DANIEL 5 - BINOHẸ SUSI BAL᷊O MAPIA

Datu i Belsyazar ahusʼi Nebukadnesar nẹ̌koạ sal᷊iwang

¹ Piạ su sahěllo Ratu i Belsyazar něnotẹ̌ u manga těmbonange i sire sěhiwu su kataune mědeạu makakarěnta su sal᷊iwange gẹ̌guwạ, dingangu měnginung anggorẹ̌.

² Ene i sire kạpěnginunge, i Belsyazar nẹ̌parenta tadeạu apěngal᷊ạ manga lainumang bul᷊aeng dingangu sal᷊aka, kụ nạung seng nipul᷊ahong Nebukadnesar, i amange, wọu ral᷊ungu Wal᷊em Mawu su Yerusalem. Timonan Datu i Belsyazar ute tadeạu apan těmbonange, manga kawinge, apan dokạ e ringangu i sie hala, pěnginung bọu manga lainumang ene e.

³ Dingangu masahawụ niwawạ e manga lainumang ene e su anune, bọu ene i sire kěbị e němpěnginung anggorẹ̌ bọu manga apal᷊iwụ ene.

⁴ Kạpanginunge, i sire e měmpẹ̌dẹ̌dalo manga mahang duata kụ kinoạ bọu wul᷊aeng, sal᷊aka, tambaga, kalu ringangu watu.

⁵ Sěngkělěndịu kinasilo piạ liman taumata kụ měmẹ̌mohẹ u apa-apa su rarěndungu istana su tampạ kụ katualagenge kahinoěngu sěnnang u sol᷊o, hakịewen datu e nakasilo mal᷊ahẹ.

⁶ I sie měngkate apa nawilosẹ̌ kụ apạe natakụ hakịu wukune měngkai simal᷊ungkende.

⁷ Kạpěmansage i sie mědẹ̌dorong tadeạu apan tahapatehẹ̌, tahahopa, ringangu apang masasingkạ u wituinge kinuiang. Piạ e i sire riměnta, ratu e něhengetang, ”I sai-saing makawasa wohẹ ene ringangu maul᷊ị u mangal᷊ene si siạ e, sarung takụ gěllirangu pakeangu kararatuang kụ kakingkaeng kamumụ dingangu kalong bul᷊aeng tialang kal᷊aadatẹ̌. Su l᷊iung ene i sie takụ hengketang makoạ měngangawasa katěllune su ral᷊ungu kararatuangku.”

⁸ Apang mapapande e lụlempang sol᷊ong těngo, kaiso tawẹu sěngkatau wọu i sire makawasa wohẹ ene arau maul᷊ị u mangal᷊ene su ratu e.

⁹ Datu i Belsyazar limembọewen tụtaghiawahẹ̌ kutẹu l᷊ai nawilosẹ̌; kerene lai apang manga těmbonange apạe nikal᷊ipusaneng.

¹⁰ Nakaringihẹ̌ kal᷊awọu wansagu ratu ringangu manga těmbonange, i ninangu ratu simuẹ̌ sol᷊ong huangu sal᷊iwang. Bọu e i sie nẹ̌bera, ”Pẹ̌biahe i Tuangku sarang marěngụ-děngụ! Pakatatape naung i Tuangku, kụ manịeng tawe mawilosẹ̌.

¹¹ U su ral᷊ungu kararatuang i Tuangku e piạ sěngkatau esẹ kụ nilohoěngu rohkẹ̌ u manga mahang duata susi. Su tempong pẹ̌paparentang amang i Tuangku e, tau ene natodẹ u kai piạ kapandene, katatahuěnna, ringangu kapelesa, kụ kere kapelesang manga mahang duata. I amang i Tuangku Ratu i Nebukadnesar seng něhengkẹ i sie nakoạ pangahạ u mapapanden tahatariang, mapapandeng lahopa, taumata apang piạ kasingkạ e ringangu apang mapapandem bituing.

¹² I sie enẹ e tawẹ sihinge kapandene ringangu kapelesane kutẹu l᷊ai tahatěbal᷊u ipi, měngukahu rahasia ringangu mapakauadipu kal᷊awọu sungkal᷊ene mawawěhạ. Arenge i Daniel, kaiso ratu e mẹ̌sẹ̌bạ i sie i Beltsazar. Kuiẹete i sie. I sie sarung měhabarẹ̌ si Tuangku kai apa mangal᷊ene wohẹ ini.”

I Daniel něnualagu mangal᷊ene wohẹ ene

¹³ Dingangu masahawụ i Daniel nipẹ̌těngon datu. Bọu e nakiwal᷊ọ e ratu e si sie, ”I kau e i Daniel, tau Yahudi nirěmmẹ, kụ seng nihengkẹ i amangku wọu ěntanang Yehuda?

¹⁴ Takụ kinaringihẹ̌ u i kau e nilohoěngu manga rohkẹ̌ u manga mahang duata kụ susi, dingangu uade i kau kai piạ kapandenu, katatahuěnna, ringangu kapelesa tạ sihinge.

