DANIEL 7 - BINOHẸ SUSI BAL᷊O MAPIA

I DANIEL NẸ̌BĚKENG KAL᷊AWỌU APANG PAPASILONE 7:1–12:13 Papasilon Daniel mạanung binatang ěpạ

^1-2 Piạ sěhěbi, su taung humotong i Belsyazar nakoạ datu su Babelẹ̌ e, iạ, i Daniel nipi ringangu nakahombang papasilo. Ipi ene takụ niwohẹ dingangu laporangu hal᷊ẹ̌ u papasiloku ene ute kai kere ini: Anging maihạ timiụ bọu kěbị pungu anging kụ nakakoạ piạ děllang maihạ su laudẹ̌ mal᷊oang.

³ Bọu ene piạko binatang masaria tawẹ sihinge ěpạ u waụ bọu ral᷊ungu akẹ kụ gahị e mẹ̌tẹ̌tatěntang sěmbaụ dingangu wal᷊ine.

⁴ Humotong, tangú awạ e mẹ̌sul᷊ungu singa, kaiso kawe piạ papanidu ghahudạ. Kutẹu sarangke kinasiloku e, sěngkělěndịu nasawụ papanide kụ natontong; i sie nasapuạ bọu ěntana kụ nitongkaěng u laede ruam běka kere taumata, kụ bọu ene nighěllirang u tahuěnnan taumata.

⁵ Binatang karuane ghahị e kere běruang. I sie rụdarisị u l᷊aede su l᷊ikude, kụ mạngiki ruhing husụ e těllum potọ su wěllạ u isine ruam běka. Piạ tingihẹ̌ kinaringihẹ̌ku měbẹ̌bera si sie, ”Hotede, kinạko ghẹ̌sim binatang pěbạtụewe kapulunu!”

⁶ Piạ e iạ kapẹ̌tẹ̌tatingange, binatang bal᷊ine siměpụ e. Gahị e kere masang kambal᷊ọ, kaiso su tal᷊ětuge piạ papanidu manụ u winalangeng arěgang ěpạ u waụ, dingangu i sie piạ těmbọ e ěpạ. Tinganeng i sie kai piạ pěhěngkinge.

⁷ Piạ e iạ kạtingange, siměpụ e binatang kaěpạ e. I sie kai apạ e matoghasẹ̌ dingangu mahuagatẹ̌ ore lai makạbintogẹ̌. Kụ isine gaghaghuwạ ore lai kere kakakětị u uase, i sie mělẹ̌hěmpung dingangu mạmelohẹ̌ kinaěnge, mase měndaral᷊inda manga l᷊ěmbene. Mědẹ̌darol᷊e ringangu manga binatang nạung kal᷊imona i sie piạ sungene mapul᷊om baụ.

⁸ Ene iạ kạpẹ̌mandane manga sungene, sěngkělěndịu piạ sungene wal᷊ine sěmbua timuwo su wěllạ e. Sunge ene kạdodọ, kaiso wotonge makasekehẹ̌ dingangu makasawụ těllum bua wọu tal᷊oarang kal᷊awọu sunge nạung kal᷊imona. Sunge kạdodọ ene e piạ matane kere matan taumata ringangu mohonge kụ měngkai tụtanantadʼu obotẹ̌.

Papasilo mạanun Sie kụ nẹ̌biahẹ̌ kakalẹ̌

⁹ Těntal᷊ang iạ tatapẹ̌ kạpandane, tangú apạe pira-piram baụ kal᷊aianenge pẹ̌pěllokang. Bọu e i Sie kụ nẹ̌biahẹ̌ kakalẹ̌ e kụkaiang su wowong kal᷊aianeng sěmbaụ bọu tal᷊oarang kal᷊aianeng tamai ene. PakeangʼE ringangu utạʼE mawira matilang kere kapesẹ̌. Kal᷊aianengʼE piạ manga rodane mạhunděllị u pěndal᷊ewam putung,

¹⁰ dingangu pěndal᷊ewam putunge kawe rudaẹ bọu kal᷊aianeng ene e. Kụ hiwune taumata e nẹ̌tangkiang si Sie, dingangu iutane taumata mạhundarisị su těngonʼE. Bọu ene nitětạe komol᷊ang u pěnggaghutaěnge ringangu bukẹ̌ e nịbawingkahʼE.

¹¹ Piạ iạ e kạpěmandane, měngkate wědang takụ ikẹ̌karingihẹ̌ sunge kadodọ ene tụtanantadu obote. Bọu ene binatang kaěpạ e ene e nipate kụ maiete nirěmmẹ su ral᷊ungu putung sarang nailang.

¹² Manga binatang bal᷊ine seng nisawụ kawasane, kaiso i sire nipakawala nẹ̌biahẹ̌ sarang tempo kụ seng nitantu.

