DANIEL 9 - BINOHẸ SUSI BAL᷊O MAPIA

I Daniel nẹ̌kal᷊iomaneng baugu wansane

^1-2 Su taung humotong pẹ̌paparentan Darius tau Media, ahusʼi Ahasyweros baugu kararatuang u Babel, iạ i Daniel, měngkate mẹ̌bẹ̌basa manga bukẹ̌ u agama. Iạ e mẹ̌sẹ̌sipirẹ̌ u tumuhụ hengetang u Mawu su Nabi Yeremia, soang Yerusalem sarung těbe maopehẹ̌ karěngụ u pitum pul᷊o su taunge.

³ Mase nẹ̌kal᷊iomanengke iạ dingangu kạguwạu naung su Mawu Ruata, ringangu mẹ̌gẹ̌gausẹ̌ tatal᷊ěntụe. Iạ e mal᷊aing nẹ̌puasa ringangu něluheng pakeang bọu karong kụ mạiang su wowong awul᷊ẹ̌.

⁴ Kal᷊awọu rosaʼm bansaku e takụ niaku su Mawu Ruataku. Kungku, ”Mawu Ruata, i Kau e masěllahẹ̌, dingangu i kami e mạngadatẹ̌ si Kau. I Kau e sěntiniạ mang mạněhụ kědonʼU e ringangu mạnodẹ u kakěndagʼU kụ kakalẹ̌ si sire apang kụkěndagʼi Kau e kụ mẹ̌kẹ̌koạ apang ilẹ̌oronʼU.

⁵ I kami e seng nẹ̌dosa, i kami e seng nẹ̌koạ dal᷊akisẹ̌ dingangu seng nẹ̌koạ pẹ̌sasal᷊a. I kami e seng nẹ̌pahuwungkadẹ̌ dingangu limampa parentanʼU ore lai nělenga wọu kal᷊awọu atorʼU.

⁶ I kami e tawe rimaringihẹ̌ manga nabi, manga ěllangʼU ene, kụ seng nẹ̌bisara su ral᷊ungu arengʼU su manga ratung kami, su kal᷊awọu manga těmbonange, manga i upung dingangu su kal᷊awọu wansang kami e.

⁷ O Mawu, pẹ̌kakaradiahangʼU e mambeng mẹ̌tẹ̌tatahino ringangu adilẹ̌, arawe i kami e měngkate sěntiniạ makạděntang kamamea su watangeng i kami e, kụ mělẹ̌hino si kami kěbị apang kụ mạtanạ su Yudea ringangu su Yerusalem dingangu patikụ taumata kụ bansa sěmbaụ dingang i kami kụ seng nisawuhu su apaʼm banua mararau ringangu marani ual᷊ingu i sire tawẹ satiane si Kau.

⁸ Manga ratung kami e, manga těmbonange ringangu manga i upung i kami e seng někoạ hal᷊ẹ̌ makạmea ringangu seng nẹ̌dosa si Kau, o Mawu!

⁹ I Kau e napenẹ u kal᷊aampung dingangu tatal᷊ěntụ, maningbe i kami e seng limawang si Kau.

¹⁰ I kami e tawe rimaringihẹ̌ tingihʼU, o Mawu Ruatang kami, piạ i Kau něngoro si kami pẹ̌bẹ̌biahẹ̌ tụtuhụ manga tita kụ seng nionggọʼU si kami limiung manga nabi, kal᷊awọu ěllangʼU ene.

¹¹ Kakěpal᷊u Israel seng limampa kal᷊awọu tita-Nu ringangu mạdiri rumaringihẹ̌ tingihʼU. I kami e nẹ̌dosa su těngonʼU, kụ ual᷊ingu ene i Kau pěnawongkong laane si kami, kerẹewe seng mạbawohẹ su Bukẹ̌ i Musa e ěllangʼU.

¹² I Kau e seng napakasěhụ u kakanoạ u kerẹewe seng nikědonʼU e si kami ringangu suapang měngěngawasa si kami. Yerusalem seng nihukungʼU něngalembong kawěhạ e wọu kal᷊awọu soa lai sude su dunia ini.

¹³ Kal᷊awọu hombang masaria kụ mạbawohẹ su ral᷊ungu Toratʼi Musa e seng pinakaěnsạ si kami. Kaiso maningbe kerene, o Mawu Ruatang kami, i kami e mang bědang mẹ̌tahul᷊ingkadu měluasẹ̌ naungʼU. I kami e těbewe tawe mapulu měněntangu manga rosang kami ringangu tawe mapulu l᷊ai mẹ̌pandung kal᷊awọu manga těntironʼU.

¹⁴ I Kau e Mawu Ruatang kami, seng něhukung si kami ringangu hombang masaria kụ seng niriahinʼU; pẹ̌kakoạʼU e tiniạ nihino ringangu adilẹ̌, arawe i kami e tawe rumararingihẹ̌ tingihʼU.

¹⁵ O Mawu Ruatang kami, i Kau seng něnodẹ u kawasanʼU kụ nẹ̌bawa umatʼU niapasěbang bọu Misirẹ̌, dingangu kawasanʼU ene měngkate tẹ̌be tẹ̌tiwakeng. I kami e seng nẹ̌dosa ringangu nẹ̌koạ pẹ̌sasal᷊a.

