Rut 1 - Papang Yulni

Elimelec wanaihni balna Moab yakat

^1-2 Israel pasyak wihta balna manah tunan kakawadai mani yakat, yuhlakna dai kidika pāni yakat. Kaput laih Judá sauni yakat pa as ayangni Betlehem yakat al as sakdai ayangni laih Elimelec, bahang kidika alni, ma as as Moab sauni yakat kiwi yalahna dai. Witing yalni Noemí karak uinadai, dawak walanibis balna bu karak, Mahlón dawak Quelión balna kidika. Witingna bitik laih Efrateo balna dai; yuldarangkat Betlehem kaupak. Kaput laih Moab yakat uiwi watwi yalalahna dai.

³ Yakat dauna Elimelec, Noemí alni dai kidika, kaput laih witing alas kalahna, walanibis ahal bu kidika karak.

⁴ Usnit kat wawahma balna dai kidika Moab yayalni balna karak kalduduna; yayal kidika as ayangni laih Orfa, dawak ūk kidika laih Rut. Kurih salap bayakwakat

⁵ Mahlón dawak Quelión balna dai kidika bik dadauna, dawak Noemí dai kidika alas kalahna ilpni as bik dis, walanibis balna dawak alni bik dis.

Noemí dawi Rut karak Betlehem yakat uina

⁶ Mani as kat Noemí Moab yakat yul as dakana Dawan yaklauwi witing tawanni yakat minikun talna, bahang yuh dai kidika dawak bayakkiuna.

⁷ Bahang nawatwi kiunin kulna Judá yakat unisah yayal balna yakarak kalpakwi, kaput laih panina kaupak dawi kalahwi uina;

⁸ kaunah ta pasyakat diyulna: —Nawatta ūmana kau yawanauh. Dawan yaklauwi yamni manayamna karang, manna lawa yang akat yamni yāyamnamana kapat, dawak walakibis balna yakat bik yamni diyamnamana dai kapat,

⁹ dawak watwi manawak al dutanama, ūmana bik duta kulnamnalak awanama. Usnitkat Noemí yaklauwi dilaihwi umna mahka kaldakwi kalalahwa bahang, kaunah witingna kakaidana

¹⁰ dawak kalyuyulna: —¡Dikah! ¡Yangna man karak yawanaki ki sauma yakat!

¹¹ Noemí watwi yulwasdana: —Yawanauh walakibis yayal balna, ¿aisyamta yang karak kiunin kultamanah? Yang walakibis ahal baisa ūk disyang manna karak kaldunamna.

¹² Ūmana kau nawatta yawanauh. Yang uman muihbarak kalnayang, wattik al dutik walabis yakna atnik. Kaput al dutik walabis yaknik sip karang kat,

¹³ ¿manna tahatanamayah walanibis balna kidika muihbararak kakalwak manna kalduna atnamna? ¿Manna al dutas data kidika tahanamnayah? Dikah walakibis yayal balna, kaput atnin laih awaski. Dawan yaklauwi wauhnin tapalhni as yasihna, kaunah baisa tapalhni karang manna dalani wauhtanang manatalki kat.

¹⁴ Witingna watwi kakaidana. Witni kat Orfa laih unisah yal yakat umwi dawi mahka kiuna, kaunah Rut laih witing karak watnadai.

¹⁵ Kaput laih Noemí kalyulna: —Talah mumabin laih mahka sauni kau nawatwi kiwi, dawak daniwan balna kau bik. Man bik yawah witing karak.

¹⁶ Kaunah Rut yaklauwi nangnitlana: —¡Yayulwinih madana atnik, dawak bik man kaupak daktik alahwinik bik! Yawaki man angkat yawama yakat, dawak bik man angkat yalahma yakat yang bik yakat yalahki. Man tawanma kidika yang tawanki karang, man Papangma kidika yang Papangki karang.

¹⁷ Dauki ki man angkat dauma yakat, dawak dukih yawi yakat yanuna atnin. ¡Dawan yaklauwi wah yana karang parasni palni man kaupak datik alahwaki kat, dauki manah laih takat!

¹⁸ Noemí talna, Rut yaklauwi rahm palni kalyulwa kidika, bahang kaput laih watwi kalyulwas danadai nawatwi kiunin yulni kidika,

¹⁹ kaput laih albupak ta yakat kalahwi lapakwi uina, Betlehem kat. Betlehem yakat uiwi kakana kat, muih balna kidika bitik kulninna sat sat kukulna tawan kidika bitik. Yayal kidika laih yuyulwadai: —¿Adika awasyah Noemí?

²⁰ Kaunah witing yaklauwi nangnitnalana: —Baisa Noemí yayuyulwinih, kaunah yayultanauh Mara kat Papang parasni nuhni duwa kidika yaklauwi tapahlni manah yabangna.

²¹ Akaupak alahwik yawanayang tingki yakat dibuhng, kaunah waralaih aiwayang tingki pāni manah, kat Dawan yaklauwi kaput kulna dai bahang. ¿Ais yamta Noemí yatimanah, Dawan parasni bitik duwa kidika yaklauwi dutni yakat yahana kidika, dawak kulnin bukna lani manah?

²² Kaput laih Noemí nawatwi kaina dai Moab kaupak Rut karak, Moab muihni. Betlehem yakat uiwi kakanadai, bahang kidika mani balna yakat kidika plawar minik babahwadai.