DANIEL 11 - BINOHẸ SUSI BAL᷊O MAPIA

¹ Seng i sie kụ nipěmunara waugu ipěngontol᷊ẹ̌, dingangu mẹ̌tahutěndạu iạ su taung humotong pẹ̌paparentan Darius tau Media ene.

² Kụ apan sarung takụ ipěhengetang si kau e kai kahěngang.” Malạekatẹ̌ e nẹ̌bera, ”Datu tatěllu wal᷊ine e sarung mẹ̌parenta Persia, nitol᷊eěngu ratu kaěpạ e kụ sarung limembong kakalạ e wọu apaʼm bal᷊ine. Su pusigu kawasa ringangu kakakalạ e, i sie sarung mẹ̌dokạ u katoghasẹ̌ dingangu kararatuangu Yunani.

Kararatuangu Misirẹ̌ dingangu Kararatuangu Siria

³ Bọu ene sarung suměpụ datu sěngkatau kụ mahasa. I sie sarung mẹ̌parenta kararatuang kụ apạ e nanihing kasěllahe kụ sarung mẹ̌batụ kapulune.

⁴ Kaiso su pusigu kakakalạ e, kararatuange sarung mạběka ringangu mapahiạ ěpạ u kamonaěng. Mararatu apam bal᷊ine hěntone sarung mẹ̌parenta kere laawenge, dingangu i sire tawẹ katoghase kere si sie.

⁵ Datum banua sěmběkan timuhẹ̌ e sarung matoghasẹ̌. Arawe sěngkatau wọu manga mol᷊ensekẹ e sarung makoạ limembong katoghase wọʼi sie, kụ i sie sarung mẹ̌parenta kararatuang kụ limembong kasěllahe lai.

⁶ Pira taung samuring ene datum banua sěmběkan timuhẹ̌ sarung měmangung kasasěmbaụ dingangu ratum banua sěmběkan sawěnahẹ̌ dingangu napẹ̌kawingu sangiange dingangu ratum banua sěmběkan sawěnahẹ̌ e. Kaiso kasasěmbaụ ene tawe nẹ̌daragẹ̌, kụ sangiang ene sarung pateěng, kerene lai kawinge ringangu anạe ringangu manga ěllang kụ seng něnondan sie.

⁷ Tawe nararěnnạ wọu ene, sěngkatau kụ sěmbalagheng dingangu sangiang ene sarung makoạ datu. I sie sarung měndokạ sordadon datum banua sěmběkan sawěnahẹ̌, měngalo sol᷊ong těndạ e kụ měmatạ.

⁸ Su tempong i sie saụ mẹ̌sul᷊e sol᷊ong Misirẹ̌, i sie sarung mẹ̌bawa tul᷊adang mahang duatan sekẹ e dingangu apal᷊iwụ bul᷊aeng dingangu sal᷊aka kụ seng nisěmba su mahang duata ene. Pira taung karěngụ e i sie tawe sarung sumekẹ datum banua sěmběkan sawěnahẹ̌.

⁹ Bọu ene ratum banuan sawěnahẹ̌ sarung měngalo wanuan timuhẹ̌, kaiso i sie sarung sahẹ̌sekang pakatokol᷊ẹ̌ kụ apakapul᷊ẹ sol᷊ong banuane sẹ̌sane.

¹⁰ Mase manga ahusu ratum banuan sawěnahẹ̌ e sarung měmpẹ̌dariahi waugu mẹ̌sekẹ dingangu mẹ̌koạ komol᷊angu sordado masaria. Sěngkatau wọʼi sire e sarung tumiol᷊ẹ̌ kere lěba. Su ral᷊ungu pěngangalo karuane i sie simowa sol᷊ong dal᷊ungu těndạu sekẹ.

¹¹ Tangú nẹ̌bawal᷊uangke ratum banuan timuhẹ̌ e, kụ i sie sarung sumuẹ̌ sol᷊ong pẹ̌seketang dumokạ datum banuan sawěnahẹ̌. I sie sarung makawatạ sordado l᷊awọ-l᷊awọ nipasěbangu ratum banuan sawěnahẹ̌.

¹² Bọu ene i sie sarung lumiagu kal᷊auntune ringangu ual᷊ingu seng nakapate sekẹ mal᷊awọ, kaiso i sie tawe měngkai hanesẹ̌ mẹ̌kawasa.

