěllịu suratẹ̌ ene si Ester dingangu pěnẹ̌nualagu hal᷊ẹ̌ ene si sie, kerene lai pědẹ̌dorong tadeạu i Ester pẹ̌těngon datu kụ pakịtul᷊ung sěngapam botonge waugu wansane.

⁹ Mase tamaị e i Hatah sarang anung Ester kụ něhabaru tatanatang Mordekhai e si sie.

¹⁰ Kaiso i Ester něndolohʼi sie kapia sarang anung Mordekhai ringangu tatanata ini,

¹¹ ”Apan taumata, baẹ esẹ arau wawine, kụ tawẹ nịkẹ̌kuiange, mẹ̌těngon datu su rělahẹ̌ su ral᷊ungu istana, harusẹ̌ ihukung pakapate. Ene e kai atorange kụ kěbị taumata e měnětạ bọu měnanasa ratu sarang kawanua su apaʼm propinsi, masingkạ hal᷊ẹ̌ ene. Kětạeng piạ dal᷊eng sěmbaụ baugu makal᷊iwirẹ̌ bọu atorange ene, ute mạengu ratu e měngul᷊uhu těkinge wul᷊aeng su tau ene. Kereu ene e mariadi tangú i sie sarung maambang. Kaiso seng sěmbul᷊ang karěngụ e iạ e tawe nikẹ̌kuiangu ratu.”

¹² Mase i Hatah něhabaru tatanatang Ester si Mordekhai.

¹³ Tangú i Mordekhai nẹ̌gěllịu ingate kere ini si Ester, ”Abe pěngěnna u i kau e limembong kal᷊enehe wọu tau Yahudi wal᷊ine e, kụ kětạeng ual᷊ingu i kau kawe mạtanạ su istana e!

¹⁴ Tau Yahudi e nal᷊ahẹ u sarung makahombang tul᷊umang baewe ringangu kakoạ e kereapa lai hakịu i sire e masal᷊amatẹ̌. Kaiso kereu i kau e měngkate těbe marěmasẹ̌ su kakakoạ e kere ini e, i kau e hala e sarung mate ringangu walagʼi amangu e sarung masue wẹ̌kene. I sai masingkạ aramanung hatede waugu tempone kere ini, i kau e seng nipile makoạ datu wawine!”

¹⁵ Ene i Esterẹ̌ e něndohongkeng habarẹ̌ ini si Mordekhai,

¹⁶ ”Tampungko kěbị tau Yahudi apan su Susan mědeạu pẹ̌kal᷊iomaneng baugu iạ. Abe kaěng dingangu abe pěnginung karěngụu těllu ěllo ringangu těllu hěbi. Iạ sẹ̌saku ringangu mal᷊ahuala mẹ̌tatangkuangku e sarung l᷊ai mẹ̌puhědang. Bọu ene iạ hědo mẹ̌těngon datu, maningbe ene e limampa ondang-ondange. Mạengu iạ mate ual᷊ingu ene, ute walạete iạ mate!”

¹⁷ Mase tamaị e i Mordekhai ringangu nẹ̌koạ kěbị apang nitanatang Ester si sie.