ESTER 1 - BINOHẸ SUSI BAL᷊O MAPIA

Datu wawine i Wasti rimokạ parentan Datu i Ahasyweros

^1-2 Su Susan niupunangu soam Persia, i Ahasyweros nẹ̌parenta kere sěngkatau ratu. Kararatuange nanahiangkung propinsi 127 su waụ e, nanětạ bọu India sarang Sudan.

³ Su taung katěllune pẹ̌paparentane, Datu i Ahasyweros nẹ̌koạ sal᷊imbang masaria, waugu kal᷊awọu těmbonange ringangu sawohị e. Manga mol᷊ensekẹ u Persia ringangu Media riměnta lai su sal᷊imbang ene, kerene lai manga guběrnurẹ̌ dingangu apang mapapangkatu propinsi mararangẹ e.

⁴ Ěnnungu wul᷊ang karěngụ e datu e mapạsilong kakalạu istanane, ringangu karal᷊esạ ore kawantugu kararatuange.

⁵ Bọu ene ratu e nẹ̌koạko sal᷊imbang kapia waugu patikụ kawanua su Susan, baẹbe kalạ arau lai kasiang. Sal᷊iwang ene e nikoạ sěngkamisa tinalung kụ nịkakoạ su winal᷊aengu istanan datu.

⁶ Dělahu istana nilěgahengu ral᷊anse bọu hekạ u leneng birụ dingangu mawira, nịlaikị u tal᷊i leneng al᷊usẹ̌ nịsasěkidangu manga ghal᷊ang sal᷊aka kụ nịpapasị su manga rihi marmarẹ̌. Su al᷊unge nipěllọ manga wangkọ mananandụ bọu wul᷊aeng dingangu sal᷊aka su wowong lante kụ piạ dal᷊ěgahe marmarẹ̌ mawira, hablur mahamụ, pising mutiara mal᷊endạ, dingangu watuʼm paramata wirụ.

⁷ Datu něnadia anggorẹ̌ mal᷊awọ-l᷊awọ kụ nisadia su ral᷊ungu manga mangko wul᷊aeng nẹ̌ngkananginang.

⁸ Waugu apan sake tawẹ kětakenge anggore arau sihasaěng pěnginung. Datu seng něnita su manga mẹ̌tatangkiangu istana, tadeạu apan sake e tangkiane tuhụ kapulun sire sěngkatau-sěngkatau.

⁹ Kutẹu i Wasti, bokin datu e, mal᷊aing nẹ̌koạ sal᷊iwang baugu manga wawine su ral᷊ungu istana.

¹⁰ Su ěllo kapitune, datu e měngkate měngẹ̌nginung sarangkewe nakapěndang měngkate apa mal᷊uasẹ̌. Ual᷊ingu ene i sie nẹ̌kui mapapangkatẹ̌ tani i sire pitu kụ nakoạ mẹ̌tatangkiang batangenge; kụ i sire ene ute kai i: Mehuman, Bizta, Harbona, Bigta, Abagta, Zetar dingangu Karkas.

¹¹ I sie něngoro si sire pẹ̌bẹ̌bawa sarang těngoʼ Datu wawine i Wasti ringangu sakapeting kararatuang su wowon těmbọ e. Datu wawine e měngkai apa maholẹ, kụ datu e měngkate mapạsialang kasadadạ e su manga těmbonange ringangu kěbị sakene.

¹² Arawe su tempong manga mẹ̌tatangkiang ene něhabaru titan datu e su Ratu wawine i Wasti, datu wawine e mạdiri ruměnta, hakịu ratu e limangehẹ̌ marasai.

¹³ Datu e piạ lulune mědẹ̌dorong těgu wọu masasingkạ u toratẹ̌ dingangu tundu. Ual᷊ingu ene nikuiange kal᷊awọu měnanasane kụ masingkạ u apa harusẹ̌ koateng su ral᷊ungu hal᷊ẹ̌ kerene.

¹⁴ Apam měnanasa kụ masau kuiangu ratu ute kai i: Karsena, Setar, Admata, Tarsis, Meres, Marsena ringangu Memukan. I sire ene e kai mapapangkatu Persia ringangu Media kụ piạ kakaianenge karangetange su kararatuang.

¹⁵ Angkuěngu ratu e si sire pitu ene, ”Iạ e seng něndolohu manga mẹ̌tatangkiangku su Ratu wawine i Wasti pěngoro si sie aparěnta su anuku. Katewe i sie kawe mạdiri. Tumuhụ toratẹ̌, kai koateng kereapa tangú i sie?”

¹⁶ Tangú angkuěng i Memukan su ratu ringangu apan těmbonange, ”Dingangu kakanoạ kerene, bal᷊ine tumbạ u i Tuang sẹ̌sane kụ seng nihinakaneng u Ratu wawine i Wasti kaiso patikụ sawohị i Tuang, saral᷊aing apaʼm manga esẹ su kararatuang ini!

¹⁷ Batụ u kakanoạ u ratu wawine ene sarung kasingkateng u patikụ manga wawine, kụ i sire sarung tawẹ pandungange su manga kawing i sire sěmbaụ-sěmbaụ. I sire sarung mẹ̌bera u i Tuang seng nẹ̌parenta su Ratu wawine i Wasti waugu pẹ̌tengo, kaiso ratu wawine e tawe mapulu ruměnta.

¹⁸ Kụ kamagengu apang kawingu manga těmbonange su Persia ringangu Media makaringihẹ̌ hal᷊ẹ̌ ene, nal᷊ahẹ u i sire e sarung lighạ měhabaru ene su apang kawing i sire sěngkatau-sěngkatau. Aị e ute kai: bawine e sarung dumokạ parentang kawinge, ringangu esẹ e sarung lumangehẹ̌ su kawinge.

¹⁹ Ual᷊ingu ene, i kami e mẹ̌dorong tadeạu i Tuang, pěngal᷊ạ putusang u Ratu wawine i Wasti e tawe wotonge relaing mẹ̌těngon Tuang. Putusang ene e hinong koateng ondang-ondangu Persia ringangu Media, tadeạu semben tawe ikasawụ kapia. Bọu ene onggotengkong kal᷊aianengu Ratu wawine i Wasti su wawine wal᷊ine kụ limembong kapiane wọʼi sie.

²⁰ Kereu putusang i Tuang Datu ene seng nakeke su kạguwạu kararatuang mal᷊oahẹ̌ ini e, apaʼm manga wawine e sarung měmpěngadatẹ̌ kawinge, baewe kalạ arau waebe lai kasiang.”

²¹ Těgung Memukan ene e nikireěngu ratu ore lai apan těmbonange, tangú ratu e apidu něndal᷊eng ene.

²² Tangú i sie něndingọu suratẹ̌ parenta su kěbị propinsing kararatuang, su ral᷊ungu wawera ringangu wohẹ u propinsi ene sěmbaụ-sěmbaụ e. Parenta ene mẹ̌bẹ̌bera u su ral᷊ungu pẹ̌sěmbal᷊eěng, esẹ e harusẹ̌ makoạ těmbọ e, kụ hinong měngal᷊ạ kal᷊awọu putusang.