¹³ Baugu karua sul᷊ene datum banuan sawěnahẹ̌ sarung měkoạ buntuange gẹ̌guwạ, něngalembo ute kai limembong kasariane wọu humotong. Kereu tempone seng nịdating, i sie sarung kumanoạ dingangu sordado lawọ-l᷊awọ piạ aghide mal᷊awọ-l᷊awọ.

¹⁴ Tangu taumata l᷊awọ e sarung mẹ̌pahuwungkadẹ̌ su ratum banuan timuhẹ̌. Kụ pirang katau apang marangěngisẹ̌ bọu tal᷊oaran bansanu, Daniel, sarung mẹ̌disihẹ̌ lai ual᷊ingu i sire seng nakasilo sěmbaụ papasilo. Kaiso i sire sarung tamakakoạ apa.

¹⁵ Bọu e ratum banuan sawěnahẹ̌ e sarung měmul᷊aho soa ghẹ̌guwạ sěmbaụ piạ těndạ e kụ hampaseng. Sordadom banuan timuhẹ̌ e sarung tawe makakědang, dingangu apang buntuang pinilene e mal᷊aing tawe lai makakoạ sasukunge.

¹⁶ Datum banuan sawěnahẹ̌ e sarung mẹ̌koạ kapulune tawe makareạ dal᷊awange sarang kadodọ-dodọ. I sie e mal᷊aing sarung makakaiang su wanua mal᷊ěnggihẹ̌ dingangu mẹ̌kawasa tinalung.

¹⁷ Bọu e ratum banuan sawěnahẹ̌ e sarung měndiahing kal᷊awọu sordadone waugu ipěngalo wanuan timuhẹ̌. Bọu e ringangu timonane mẹ̌kawasa kasěllahu kararatuangu sědụ e, i sie sarung mẹ̌taingu pẹ̌kakakire ringange kụ mapẹ̌kawingu sangiange ringangu ratum Misirẹ̌ e, arawe karakine e tawe sarung makaual᷊i apa.

¹⁸ Bọu ene i sie sarung měngalo manga wansa su wiwihu l᷊audẹ̌, dingangu lawọ apang kinawatạ e. Arawe sěngkatau pangahạ u wanua raghị e sarung mapěngědong lahinakang kụ kinoạ e ene, mundangu sarung mamal᷊isẹ̌ lahinakang ene si sie.

¹⁹ Datum banuan sawěnahẹ̌ ene sarung mẹ̌sul᷊e sol᷊ong manga těndạ u wanuane hala e, kaiso i sie sarung ikawatạ dingangu semben tawẹ habaru mạanun sie lai.

²⁰ I sie sarung awengangu sěngkatau ratu kụ sarung měndolohu sawohị e mahěngị baugu pěnampungu pajakẹ̌ dingangu nasihasa ipěnamba kakakalạu kararatuange. Su ral᷊ungu tempo kadodọ datu ene sarung pateěng, tawe su tualage ringangu wal᷊inewe lai su ral᷊ungu pẹ̌sasekẹ.”

Datum banuan sawěnahẹ̌ kụ dal᷊akisẹ̌ e

²¹ Malạekatẹ̌ ene lai nẹ̌bera, ”Datu tuhụ e kụ nẹ̌parenta wanuan sawěnahẹ̌ ute kai sěngkatau taumata ral᷊akisẹ̌ e kụ tawẹ hakẹ̌ e makoạ datu. Kaiso i sie sarung duměnta tawe kahěnganeng dingangu měmul᷊aho kal᷊aianengu ratu e su tawẹ kạadile.

²² Kal᷊awọu sordado apang dụdokạ si sie, ore lai sarang manga Imang Mawantugẹ̌ e mal᷊aing, sarung kaehang pakawurěsi ringangu ipakaupu.

²³ I sie nẹ̌tul᷊ang manga pẹ̌kakakědo kụ buhụewe nikoạ e ringangu manga wansa wal᷊ine. Kụ i sie sarung limembong katoghase, manimbeng i sie kẹ̌tạeng mẹ̌pẹ̌parenta wansa kadodọ.