¹³ Su ral᷊ungu siloku hěbi ene, ute sěngkapandane piạ kere taumata. I sie riměnta nilikutangu winawa wọu e nakoạ sol᷊ong anun Sie kụ nẹ̌biahẹ̌ kakalẹ̌ dingangu nipakasingkạ si sie.

¹⁴ I sie nighěllirangu kal᷊aadatẹ̌ dingangu kawasa kere sěngkatau ratu, hakịu taumata apang bọu haghim bansa, ghal᷊ipoho, ringangu haghim bera e měmunara waugʼi sie. Kawasane e sarung marehọ sarang marěngụ-děngụ, pẹ̌paparentane tawe masol᷊e.

Manga papasilo e nitualagẹ̌

¹⁵ Kal᷊awọu manga papasilo kinapandaku e makạbingọ dingangu makạpẹ̌kẹ̌kal᷊ipusaneng su naungku.

¹⁶ Mase takụ dẹ̌dẹ̌duhang sěngkatau wọʼi sire kụ dụdarisị pai sene kụ takụ pẹ̌dẹ̌dorongang tatualagu mạanung patikụ e. Tangu i sie e naul᷊ị e.

¹⁷ I sie nẹ̌bera, ”Binatang ěpạ masaria e kai kararatuang ěpạ kụ siměpụ su dunia.

¹⁸ Arawe umatʼu Ruata Karangetange sarung měnarimạ u hakẹ̌ u mẹ̌parenta ringangu pẹ̌paparentane e sarung mẹ̌daragẹ̌ sarang marěngụ-děngụ.”

¹⁹ Bọu ene iạ e lụěnningu makakasingkạ u mangal᷊ene binatang ěpạ ene, kụ mẹ̌tẹ̌tatěntang sěmbaụ dingangu wal᷊ine; kụ apạ e makạbintogẹ̌ e ringangu makạbinasa ore lai něněmbo kinaěnge ringangu kanukune tambaga ringangu isine uase, mase lai měndal᷊inda kal᷊awọu lěmbene.

²⁰ Iạ e mal᷊aing lụěnningu makạkasingkạ mangal᷊ene sungene mapul᷊o su těmbọ e ringangu mạanung sungene kạdodọ kụ timuwo samuri wọu e něnawụ těllum bua wọu kal᷊awọu sungene kal᷊amona e. Sungene kadodọ ene e piạ matane ringangu mohonge tụtanantadu obote. I sie lembong makạbintogẹ̌ bọu manga sungene wal᷊ine lai e.

²¹ Piạ iạ kapěmẹ̌mandane, sunge ene mẹ̌sẹ̌sekẹ dụdokạ umatu Ruata e ringangu měmatạ si sire.

²² Bọu ene i Sie kụ mẹ̌bẹ̌biahẹ̌ kakalẹ̌ ene e ruměnta kụ něngonggọu putusang kụ měnahuntěngadu umatu Ruata Karangetange. Tempone seng natimu i sire makatarimạ u kawasa waugu mẹ̌parenta.

²³ Seng ini e sasahidi kinareạku e, ”Binatang kaěpạ e ene e ute kai kararatuang kaěpạ e kụ sarung dumarisị su dunia dingangu sarung mẹ̌tatěntang dingangu manga kararatuang bal᷊ine. Kararatuang ene e sarung makawinasa ringangu měngělụ kạguwạu dunia ringangu měndal᷊inda manga lěmbene.

²⁴ Sungene mapul᷊o ene ute kai ratu mapul᷊o kụ sarung mẹ̌parenta kararatuang ene. Bọu e sěngkatau ratu wal᷊ine sarung suměpụ; i sie sarung mẹ̌darol᷊e marau ringangu manga ratu nạung kal᷊imona, kụ i sie sarung měmatạ datu i sire těllu e.

²⁵ I sie sarung mẹ̌bisara rumokạ Duata Karangetange dingangu měnědạ umatu Ruata. I sie sarung mẹ̌tawakal᷊i měmal᷊ui manga toratẹ̌ dingangu manga sal᷊imbangu agamang umatu Ruata, kụ i sire sarung pẹ̌kawasaěnge karěngụ u těllu taung sitenga.

²⁶ Mase pěnggaghutaěngu sorga e sarung mẹ̌komol᷊ẹ̌ kụ měnawụ kawasane ore lai měnilakạ si sie sarang matạdise.

²⁷ Kawasa ringangu kasariang kal᷊awọu kararatuang su dunia e sarung ionggọ su umatʼu Ruata Karangetange. Kawasan sire waugu mẹ̌parenta e tawe mahěpusẹ̌ dingangu kal᷊awọu měngangawasa su dunia e sarung mẹ̌tangkiang dingangu kasasatia e si sire.”

²⁸ Sarang ini e paraul᷊ị ini e. Iạ kai apạ e kal᷊inso hakịu nawilosẹ̌, kaiso tawẹu sarang sěngkatau takụ pinaul᷊ikangu kěbị tamai ene.