ESTER 2 - BINOHẸ SUSI BAL᷊O MAPIA

I Ester nakoạ datu wawine

¹ Piran tempo tuhụ e, maningbe ratu e seng tawe lai nẹ̌pědu, i sie wědang mẹ̌tẹ̌tiněnnang kakanoạu Ratu wawine i Wasti ringangu kakakoạ kụ seng niaparal᷊eng waugʼi sie.

² Ual᷊ingu ene apang měnaněgune kụ maranin datu e piạ těgun sire kere ini, ”Kapiange reakeng manga mahuala masadadạ baugʼi Tuan Datu.

³ Kěnangko i Tuan Datu pěhengkẹ manga sawohị su kal᷊awọu propinsing kararatuang ini waugu pẹ̌deakeng manga mahuala masasadadạ kụ i sire wawa kěbị sarang istanang manga wawine su Susan ini. I Hegai, mapapangkatẹ̌ tani e kụ nakoạ těmbonangu istana bawine, sarung měngurusẹ̌ si sire ringangu mẹ̌tangkiang si sire mědeạu masadadạ.

⁴ Bọu ene, kěnangko i Tuan Datu e pěmile mahuala limembong ikapulun Tuan Datu e, kụ mapakariadin sie ratu wawine kere laaweng su Datu wawine i Wasti.” Datu e kimire su těgu ene kụ něndal᷊engu ene.

⁵ Su soan Susan ene piạ sěngkatau wọu Yahudi arenge i Mordekhai anạ i Yair. I sie hěntong Kis dingang i Simei wọu ghal᷊ipohong Benyamin.

⁶ I Mordekhai seng nitaweng piạ Yerusalem kinawatạ i Nebukadnesar, datum Babel. I Mordekhai niwembang sarang Babel, sěngkawembang dingangi Yoyakin, datung Yehuda, ringangu lawọ lai tinaweng bal᷊ine.

⁷ I sie piạ manga wawinene anạu tamahuari, mahuala gahị e masadadạ dingangu pẹ̌bawadange maholẹ, arenge i Ester, kụ arenge su werang Ibrani e Hadasa. Gaghurang i Ester seng nate ringangu i sie nakoạ kere anạ niakung Mordekhai kụ nihiking kere anạ e wọu gandongang.

⁸ Sarangke, parentan datu e seng niwohang, mal᷊awọ manga mahuala e nitampung su Susan, kụ i Ester ene kạdal᷊aụ su tal᷊oaran sire e. I sie mal᷊aing niwawa sarang istanan datu kụ nisarakang si Hegai těmbonangu istanang manga wawine.

⁹ I Hegai rimal᷊inaụ nakasilo si Ester kụ mạpulun sie. Apidu masahawụ mahuala ene nitangkiange kasadadạ e ringangu nighělirang kaěnge tani. I Ester nial᷊ing sarang tampạ kal᷊ěnggihange su istanang bawine ene ringangu manga mahuala i sire pitung katau mahuala kapapandeěnge su istanan datu nioro waugu pẹ̌tẹ̌tangkuang si sie.

¹⁰ Ual᷊ingu pěnanasang Mordekhai e, i Ester tawe naul᷊ịu i sie kawe sěngkatau wọu Yahudi.

¹¹ Ěllo-ěllo i Mordekhai e mẹ̌dẹ̌daral᷊eng su těngon děllahu istanang bawine ene, mẹ̌kẹ̌kibal᷊ong kakakoạ i Ester měnsang apa nariadi si sie.

¹² Tumuhụ atorange, manga wawine e tẹ̌tangkianengu kasasadadạ e gěnnangu sěntaung: ěnnungu wul᷊ang dingangu lana kal᷊aukangu kamania, ringangu ěnnungu wul᷊ang tuhụ e ringangu lana kal᷊aukangu manga wěngi wal᷊ine. Wọu ene, apam mahuala e makaěbạ gilirange waugu mẹ̌těngon Datu i Ahasyweros.

