DANIEL 10 - BINOHẸ SUSI BAL᷊O MAPIA

Papasilon Daniel su Sal᷊ụ u Tigris

¹ Su taung katěllune su parentan Datu i Koresh su Persia piạ tatanata sěmbaụ nilahẹ si Daniel nisunggahị si Beltsazar. Tatanata ene kahěngang, kaiso kawe matědụ pěngěnnaěnge. Piạ e mẹ̌tẹ̌tawakal᷊i mědeạu makahěngang ene e i Daniel něnarimạ u tatualagu mạanung mangal᷊eng tatanata ene su ral᷊ungu sěmbaụ papasilo.

² Su tempo ene iạ e kạpẹ̌ngẹ̌ngamal᷊e ghěnnangu těllung kamisa tinalung.

³ Karěngụ u tempo ene iạ e tawe kumakaěng masasědapẹ̌ e arau tawe kumakinạ ghěsing binatang; iạ e tawe měnganginung anggorẹ̌, dingangu tawe měnanaụ utạ.

⁴ Su tanggalẹ̌ duam pul᷊o ěpạ bul᷊ang humotong taung ene, iạ e rụdarisị su wiwihu Sal᷊ụ u Tigris kụ gẹ̌guwạ ene.

⁵ Iạ e rimal᷊ingara, bọu e takụ nikasilo piạ sěngkatau kụ mělẹ̌luheng pakeang bọu leneng dingangu papehẹ e wọu wul᷊aeng sahị.

⁶ Badange apạ e kụkerong kere paramata, gatine katualage kere tualagu kilạ, dingangu matane rụděllị kere putung. Takiahe ringangu laede kụkerong kere tambaga kẹ̌kisoěng, dingangu tingihe ikẹ̌karingihẹ̌ kere tingihu taumata l᷊awọ.

⁷ Kětạeng iạ sẹ̌saku nakasilo papasilo ene. Taumata apan dingangku e tawe nakasilo, kaiso i sire něngkatakụ hakịu nahuntal᷊ang dingangu nẹ̌kěmbuni.

⁸ Iạ e nitěntang sẹ̌saku tudẹ sene, apidu kạtingange papasilo kụ nakal᷊ahěkosẹ̌ ene. Iạ e semben tawe nakakoạ apa ringangu ghatiku e měngkate apa nẹ̌těngkawilosẹ̌.

⁹ Piạ e iạ nakaringihẹ̌ tingihe, naěnsạ e kụ napinsang iạ hakịu nakararěmmạ su ěntana.

¹⁰ Bọu e piạ e lima něnenggehẹ̌ si siạ kụ nakawangungke iạ apidu nakapẹ̌těkingu l᷊imaku ringangu wukuku.

¹¹ Malạekatẹ̌ e nẹ̌bera si siạ, ”Daniel, i kau e ikẹ̌kěndagu Ruata. Pẹ̌bangungke kụ darisị bọu e raringiheko manga waweraku ini e pakapia-pia. Iạ ini e seng nirolohẹ̌ sol᷊ong anunu.” Piạ i sie nẹ̌berang hal᷊ẹ̌ ene e, dimarisị e iạ kụ kạgěguhe.

¹² Mase angkuěnge si siạ e, ”Daniel, abe katakụ. Duata e seng dimaringihẹ̌ kakal᷊iomanengu deng bọu ěllo humotong i kau něngal᷊ạ putusang baugu mapakasanạu watangengu mědeạu makoạ pelesa. Iạ e seng diměnta kere sasimbahu kakal᷊iomanengu.

¹³ Malạekatẹ̌ měngangěllung kararatuangu Persia e rimokạ si siạ karěngụu ruam pul᷊o ěsa su ěllone. Bọu e i Mikhael, sěngkatau wọu manga pangahạ u malạekatẹ̌ e riměnta nẹ̌tul᷊ungu iạ. Takụ nitěntang i sie paị sene su Persia.

¹⁴ Iạ e riměnta waugu i kau tadeạu makahěngang apa sarung mariadi su manga wansanu. Papasilo ini e mạanung ěllo ramahi.”

¹⁵ Piạ i sie naul᷊ị u hal᷊ẹ̌ ene, iạ e kimakurung kụ tawe nakawera.

¹⁶ Bọu e malạekatẹ̌ kụ mạngawẹ taumata ene, něngul᷊uhu l᷊imane kụ něněnggehẹ̌ biwihẹ̌ku. Iạ nẹ̌bera si sie, ”Tuang, papasilo ini e nakawěhạ si siạ e hakịu iạ e tawe nakakoạ manga apa-apa.

¹⁷ Iạ e mẹ̌sul᷊ungu sěngkatau ěllang kụ dụdarisị su těngom mawune. Kụ kereapa wue iạ e mẹ̌bisara ringangi Tuang? Katoghasẹ̌ku e seng nasue ringangu singongoku e nasěsẹ.”

¹⁸ Tangu sěnsul᷊ẹko l᷊ai i sie něnenggehẹ̌ si siạ, bọu e pěndangengku toghasẹ̌ku e nahuntinamba.

¹⁹ I sie nẹ̌bera, ”Duata e kiměndagʼi kau, ual᷊ingu ene kumbahangbe rěnděnganeng dingangu matakụ, kụ pakatoghasẹ̌ bue!” Těntal᷊ang i sie měbẹ̌berang hal᷊ẹ̌ ene, iạ e nakapěndang lai limembong katoghase kụ nẹ̌bera, ”Pẹ̌berạe i Tuang. I Tuang seng něnamba katoghasẹ̌ku.”

^20-21 Mase i sie simimbang, ”Masingkạ ngae i kau unụe iạ e riměnta su anunu? Timonane ute waugu maul᷊ị si kamene u kai apa mạbawohẹ su ral᷊ungu Bukẹ̌ u Katul᷊idẹ̌ e. Ini e iạ harusẹ̌ mẹ̌sul᷊e kapia waugu mẹ̌sekẹ dumokạ malạekatẹ̌ měngangěllung Persia. Bọu ene malạekatẹ̌ měngangěllung Yunani e sarung duměnta. Tawẹ u sarung mẹ̌tul᷊ungu iạ e tabeạu katewe i Mikhael, malạekatẹ̌ měngangěllung Israel, wansanu.