²⁴ Kụ dingangu kapapentesẹ̌ i sie e sarung měngalo apam banua matatawa e su tempong kawanua e makạpěndang tạ konsange apa sene. I sie sarung mẹ̌koạ apang bědang tawe nịkẹ̌koạ u manga i upunge. Mase i sie sarung mẹ̌papahiạ u ene suapang manga měnanongkane kal᷊awọu apal᷊iwụ nihampasẹ̌ dingangu kakakalạ apang kinaěbakenge su ral᷊ungu pẹ̌sasekẹ. I sie sarung mẹ̌koạ akal᷊u měngalo kal᷊awọu tampạ piạ těndạ e, kaiso tempone kai seng mal᷊ighạ mapaghohẹ̌.

²⁵ Bọu ene ringangu wahani i sie sarung měkoạ gopol᷊u sordado masaria waugu ipěngalo ratum banuan timuhẹ̌ kụ seng lai mẹ̌dẹ̌dariahi rumokạ si sie ringangu sordado matoghasẹ̌ dingangu masaria kahěngang. Kaiso ratum banuan timuhẹ̌ e tawe sarung makararagẹ̌ ual᷊ingu i sie sarung ipẹ̌tul᷊a.

²⁶ Manga měnanasane karaniange ringange sarung mapakanawon sie. Mal᷊awọ bọu tal᷊oarang manga sordado e sarung ikapate, ringangu těntarane sarung ipakakaehẹ̌.

²⁷ Bọu ene ratu rarua ene sarung maiang su meda sěmbaụ dingangu kumaěng sěngkakaěng, kaiso i sire piạ karakine ral᷊akisẹ̌, dingangu i sire sarung mẹ̌kakakonti. Kaiso karaking sire sarung magholọ u tempone wẹ̌dang tawe natimu.

²⁸ Bọu ene ratum banuan sawěnahẹ̌ sarung mapul᷊ẹ sol᷊ong banuane ringangu kal᷊awọu apal᷊iwụ pul᷊aho kụ kinaẹ̌bakenge. I sie piạ karakine waugu mapakagholọ u agama ipạngimangengu manga umatʼu Ruata. I sie sarung mẹ̌batụ kapulune wọu e mẹ̌sul᷊e kapia sol᷊ong banuane sẹ̌sane.

²⁹ Pira tempo samuring ene i sie sarung měngalo kapia wanua sěmběkan timuhẹ̌ e lai, kaiso aị e tangu nẹ̌tatěntangu nạung humotong.

³⁰ Batụu kal᷊awọu tau Roma ringangu manga kapal᷊e sarung marěnta wọu Siprus kụ sumekẹ si sie, hakịu i sie měngkai matakụ-takụ. Bọu e i sie sarung mapul᷊ẹ dingangu ral᷊angehẹ̌ masaria kụ mědẹ̌deạ aị u měnggolọ u agamang manga umatu Ruata e. I sie sarung tumol᷊e sasasan sire apan seng nẹ̌sunial᷊u agama ene.

³¹ Mase i sie něndingọ u manga wuntuangu makạsamedẹ̌ Bal᷊em Mawu. I sire sarung měndědasu sasěmba měllo-měllo ringangu mapakateing apang makạtatakụ kụ isẹ̌sěbạ Karal᷊akisẹ̌ kụ makawihua.

³² Tangú kahian tondoal᷊ị u ratu ene sarung měngologẹ̌ kal᷊awọu taumata apan seng naněntangu agaman sire, tadeạu mapulu maontol᷊ẹ̌ si sie. Kaiso apan taumata kụ matuhụ su Ruata e sarung bahani rumokạ si sie.

³³ Taumata apam pelesa kụ měmihing kawanua e sarung mapakariadin taumata mědeạu mal᷊awọ makaěnna. Kaiso waugu pira tempo karěngụ e, pira-pira wọu tal᷊oaran sire e sarung mate ual᷊ingu pẹ̌sasekẹ arau ual᷊ingu putung, dingangu pirang katau lai e sarung hampaseng dingangu tawengang.

³⁴ Těntal᷊ang pěmamate ene e kạdal᷊enge, umatu Ruata e sarung makahombang tatongka kadodọ, kaiso mal᷊awọ taumata sarung mẹ̌tatamba ringang i sire samatang baugu pandungang i sire hala.