¹⁶ I Kau e seng timatawang si kami su tempo kal᷊imona, ual᷊ingu ene kuhạe relaing lumangehẹ̌ su Yerusalem, soa-Nu hala, bukidʼU kụ susi e. Ual᷊ingu rosang kami ringangu karal᷊akisu manga i upung i kami, tangu patikụ taumata apang mạngělikụ si kami e kai mạngangatagẹ̌ miěbạ Yerusalem dingangu miěbạ manga umatʼU.

¹⁷ Ruatang kami, pẹ̌daringihẹ̌ko wue kakal᷊iomaneng dingangu kakindoạku. Ul᷊ịko kapia wanalanʼU e kụ seng niromba ene, ul᷊ịko tadeạu kal᷊awọu taumata e masingkạ kai i Kau e Ruata.

¹⁸ Daringiheko i kami e o Ruata, tatinganeko i kami ringangu kakěllaiko kasasịgěsạ i kami ore lai kaghaghoghahu soa kụ isẹ̌sẹ̌bạ dingangu arengʼU. I kami e mẹ̌kal᷊iomaneng si Kau bal᷊inewe ual᷊ingu manga kapiang kami, kaiso kawe ual᷊ingu i Kau napenẹ u tatal᷊ěntụ.

¹⁹ Mawu, daringiheko i kami, ampungeko i kami, kakěllai wue i kami ringangu pẹ̌karạdiahangke pakarol᷊ạ! Abe rararěngụ, tadeạu patikụ taumata e masingkạ u kai i Kau e Ruata. Batụu Yerusalem dingangu umatʼU e kai tataghuanengʼU tutune.”

Gabriel něnualagu pananěbal᷊ẹ̌ ene

²⁰ Iạ sěntiniạ mẹ̌kẹ̌kal᷊iomaneng dingangu mạngaku rosaku dingangu rosam bansaku Israel, ore lai kụkakindoạ su Mawu Ruataku waugu měngul᷊ị bal᷊e-Ne susi.

²¹ Kạkal᷊iomanenge iạ e, i Gabriel kụ sen takụ kinasilo e su ral᷊ungu papasiloku nạung kal᷊imona e, timěllạ sol᷊ong anuku. Tempo ene seng orase taumata maněmban sasěmba wawěllo.

²² Mase i Gabriel něnualagu kere ini, ”Daniel, iạ diměnta waugu montol᷊u těgu si kau mědeạu makahěngang papasilo ene.

²³ Piạ i kau manětạ kumakindoạ su Ruata, i Sie nẹ̌gěllị u sasimbange. Iạ diměnta měhabaru ene watụ u i Sie kụkěndagʼi kau. Kụ pẹ̌daringihẹ̌ko pakapia těntal᷊ang iạ deng kạpạnualageng mangal᷊eng papasilo ene.

²⁴ Pitu sul᷊e kal᷊awọu pitum pul᷊o su taunge ute kai tempo tinantun Duata waugu měl᷊iwirẹ̌ bansanu ringangu soanu kụ susi ene wọu rosa ringangu karal᷊akisẹ̌ e. Kal᷊awọu rosa e sarung ampungang dingangu kạadilẹ̌ kụ kakalẹ̌ e sarung ipakarehọ, hakịu papasilo ringangu pananěbal᷊ẹ̌ e sarung mariadi kahěngang, dingangu Wal᷊em Mawu susi e sarung ikapẹ̌dalo l᷊ai waugu Mawu.

²⁵ Bohẹko ringangu sipireko ini e: Pitu sul᷊e pẹ̌tahạ pitu su taunge sarung mapaghohẹ̌, manětạ bọu orasu nisẹ̌bangengu parenta waugu měmětị Yerusalem kapia, sarang darěntan sěngkatau pangahạ e pinilen Duata. Karěngụ u pitun sul᷊e kal᷊awọu ěnnungu pul᷊o dua su taunge manga ral᷊eng dingangu manga pagaru Yerusalem sarung koateng kapia, kaiso tempo ene měngkai napenẹ u sigěsạ.

²⁶ Su pěngěnsueěngu tempo ene pangahạ e kụ pinilen Duata e sarung pateěng, sumbal᷊iau i sie tawẹ sal᷊ane. Tangú riměntạe sordadon sěngkatau ratu kụ matoghasẹ̌, bọu e něngupụewe soan Yerusalem dingangu Wal᷊em Mawu. Su pěngěnsueěngu tempo ene sarung duměnta kere lěba kụ mẹ̌bawa pẹ̌sasekẹ dingangu kawawinasa, kerẹewe seng nitilakehu Ruata.

²⁷ Datu ene sarung mẹ̌taingu pẹ̌kakědo masěgadẹ̌ dingangu taumata l᷊awọ karěngụu pitu taung. Su mal᷊oaran tempo ene i sie sarung mapěngěndungu pẹ̌kakoạ gaghěllị dingangu sasěmba. Bọu ene apang kụ makạtatakụ isẹ̌sěbạ Karal᷊akisẹ̌ kụ makawihua e sarung ipěllọ su Wal᷊em Mawu dingangu sarung těbe ene sene sarang i sie kụ naměllọu ene sene e kaěnsakengu kawawinasa kụ seng nitilakehu Ruata e si sie.”