¹⁵ Apang mapapande ringangu apang tahahopa seng něnal᷊ukạ nẹ̌basa wohẹ ini kụ něhabaru mangal᷊ene si siạ. Arawe i sire tawe nakakoạ.

¹⁶ Buhụewe takụ kinaringihẹ̌ u i kau e makapitua kal᷊awọu rahasia ringangu makakoạ mědeạ karal᷊oahu hal᷊ẹ̌ makakětị e. Kereu i kau makawasa wohẹ ini ringangu maul᷊ị u mangal᷊ene si siạ, i kau sarung takụ onggotangu pakeangu kararatuang kere kakingkaeng kamumụ dingangu kalong bul᷊aeng tialang kal᷊aadatẹ̌. Su l᷊iung ene e i kau sarung takụ hengketang makoạ mangangawasa katěllune su ral᷊ungu kararatuangku.”

¹⁷ I Daniel simimbang, ”I tuangku, tawahal᷊uasu měngonggọu kal᷊awọu manga poroseěng ene e si siạ, měngkate ghěllị su taumata wal᷊ine. Iạ e sarung mẹ̌basa wohẹ ene e waugʼi Tuangku ringangu měhabaru mangal᷊ene.

¹⁸ Duata e Karangetange nakariadi si Nebukadnesar, i amang i Tuangku nakoạ datu mawantugẹ̌ dingangu nẹ̌gěllịu kasěllahẹ̌ ore lai katateleng.

¹⁹ I Sie e kereng kasěllahe, hakịu kal᷊awọu taumata wọu patikụ bansa, ghal᷊ipohong bansa, ringangu wera, nawintogẹ̌ dingangu mạtakụ si sie. Kereu i sie lụěnningu měmate taumata, měngkate apidu měmate tau ěndaị ene. Kereu i sie mapulu měngambang pẹ̌sěngkatau e, iapakasal᷊amatẹ̌ tau ene. I sie mapakarangẹ arau mapakasanạ i sai-sai tuhụewe kapulune.

²⁰ Ene i sie naobote, nakul᷊ị e těmbọ e ringangu natingkaị e, i sie niapal᷊intụ bọu kal᷊aianengu kararatuange, hakịu i sie kinailangengu kawantuge.

²¹ I sie nitokol᷊ẹ̌ bọu komol᷊angu taumata kụ tiněnnane nakoạ kere tiněnnam binatang. I sie mẹ̌bẹ̌biahẹ̌ dingangu kalideng kěhu, kụkaěng děmpugẹ̌ kere sapi ringangu mẹ̌tẹ̌tikị su ěntana rụdal᷊ingara langị mal᷊oang hakịeweng mạholong namuhẹ̌. Pěngěnsueěnge i sie mạngaku u Ruata Karangetange kawasa su kararatuangu taumata ringangu kararatuang ene e nionggoʼE si sai-sai apang pinilenʼE.

²² Arawe ahuse, kụ i Tuangku hala e, tawe mapulu mẹ̌těngkasanạ u watangeng, maningbe lai i Tuangku masingkạ u kěbị ene.

²³ I Tuangku mạpakarangẹ u watangeng su těngom Mawu su sorga ringangu wahani mapasuẹ̌ u manga lainumang kụ seng nipul᷊aho wọu ral᷊ungu Wal᷊em Mawu. Mase i Tuangku e ringangu apan těmbonange, manga kawing dingangu apan dokạ i Tuangku e měmpạnginung bọu manga lainumang ene. I Tuangku e měngkai mědẹ̌dalo manga mahang duata kẹ̌koateng bọu wul᷊aeng, sal᷊aka, tambaga, uase, kalu ringangu watu, manga mahang duata kụ tawe makasilo arau makaringihẹ̌ arau makaěnna apa. I Tuangku e tawe něngadatẹ̌ Duata kụ manilakehu pẹ̌bawiahẹ̌ dingangu kapapohong i Tuangku ringangu mapakatatapu ral᷊engu pẹ̌bawiahʼi Tuangku.

²⁴ Kụ kai ene hakịu Ruata e něndingọ u l᷊ima ene pěmẹ̌mohẹ u tatanatanʼE.

²⁵ Kụ kai ini e wohẹ ene, ’Dekenang, dekenang, itimbang, ipahiạ.’

²⁶ Kụ kai ini e mangal᷊ene: Dekenang, tempong pẹ̌paparentan Tuangku seng nirekenang u Mawu Ruata kụ niěnsuene;

²⁷ nitimbang, i Tuangku sem bọu nitimbang kụ kinaěbakeng tawe nakal᷊uasẹ̌ naung;

²⁸ nipahiạ; kararatuang i Tuangku e nipahiạ kụ nionggọ su tau Media ringangu Persia.”

²⁹ Kụ dingangu masahawụ i Belsyazar nẹ̌parenta manga sawohị e tadeạu mapěluheng kakingkaenge kamumụ si Daniel dingangu pěnohọ u kalong e wul᷊aeng su lehẹ e. Bọu e i sie něhengkẹ i Daniel nakoạ měngangawasa katěllune su ral᷊ungu kararatuange.

³⁰ Su hěbi ene lai kinapatẹ e i Belsyazar datum Babel ene.