Miqueas 1 - Papang Yulni

Papang la yamwarang kidika Samaria minit yakat

¹ Adika yulni, Papang yaklauwi kalsihna, Moreset pāni kaupak al as ayangni Miqueas dai yakat, bahang niningkana Samaria dawak Jerusalén yulni, kidika mani balna yakat Jotam, Acaz Ezequías, bahang witingna kidika king kakawa dai Judá yakat.

² Tawan balna bitik manna adika dakanauh, sau muihni balna bitik, yamni dakanauh: Dawan, witing ūni holi kidika kaupak, witing witnis karang manna namangna yakat.

³ Papang yalahwa pāni kaupak yaklauwi kalahwarang, dawak asang balna tuna munah lapakwi kaiwarang.

⁴ Man kalma dinit yakat asang balna kidika arwarang, sihm balas kuhpau yakat āna kapat, dawak sau langni balna kidika sahwi kalahna karang bu, sihm was parasni murwak sau daklawa kapat.

⁵ Adika balna bitik laih Jacob tawanni kulnin dutni kidika yulni Israel muihni balna dutni yayamna yulni. ¿Angkat sakyah Jacob kulnin dutni duwa kidika? ¡Samaria tawanni yakat sakki! ¿Dawak angkat sakyah, Judá daniwan dauh panina balna kidika? ¡Sihm Jerusalén yakat sakki!

⁶ Kidika bahang Papang yulwi: “Samaria tawanni nuhni kidika yamtingkat bahwi dis dawarangki, kidika pāni laih di dis ahni manah dawarang ki wain dahna atnin. Sau langni yakat tawan nuhni kinipala balna kidika raki, dawak rahni balna ukna kidika kuhryaktik lāih daki.

⁷ Witing daniwan dauh wayani balna kidika bahwi bikis dawarang, dawak busna daninawan panina saran kidika bitik busyamwarang. Kat kidika dini laih, kalduwi payahwi lalah yayakwa kidika kau yayamna bahang, dawak kalduwi payahwi lalah yayakna kidika sihm wattik kidika yakat wirlaki.”

Miqueas kaidana

⁸ Kidika bahang aidaki kulnik bukna nuhni karak, kidika bahang kalpas manah, dawak wahdis likawaki, dawak sarahtik aidaki, chacal kapat dawak sihm uhu nuhni walanibis siuhwa kapat.

⁹ Kat Samaria witing di kalina kidika laih kalyamnin dini awaski: Judá yakat bik kallaihna, dawak bik Jerusalén kat bayakwi kiwi laihna ki, tawan nunuhni paskau yang tawanki yalahwa kidika.

¹⁰ Adika diyulwinih, Gad muihni balna yakat, dawak bik kakaidinih. Dalawak bukta pihrtanauh Bet-le-afra sauni yahamni yakat.

¹¹ ¡Safir muihni balna, saumana data pa ūk yakat yawanauh, wahdis asalmana karuk! ¡Zaanán kau yalalahwa balna kidika laih kalalahwas karang! ¡Kaidinin sakki Bet-esel yakat, dawak manna laih muih as bik tingmanasut lalaihwas karang!

¹² Marot kau yalalahwa balna kidika dalani wawauhwi, bahang muihnina yamni kat dakakih diawi, kat Papang yaklauwi yamna dutni kidika Jerusalén dūrni kat kiwi kana atnin.

¹³ Manna Laquis muihni balna, kulnamna dutni dai Israel kapat, kidika kuduh Sayan dutni yamnadai kidika, karmana yakat aras kidika sittanauh.

¹⁴ Moreset-gat kaupak naikau alahwa ban kaput atnin, Aczib tawanni nuhni kidika, Israel kingni balna minitna yakat bukwi taihnin as karang.

¹⁵ Papang yulwi: “Maresa kau bangmana kidika mana namangna yakat sihki, kalbauwi muihni dinina dakyakyang as, dawak Israel paskaupak walwi yakna balna kidika, Adulam pāni sulihni yakat kiwi kawarang.

¹⁶ Dawak man, Sayan tawanni nuhni, tunama kidika kahrta salaini yamtah, dalani wauhtaman kidika saini, dawak bik walamabis balna dalani talaman yulni. Basma kidika dakta pauni manah datah, kusma tunan kapat, kat walamabis balna kidika pa ūk yakat laihwi duwi uiwarang bahang.”