Mark 3 - Papang Yulni

Jisas yakurupdinin mani muih as dulauna siknis kaupak

¹ Jisas witing watwi Papang yulni sumamalwa ūni as kau kana; dawak kidika ūni yakat muih al tingni kusulana as sakdai.

² Dawak muih balna kidika Jisas yakpakdi kaltatalna yakurupdinin mani yakat sikninis kaupak yamni kalyamwarangpa, dawak kaput laih yulni yakna atnin.

³ Jisas yaklau muih al tingni kusulana yakat kalyulna: —Lawah, dawak papusyakat yawah.

⁴ Usnit kat muih ūk balna yakat diyulwi dakana: —¿Yakurupdinin mani yakat ais yamwih: di yamni kidika awaskat di dutni? ¿Muih sangnika as laihwi yaknin kidika awaskat daukalpamnin? Kaunah witingna laih apdadana dai.

⁵ Bahang Jisas witing yaihnitkau muih balna bangyakat kulnin daukalwi ditalna, dawak bik kulninna bukna dai, kat kulninna dadasni kidika yulni, dawak kalyulna kidika al yakat: —Tingma dulautah. Kaput laih al kidika tingni dulauna, dawak tingni kidika yamni kalyamna dai.

⁶ Kaunah fariseo balna laih kalahwi, Herod karak aslah balna kidika laih ridi kakalna Jisas kidika inin.

Muih mahni lakun kungyakat uina

⁷ Jisas witing disainipil balna karak lakun kungyakat uina, dawak Galilea muihni balna mahni bik usnit uiwi uina.

⁸ Jisas witing di nunuhni balna yamwa kidika muih balna dakakana kat, Judea kaupak, Jerusalén, Idumea, Jordán kaupak ma kilwa niningkauh, Tiro sauni, dawak Sidón sauni kaupak bik muih mahni uiwi kaltatalna dai.

⁹ Kidika yulni, Jisas disainipil balna yakat diyulna kuring as ridi yamnin, muih balna mahni kidika kallaihnin awas yulni.

¹⁰ Kat muih mahni sikninanis kaupak yamni diyamna dai kidika yulni, siknis balna bitik kidika witing minityakat duwi uina, tingnina kau Jisas yakat laihwi ilp duna atnin.

¹¹ Dawak spirit dutni balna Jisas yakat talwi, witing muhni yakat limbabahwi sararahna dai: —¡Man laih Papang Walanibis man!

¹² Kaunah Jisas yaklau dibilwi diyulwadai witing yulni muih balna muhnina yakat di as bik yulninna awas.

Jisas yaklau apostel balna 12 walwi yakna kidika

¹³ Kidika usnit kat Jisas laih asang as kau kilwi kiuna, dawak angdika muihni balna yakat witing yamni talwa kidika yakat diyulwak iluina. Aslah kalbahahana mani kat,

¹⁴ witingna paskaupak 12 walwi yakna dai, witing yakat minikdana atninna dawak bik uiwi yul yamni kidika yulna atninna. Adika balna akat ayangnina pakna dai apostel,

¹⁵ dawak witingna yakat parasnina diana sitan balna kidika kangwi yakna atnin.

¹⁶ Adika balna ki 12 walwi yakna kidika: Saiman, ayangni ūk Pita pakna kidika;

¹⁷ Sibidi walanibis balna Jims dawak wirahni Jan kauna, kidika balna yakat laih Boanerges pakna (yuldarangkat, “alwana walanibis balna”);

¹⁸ Andru, Pilip, Bartolomé, Matyu, Tomás dawak Jims, Alpius walanibis; Tadeo, Saiman rahmni yulni kalbauyang dai kidika,

¹⁹ dawak Judas Iscariote, usnit kat Jisas yakat malni kau pāt yakat āna kidika.

Jisas yulni yayakna sitan kaupak parasni duwi atwi

²⁰ Usnit kat Jisas ū as kau kana, dawak watwi muih mahni palni kalududuhna dai, witing dawak disainipil balna kat bik sip di kakaswas dai.

²¹ Jisas wanaihni balna amanglalana mani kat, kalahwi uina dai duwi uina atnin, muih balna laih yuyulwadai Jisas laih tunan dutni kalna.

²² Lā sumalyang balna Jerusalén kaupak uina kidika bik yuyulwadai: “Beelzebú, sitan balna taninatuna kidika yaklau adika alni akat parasni kalana sitan balna yakat kangwi yakna atnin.”

²³ Jisas yaklau muih balna yakat uinin diyulna, dawak yul as yul ūk karak libitwi diyulna: “¿Amput sitan yaklauwi witing yakauna kangwi yakwarangyah?

²⁴ Sau as sahwi kalahna bu kidika sip sak-awas karangki;

²⁵ dawak kalwanaih as sahwi kalahna kidika, sip sak-awas karangki.

²⁶ Kaput bik, sitan kidika sahwi kalahwi witing alas niningyakat yaklauwarang kat, witing sip sak-awas karangki; kidika laih mani witni kiwi kana karang.

²⁷ “Muih al as parasni kidika ūni yakat sip muih as kawi witing dini balna kidika dakyakwas karangki, laihwi sitwas tanitkauh; kaput laih witing dini balna kidika dakyaknin sip karang.

²⁸ “Barangni manayultayang Papang yaklau muih balna dutnina bitik dawak dutni mahni yuyulwarang kidika bik dawak diswarang ki;

²⁹ kaunah angdika muihni Spirit Holi yakat dutni yulwarang laih, sip dutni dawak diswas karang, kaunah witing dutni kalkulna kidika laih ban kaput karang.”

³⁰ Adika laih Jisas yaklau yulna dai, kat witingna yaklau yuyulwa dai Jisas laih spirit maisihni duwi.

Jisas nanangni dawak wirahni balna kauna

³¹ Kaput bik Jisas nanangni dawak wirahni balna kauna uina, kaunah ahni yakat watwi kidika kaupak yul sisihna dai Jisas kalahkaina atnin.

³² Muih balna Jisas yaihnitkau bangdai kidika yaklau kalyuyulna: —Man nanangma, wirahma ahal balna dawak wirahma yayal balna kauna ahni yakat mawawalwi.

³³ Witing yaklau nangnitnalana: —¿Wais balnayah yang nanangki dawak yang wirahki balna kidika?

³⁴ Usnit kat, witing yaihnit kau muih balna yalahna bangdai kidika yakat ditalwi, baisa minit lakwi aput yulna: —Adika balna ki yang nanangni dawak yang wirahki balna.

³⁵ Bahang wais Papang kulnin lani yamwa kidika, kidika ki yang wirahki al, wirahki yal dawak nanangki.