¹³ Su tempong sěngkatau mahuala nẹ̌těngon datu e, i sie wotonge mẹ̌pakẹ u walạ e měnsang apa tuhụ kapulune.

¹⁴ I sie niwawa sarang istanan datu su tempong hěbi, dingangu sěngkarịěllone niwawa sarang istana wal᷊ine, ringangu niurusʼi Saasgas, sěngkatau mapapangkatẹ̌ tani e kụ měngẹ̌ngurusẹ̌ apan dokạ u ratu. Mahuala ene semben tawe mẹ̌těngon datu kapia, tabeạu katewe kamagengu ratu e mapulu ringangu mẹ̌kui si sie kụ mẹ̌sěbạu arenge.

¹⁵ Tangú narěntạ e tempong Ester baugu mẹ̌těngon datu. – I Ester kai anạ i Abihail mase anạ u tamahuari ringangi Mordekhai kụ seng něhengkẹ i sie kere anạ e sẹ̌sane; i Ester kẹ̌karal᷊inaụ u apan taumata kụ makasilo si sie. Su tempong i sie nẹ̌těngon datu, i Ester mẹ̌pẹ̌pakeang tuhụ laoro ringangu těgung Hegai, těmbonangu istanang manga wawine.

¹⁶ Kerene su taung kapitune, su parentang Ahasyweros su wul᷊ang kapul᷊one, kụ bul᷊angu Tebet, i Ester niparingang nẹ̌těngon Datu i Ahasyweros su istanan datu.

¹⁷ I sie napakal᷊uasẹ̌ dingangu mapakal᷊iagu ratu e něngalembo wọu manga mahuala wal᷊ine e. Ual᷊ingu ene i sie limembong ikẹ̌kẹ̌ndagu ratu. Tangú ratu e něnangẹ u sakapeting kararatuang su těmbo i Ester dingangu napakariadin sie e ratu wawine, piněngaweng Datu wawine i Wasti.

¹⁸ Bọu ene ratu e nẹ̌koạ sal᷊imbang gẹ̌guwạ kere piněngadatẹ̌ si Ester dingangu něnotẹ̌ kěbị sawohị ore lai těmbonange. I sie němohangu ěllong pakansi su kạguwạu kararatuang dingangu napẹ̌papahiạu poroseěng nẹ̌dal᷊embo.

I Mordekhai něngambang himukudu ratu

¹⁹ Těntal᷊ang ene i Mordekhai seng nihengkẹ u ratu nakoạ sawohị u wanua.

²⁰ I Ester tawe lai nělẹ̌habaru i sie kawe tau Yahudi, u i Mordekhai e mẹ̌sasědinge. I Ester tụtuhụ si Mordekhai kerẹewe su tempong i sie e reng bědang kạdodọ kụ tẹ̌tahanakengu ral᷊engu gaghurange ene.

²¹ Piạ sěhěllo, nạung i Mordekhai e kapělẹ̌hal᷊ẹ̌ e su istana, duang katau mapapangkatu ratu tani e, kụ i Bigtan dingangu i Teres, nẹ̌sěngkanaung mědeạu měmate Ratu i Ahasyweros, batụu i sire e kai mạběnsing u ratu e.

²² Karaki ene kinasingkateng i Mordekhai ringangu i sie apidu něhabaru ene si Ester. Tawẹ pěnggagholọu tempo, i Ester nẹ̌běke su ratu apang kụ kinasingkateng i Mordekhai ene.

²³ Hal᷊ẹ̌ e nisẹ̌suiang, kutẹu nal᷊ahẹu habarẹ̌ ene e kai nạung kahěngang. I rẹ̌dua ene nihukung kụ nighantong. Natuhụ kere su parentan datu, hal᷊ẹ̌ ene niwohẹ su ral᷊ungu bukẹ̌ u wěkeng kararatuang.