DANIEL 1 - BINOHẸ SUSI BAL᷊O MAPIA

BĚKEN DANIEL DINGANGU MANGA HAPỊ E 1:1–6:29 Manga kal᷊endesangu Yahudi su istanang Nebukadnesar

¹ Těllu taung samurin Datung Yoyakim mẹ̌pẹ̌parenta Yehuda, i Nebukadnesar datum Babelẹ̌ e něngalo sol᷊ong soan Yerusalem kụ nihěbage.

² Mawu e napakawalan sie němatạ Datu i Yoyakim dingangu něhampasẹ̌ sěmbahageang bọu manga apal᷊iwụ mal᷊aarěga su Wal᷊em Mawu. Taumata apan nitawenge, niwawane sol᷊ong bal᷊eng pẹ̌tahamawuang mahang duatane su Babelẹ̌, dingangu manga apal᷊iwụ mal᷊aarěga kụ nihampase; mase niresọ e su ral᷊ungu manga gudangu wal᷊e ene.

³ Bọu e ratu e nẹ̌parenta si Aspenas, matimadu wal᷊eng istana, baugu ipěmile wọu tal᷊oarang apan tau Israel nitaweng pirang katau mal᷊ahinsẹ pal᷊ahiten datu e arau piạ dahang mapapangkatẹ̌.

⁴ I sire e harusẹ̌be manga kal᷊endesang tawẹ turạ e. I sire harusẹ̌be maral᷊epatẹ̌, piạ sikol᷊ane marangẹ, pelesa, ringangu piạ kasingkạ e mal᷊awọ ore lai matuhụ su munara su ral᷊ungu istana. I Aspenas harusẹ̌ maněntiro si sire mẹ̌basa ringangu měmohẹ berang Babel.

⁵ Datu e mal᷊aing nanilakehu kaěng dingangu inumang baugʼi sire hinong mẹ̌sul᷊ung dingangu apan seng nịdariahi waugu ral᷊ohom bal᷊en datu. Sarangke wọu ninarang karěngụ u těllu taung, i sire harusẹ̌ mẹ̌těngon datu waugu měmunara su istana.

⁶ Bọu tal᷊oarang manga kal᷊endesang ene e mạdal᷊aụ lai i Daniel, i Hananya, i Misael dingangu i Azarya, kěbị e wọu hěnton Yehuda.

⁷ Matimadu ral᷊ohom bal᷊eng istana e němal᷊ui manga areng i sire e nakoạ: i Beltsazar, i Sadrakh, i Mesakh dingangu i Abednego.

^8-9 Ual᷊ingu tul᷊umang u Ruata e, i Daniel itẹ̌tal᷊ěntụ dingangu ikẹ̌kěndagʼi Aspenas. I Daniel mẹ̌kẹ̌karaki tadeạu tawe mẹ̌těngkal᷊amuhụ u watangenge ringangu kaěng dingangu inumang anggorẹ̌ e wọu istanan datu e, ual᷊ingu ene i sie mẹ̌dẹ̌dorong si Aspenas tadeạu wotonge makaěbạ kaěng bal᷊ine.

¹⁰ Ual᷊ingu matakụ u ratu, i Aspenas nẹ̌bera, ”Datu e hala seng něnilakehu kaěng dingangu inumangu e, kụ kereu tumuhụ tingirange i kau e al᷊ingkai mahunsakị bọu tal᷊oarang manga kal᷊endesang bal᷊ine, nal᷊ahẹ u iạ e sarung pateěng.”

¹¹ Bọu i Daniel mẹ̌dẹ̌dal᷊ahintaung hal᷊ẹ̌ ene ringangu manga lukadẹ̌ niapěmunara kahiang Aspenas baugu ipěngurusẹ̌ si Daniel dingangu manga hapị e i sire těllu. Ungkuěng i Daniel,

¹² ”Banikateko i kami karěngụu mapul᷊o ěllo; pianẹete i kami ghěllireng dukụ dingangu akẹ mědeạu kanengang dingangu inungang i kami e.

¹³ Mal᷊iung mapul᷊o su ěllone, kěnangko pẹ̌sihingu ghahị i kami e ringangu ghahị u manga l᷊aumbaseng kụ kụkaěng tuhụ atoru ratu e, wọu ene pěngal᷊ạ e putusange kụ dasagewe su silong matanu e.”

¹⁴ Lukadẹ̌ ene e akorẹ̌ bue ringangu nẹ̌koạ bue sasal᷊ukạ ene e karěngụ e mapul᷊o ěllo.

¹⁵ Bọu ene tempo e nasuẹ e, kụ i sire kẹ̌kasilo limembong mahuweka ringangu matoghasẹ̌ bọu kal᷊awọu apang mangangudạ kụ seng nakaěbạ kaěng i sire wọu medang ratu e.

¹⁶ Bọu ene tangú lukadẹ̌ e selain tawe něnadiang kaěng dingangu inumang si sire, kere niatoru ratu e, kaiso tumbạeng dukụ dingangu akẹ e matagẹ̌.

¹⁷ Duata e nẹ̌gěllị su manga kal᷊endesang ene ěpạ u katau, kapelesa ringangu katatahuěnna su ral᷊ungu manga hundugu wawera e ringangu kasingkạ. Su l᷊iung ene e waugʼi Daniel nionggoʼE lai kapande baugu makapěněbal᷊u papasilo ringangu ipi.

¹⁸ Su pěngěnsueěnge těllu taung tempong pẹ̌sasikol᷊a kụ seng nitilakehu ratu ene, i Aspenas němaringang kal᷊awọu apang mangangudạ e ipẹ̌těngon Datu i Nebukadnesar.

¹⁹ Bọuten nẹ̌dudaton sire kěbị e tangú ratu e nakaěbạ e u i Daniel, i Hananya, i Misael dingangu i Azarya e něngalembo wọu i sire wal᷊ine e su patikụ munara e. Tangú nanětạ e i sire němpěmunara su ral᷊ung u wanalan datu.

²⁰ Balạewe suapan datu e měngukahu sangkural᷊ange kụ mẹ̌gausewe tatualagẹ̌ dingangu timbangeng, i sie nakasilo u sasasa ringangu sasimbangu mangangudạ i sire ěpạ e kawe mapul᷊o su sul᷊ene limembong kapiane wọu sasasa ringangu sasimbangu kěbị měnaněbal᷊ẹ̌ dingangu apang masasingkạ u l᷊ahopa su kasěllahu kararatuange.

²¹ I Daniel tatapẹ̌ měmẹ̌munara su istana sarang Datu i Koresh bọu Persia e namatạ Babel.