Salmos 1 - Papang YulniAlasna as rahm kidika 1 Isning alasna ki al as muih dudutni balna sumamalwa yakat usnit uiwas kidika, kaput bik laih dutni yamyang balna tanina yakut kiwas kidika, dawak Papang yakat sarahni yuyulwa balna pasyakat kawas kidika, 2 kauna witing laih Dawan lani balna kidika dalani talwi, dawak kidika yakat pukta madah kulwi. 3 Kidika alni laih sihm pan as was kung yakat dahna kapat ki, mani kat witing minik balna kidika yakwi, dawak basni balna bik kusuwas ki. ¡Di balna yamwa bitik kidika yamni manah kalahwi! 4 Muih dudutni balna laih witingna yakat kaput kalahwas ki, kauna sihm di kusulana kat wing dulauwi dukiwa kapat ki. 5 Kidika bahang muih dudutni balna laih la yamwarang pasyakat diski; dawak bik dutni yamyang balna kidika muih yayamni balna pasyakat diski witingna dinina. 6 Dawan laih muih yayamni balna tanina kidika maintalwi, kauna muih dudutni balna tanina kidika daunin yakat kiwi. |