AMOS 1 - BINOHẸ SUSI BAL᷊O MAPIA

¹ I Amosẹ̌ e kai sěngkatau měndal᷊ukadẹ̌ domba wọu Tekoa. I sie nakoạ nabi su tempoʼm banuang Yehuda su kawasang parentan Datu i Uzia, ringangu Israel su parentan Datu i Yerobeam, ahusi Yoahas. Dua taung kal᷊imonang linuhẹ̌ sěnsul᷊e nariadị e, Duata napal᷊ahẹ u manga apa mạanung Israel si Amos.

² Kai ini e nipẹ̌berang Amos, ”Mawu e lụhuang bọu Wongkon Sion, tingihʼE ghimal᷊ědụ bọu Yerusalem. Kal᷊awọu ngaran děmpugẹ̌ e něngkahěgu, děmpugẹ̌ su Wul᷊udu Karmel nahasa-hasa.”

Hukumangu Ruata waugu manga wansa ipělẹ̌lampungu Israel Siria

³ Mawu e něhengetang, ”Tumanạ u Damsyik seng masau su sul᷊ene nẹ̌baradosa, ual᷊ingu ene, Iạ e mamben sarung měhukung i sire. I sire tumanịu matingkaị miěbạ tau Gilead,

⁴ ual᷊ingu ene Iạ sarung měndingọ u putung sol᷊ong istanan Datu i Hazael, dingangu měnutung kal᷊awọu benteng u Ratu Benhadad sarang pakasue.

⁵ Manga tukadu pasěllangeng u Damsyik e sarung Takụ goghaheng, dingangu tumanạu Wal᷊ang Awen sarung Takụ kaehang pakawurěsi wọu tampạ u katatanakeng i sire. Měngangawasa su Bet-Eden sarung Takụ apal᷊intụ bọu kal᷊aianenge, ringangu pamamanuang Siria e sarung tawengang ore lai hengketang sol᷊ong banuang Kir.”

Pilistin

⁶ Mawu e něhengetang, ”Tumanạu Gasa seng masaun sul᷊ene němpẹ̌dosa, ual᷊ingu tangú nal᷊ahẹu Iạ sarung měhukung i sire. I sire seng něhengkẹ bansa sěmbaụ ene kěbị taumatane, bọu e nẹ̌bal᷊ụ i sie kere ěllang su tau Edom.

⁷ Ual᷊ingu ene Iạ sarung mapasěbang u putung su manga meselu Gasa, kụ měnutung kal᷊awọu bentenge pakasue.

⁸ Tumanạ e ringangu mangangawasa soang Asdod dingangu Askelon sarung Takụ ipakaghea. Soang Ekron sarung Takụ ihukung, dingangu kěbị lěmben tau Pilistin sarung Takụ pakawinasa.”

Tirus

⁹ Mawu e něhengetang, ”Tumanạu Tirus seng masau su sul᷊ene němpẹ̌dosa, ual᷊ingu ene seng nal᷊ahẹu Iạ sarung měhukung i sire. I sire seng něhengkẹ u wansa sěmbaụ kěbị e sol᷊ong piněmembangeng, dingangu něnarakangu ene su Edom; i sire seng limampa rianding pẹ̌dal᷊ahapị.

¹⁰ Ual᷊ingu ene Iạ sarung měndingọ u putung su manga meselu Tirus kụ měnutung manga benteng e sarang pakasue.”

Edom

¹¹ Mawu e něhengetang, ”Tumanạu Edom seng masau su sul᷊ene měmpẹ̌dosa, ual᷊ingu ene nal᷊ahẹu Iạ sarung měhukung i sire. Tawẹ apa kakěndage, kụ i sire seng něngalo tau Israel, manga anạ u sěmbaụ i sire. I sire měngkate pědu, ringangu těbe měngẹ̌ngune.

¹² Ual᷊ingu ene, Iạ sarung mapasěbangu putung sol᷊ong soan Téman, kụ měnutung kal᷊awọu benteng su Bozra, sarang pakasue.”

Amon

¹³ Mawu e něhengetang, ”Tau Amon seng masau su sul᷊ene němpẹ̌dosa, ual᷊ingu ene nal᷊ahẹu Iạ sarung měhukung i sire. Ene nạung kạpẹ̌sẹ̌sekẹ e mědeạu měměnahẹ̌ kararatuange, i sire němpěngua tiang u manga wawine mẹ̌bẹ̌bawa kapapia e su Gilead.

¹⁴ Ual᷊ingu ene, Iạ sarung maparentaʼm putung su manga meselu soang Raba, kụ měhengisẹ̌ manga benteng pakasue. Su tempo ene sarung i karingihẹ̌ gahẹ u pẹ̌sasekẹ, paraěng e mẹ̌dahenesang kere suwu-suwu.

¹⁵ Datun sire ringangu apan sawohị u mẹ̌paparentane sarung hengketang sol᷊ong pěmamembangeng. Iạ e Mawu seng něhengetang.”