³⁵ Sěmbahageang bọu manga těmbonange pelesa e sarung ikapate, kaiso ene makoạ kere wawanikạ baugu umatẹ̌ e hakịeweng i sire e sarung makoạ matilang. Hal᷊ẹ̌ ene sarung mariadi sarang pěngěnsueěngu tempo, kụ kai tempọ e seng nitantung Duata.

³⁶ Datung banuan sawěnahẹ̌ e sarung mẹ̌koạ kapulun naunge hala. Piạ obote i sie sarung mẹ̌bera u i sie kai limembong kasariane wọu mahang duata sude-sude, mundangu lai limembong kasariane wọu Ruata Karangetange. I sie sarung botonge makakoạ kerene sarang dal᷊angehu Ruata e mapuạ. U apan seng nitantun Duata harusẹ̌be lai makoạ kal᷊imona.

³⁷ Datu ene sarung tawe měndekeng u mahang duata lai sude kụ tẹ̌tahamawuang u manga i upunge, nasowa l᷊ai mahang duata sẹ̌subaěngu manga wawine. I sie tawe mẹ̌tatiahang manga mahang duata ene ual᷊ingu i sie mẹ̌pẹ̌pěndang batangenge limembong kạguwạ e wọu i sire.

³⁸ Su sěmběkane ute i sie kai sarung mẹ̌suba mahang duata kụ tawẹ běke wọu tẹ̌tahamawuang u manga i upunge, kụ kai mahang duata měngangěllung manga těndạ. I sie sarung mẹ̌gěllịu sasěmba wul᷊aeng, sal᷊aka, paramata ringangu manga sasěmba maral᷊enggihẹ̌ lai wal᷊ine su manga mahang duata kụ deng bědang ta sasěmbaěng u manga i upung i sie.

³⁹ I sie sarung měmile kal᷊awọu taumata kụ maněmba mahang duata raghị, baugu ipěngalo manga těndạ kụ matatoghasẹ̌. I saing kụ mangakung mahang duata ene e sarung gělirangu kal᷊aadatẹ̌ masaria dingangu kal᷊aianeng marangẹ ore lai ěntana e kere tatendenge.

⁴⁰ Kereu pěngěnsueěngu kawasan datum banuaʼn sawěnahẹ̌ e seng maranin tempone marěnta, datum banuan timuhẹ̌ e sarung měngalo si sie. Bọu e ratum banuan sawěnahẹ̌ e sarung měmal᷊isẹ̌ pěngangalo matědụ ene. I sie sarung mapasěbangu karetan sekẹ makěpal᷊ẹ̌ kawal᷊o ringangu kapal᷊ẹ̌. I sie sarung měnahěsẹ kere lěba, kụ makakaiang banua l᷊awo.

⁴¹ Mundangu sarang banua maral᷊ěnggihẹ̌ e mal᷊aing sarung aloěnge lai, ringangu pul᷊one hiwu su kataune sarung pateěnge. Arawe manga kararatuangu Edom, Moab dingangu wahageange kapiaěnge wọu kararatuangu Amon sarung masal᷊amatẹ̌.

⁴² Su tempo ene i sie nakapul᷊aho kal᷊aianengu manga kararatuang ene, kararatuangu Misirẹ̌ mal᷊aing tawe nakapẹ̌kubibau.

⁴³ I sie sarung měhampasẹ̌ arětạ u Misirẹ̌ kere manga wul᷊aeng dingangu sal᷊aka ore lai arětạ bal᷊ine tạ sihinge karal᷊egade. I sie sarung ontol᷊angu tau Libia ringangu Sudan.

⁴⁴ Mase habarẹ̌ bọu sěmběkan daki ringangu sawěnahẹ̌ e sarung makahěkosẹ̌ si sie, hakịu i sie sarung mẹ̌sekẹ marehe ringangu měmate taumata l᷊awọ.

⁴⁵ Mundangu i sie sarung měnakẹ tentang kararatuange su tal᷊oarang laudẹ̌ dingangu wul᷊ude tampạ u Wal᷊em Mawu. Arawe wọu ene i sie sarung mate ringangu tawẹ u sarang sěngkatau sarung mẹ̌tul᷊ung i sie.”