ESRA 1 - BINOHẸ SUSI BAL᷊O MAPIA

I Kores napakawalan tau Yahudi e napul᷊ẹ sol᷊ong banuan sire

¹ Su taung humotong su parentan Datu i Kores, datum Persia, Mawu nẹ̌koạ apa nạung seng nipěhengetangʼE limiun Nabi Yeremia. Mawu e němahansang naung i Kores waugu apasěbang u sěmbaụ parenta kụ pakiwasa su kasěllahu kararatuange. Bawal᷊one kere ini:

² ”Seng ini e parentang Kores datum Persia. Mawu, Ruata e měngangawasa su sorga e seng něhengkẹ u iạ naratu su kasěllahu dunia, ringangu něngonggọu munara si siạ pạmětị bal᷊e waugʼi Sie su Yerusalem su wanuang Yehuda.

³ Mal᷊owọko Mawu Ruata e maněntanudẹ̌ si kamene kěbị kụ nakoạ umatʼE. I kamene harusẹ̌ kapul᷊ẹ sol᷊ong Yerusalem dingangu pamětị kapia Wal᷊em Mawu, Ruatang Israel, Duata e mạtanạ su Yerusalem.

⁴ Kereu piạ u sěngkatau wọu umatʼE su tampạ u piněmembangeng ini e kụ měgẹ̌gausẹ̌ tatongka mědeạu makakapul᷊e, tangu manga l᷊ampunge harusẹ̌be pẹ̌gěllịu tatongka ene. I sire harusẹ̌ měngonggọu sal᷊aka ringangu wul᷊aeng, sinasạ sural᷊eng dingangu binatang kere lurang, dingangu l᷊ai manga sasěmba su Wal᷊em Mawu su Yerusalem si sie.”

⁵ Bọu ene apan těmbonangu ghal᷊ipoho wọu hěnton Yehuda ringangi Benyamin, manga imang dingangu taumatan Lewi, ringangu apan taumata kụ naunge kẹ̌kanoakeng u Mawu Ruata, němpẹ̌dariahịe měngkapul᷊ẹ sol᷊ong Yerusalem kụ měmangung kapia Bal᷊em Mawu.

⁶ Kěbị apang l᷊ampung i sire e mal᷊aing něnongka nẹ̌gěllịu manga apal᷊iwụ bọu sal᷊aka ringangu wul᷊aeng, sinasạ sural᷊eng, binatang nakoạ lurang, dingangkewe lai arětạ bal᷊ine ringangu manga sasěmba waugu Wal᷊em Mawu.

⁷ I Kores naněbangu manga lainumang dingangu manga cawan nạung kal᷊imona ipẹ̌pakẹ su Wal᷊em Mawu su Yerusalem. Manga apal᷊iwụ ene seng nihengkẹ u Ratu i Nebukadnesar kụ nitaho su ral᷊ungu wal᷊em pěnanal᷊eěng mahang duatane sẹ̌sane.

⁸ I Kores něnarakangu urusangu manga apal᷊iwụ ene si Mitredat, těmbonangu masasingkạ u arětạu kararatuang. Bọu ene i Mitredat, nẹ̌koạ dol᷊ẹ̌ u manga apal᷊iwụ ene waugʼi Sesbazar, guběrnurẹ̌ u Yehuda.

^9-10 Seng ini e rol᷊ẹ̌ e: Manga lainumang bul᷊aeng baugu pananěmba – 30 Manga lainumang sal᷊aka waugu pananěmba – 1.000 Manga lainumang bal᷊ine – 29 Manga lainumang darodọ bul᷊aeng – 30 Manga lainumang darodọ sal᷊aka – 410 Pakakasẹ̌ bal᷊ine – 1.000

¹¹ Pẹ̌tatambaěnge kěbị tangu 5.400 su waụ e lainumang bul᷊aeng dingangu sal᷊aka ore lai manga apal᷊iwụ bal᷊ine. Kěbị ene e niwawang Sesbazar piạ i sie ringangu taumatam pinamembangeng bal᷊ine e nẹ̌buạ bọu Babel kụ nẹ̌timona Yerusalem.