Oseas 1 - Papang Yulni

Oseas yalni dawak walanibis balna

¹ Adika yulni balna Papang yaklauwi sihna dai, Oseas Beeri walanibis yakat, kidika laih Uzías, king kana mani balna dai yakat, Jotam, Acaz, dawak Ezequías, kidika balna laih Judá kingni balna dai dawak Joás walanibis Jeroboam, laih Israel kingni dai.

² Papang yulni balna kidika aput tunan bahna dai, Oseas munah pakwak yulnin dai kidika: “Israel sauni kidika la bahna, yang kaupak naikau yaklauwi. Sihm kaput bik man yawa yal as al suhlsuhl kat duta, dawak witing karak walamanabis yaktanauh; kaput laih walanibis balna kidika yal as al suhlsuhl kaupak walanibis balna karang.”

³ Kaput laih Oseas yal as duna dai ayangni laih Gomer, Diblaim walanibis, bahang witing walanibis al as yakna dai yal kidika kaupak.

⁴ Kaput laih Papang yaklauwi Oseas yakat kalyulna: “Muihbin kidika ayangni pakta, Jezreel, kat nai awaskat yang Jehú sulani balna yakat wah sihki ki, Jezreel nining yakat dutni yamna kidika yulni, kaput laih Israel kingni kidika dakpamki ki.

⁵ Kidika mani daukalpamna awaki, Israel kalbaunin parasni duwa kidika, Jezreel sauni langni yakat.”

⁶ Gomer watwi muihkaruk dana dai, bahang walanibis yal as duna dai. Papang yaklauwi Oseas yakat kalyulna: “Walamabis yal kidika ayangni pakta, Lo-ruhama, kat yang wattik Israel kidika minikun talas awaki. Witing dutni yamna kidika dating diswas karangki.

⁷ Judá muihni balna kidika laih takat miniknakun talki: yang palni, witingna Papangnina yang adika lawik dilaihtik yakki ki. Kauna war munah laih laihtik yaktas awaki, sibang dis, isparah dis, aras dis, aras kilyang balna bik dis yang laihtik yakki ki.”

⁸ Lo-ruhama kidika ta suwi dana usnit kat, Gomer watwi muih karuk dana dai, bahang kaput laih muihbin al bin as duna.

⁹ Kaput laih Papang yaklauwi Oseas yakat kalyulna: “Walamabis, al kidika ayangni pakta, Lo-ami, kat manna kidika yang tawanki awasmana, dawak yang adika manna Papangmana awasyang.”

Israel tawanni kidika laihwi dulauna

¹⁰ Ma as kat Israel balna kidika kuma kauhnimak kapat karang, muih as bik sip-awas karang kulwi talna atnin. Aput yayulnin dai kidika: “Manna kidika yang tawanni awasmana”, Papang yaklauwi diyulwarang: “Manna laih Papang sangka kidika walanibis mana”

¹¹ Kaput laih Israel muihni balna dawak Judá muihni balna kidika bitik aslah uduhna karang, dawakat tunan muihni kidika asla kamanah yakna karang, dawak pa bitik kaupak witingna nawatwi aiwarang Jerusalén yakat. ¡Jezreel mani kidika nuhni palni karang!