Mark 1 - Papang Yulni

Kauhmak wanilang yakat Jan was utuh'yakyang kidika

¹ Jisas Mesías, Papang walanibis yulni yamni balna kidika tatuna kaupak.

² Prapit Isaías wauhnitaya yakat aput ulna: “Man tamat yakat yang yulki trukyang kidika, man tama barangni yamnin yulni.

³ Yulni as sarahwi yulwi kauhmak wanilang yakat: ‘Dawan tani ridi yamtanauh; ta as barangni yamta kalatanauh.’ ”

⁴ Dawak kaput laih Jan kidika kauhmak wanilang yakat kiuna; dawak diyulna bitik Papang yakat wiryaklanin, dawak was utuh'yaknin, kaput laih, Papang yaklau dutnina dawak disnin.

⁵ Judea sauni muihni balna bitik dawak Jerusalén tawanni nuhni kaupak bik witing yakat uina dai sumalwa kidika dakanin. Witingna alas dutnina balna yulwi yayakna dai, dawak Jan yaklau Jordán wasni yakat was utuh'yakna dai.

⁶ Jan prakni kidika laih kiamil butuni kau yamna dai, dawak di utak as kau banimak yakat sitna dai; dawak witing laih sisin dawak amak karak kaswādai.

⁷ Witing sumalwi aput yulna dai: “Yang uskit yakat as kaiwi witing laih takit parasni nuhni ki yang karak dawakat, yang abuktik susni wahni uluhnik sip-awasyang.

⁸ Yang laih was kau manautuh' yaknayang; kaunah witing laih Spirit Holi kau manautuh'yakwarang.”

Jisas yakat was utuh'yakna

⁹ Kidika mani balna yakat Jisas Nazaret kaupak kalahna, kidika laih Galilea sauni yakat ki, dawak Jan yaklau Jordán wasni yakat kalutuh'yakna.

¹⁰ Waspa kaupak kalahwi kilwa minitni yakat, Jisas witing talna kisang kidika apahwakat, dawak Spirit kidika laih sihm buhtuku kapat witing minityakat kaiwi bukna dai.

¹¹ Dawak kisang kaupak yulni as aput yulwak dakana: “Man kuduh yang walakibis dalani, yang lawik mayaknayang kidika.”

Jisas traini talna kidika

¹² Kidika kalahna usnit kat, Spirit yaklauwi Jisas kidika duwi kiuna kauhmak wanilang yakat.

¹³ Witing laih kidika yakat ma 40 likdai, di anyang balna walsah yakat yalahwādai, dawak satanas yaklau traini talwadai; dawak insal balna yaklau dini yayamwa dai.

Jisas Galilea yakat mahka warkni yamna

¹⁴ Jan silak yakat ahana usnit kat, Jisas laih Galilea yakat kiuna Papang yulni yamni kidika yulwi sumalna atnin.

¹⁵ Aput yulwadai: “Mani kidika uman kaikana ki, dawak Papang kingni lāni kidika ulisna. Papang yakat nawatta aiwanauh, dawak kasak kulnin lani karak yulni yamni wisam kidika dutanauh.”

Jisas yaklau dipamyang muihni balna arungka diyulwak uina

¹⁶ Jisas Galilea lakunni kungmunah yakat kiwalik kauna talna, Saiman dawak wirahni Andru karak. Witingna laih dipamyang balna dai, dawak waspa dini laihnin dini kidika was pasyakat ruhm-awa tuludai.

¹⁷ Jisas yaklau witingna yakat diyulna: —Manna uskit aiwanauh, dawak yang lawik muih laihyang manayamki.

¹⁸ Kidika minitni yakat waspa laihnin dini duduwādai kidika dapamwi witing karak uina.

¹⁹ Kidika kaupak tanityakat apis kiwak, Jisas talna Sibidi walanibis Jims yakat, dawak wirahni Jan karak, witingna laih kuring as kau waspa laihnin dini kidika ridi yamwaraudai.

²⁰ Bahang diyulna uina atnin dawak witingna papangnina Sibidi kidika kuring yakat tingnisut laihyang balna karak damukwi Jisas karak kalpakwi uina.

Muih al as spirit dutni duwadai kidika

²¹ Capernaum yakat uina, dawak yakurupdinin mani yakat Jisas laih sumamalwa ūni yakat kawi sumalna.

²² Muih balna kidika yamni tatalna, amput disumalwa kidika, kat witing laih silp parasni duwi sumalwa bahang, lā maestro balna kapat awas.

²³ Sumamalwa ūni yakat muih al as spirit maisihni duwādai, bahang kidika laih sarahna:

²⁴ —¿Ais yamta yangna karak āwamahn, Jisas Nazaret kaupakman kidika? ¿Yanadaukalmukna aiwanamahn? Yang amangmalatayang, man laih Papang Holi kidika walanibisman.

²⁵ Jisas yaklau spirit dutni yakat bilwi kalyulna: —¡Ap data adika alni kaupak data alahwah!

²⁶ Spirit maisihni kidika yaklau kalyamwak muih al kidika sangka dauna, dawak parasni sarahwi kidika kaupak kalahna.

²⁷ Witingna bitik muihsakdadauna, dawak biri yulwi dakakana: —¿Ais diniyah adika? ¡Di wisamni as sumalwi, dawak parasni bitik palni karuk! ¡Spirit maisihni balna yakat bik dipakwi, dawak yulni dakawi yayamwi!

²⁸ Dawak sirihni palni, Jisas ayangni kidika nuhni kulna dai Galilea sauni muihni balna bitik dakakana dai.

Jisas yaklau Saiman unisah yal sikninis kaupak yamni kalyamna

²⁹ Sumamalwa ūni kaupak kalahwi, Jisas laih Jims dawak Jan karak kalpakwi Saiman dawak Andru balna ūnina yakat uina.

³⁰ Saiman unisah yal kidika laih yamah busna kat krikri yakat tusdai. Dawak Jisas yakat kalyuyulna,

³¹ dawak yaihnit yakat kiwi tingni yakat laihwi dulauna; kidika minitni yakat yamahni kidika kaldana, dawak mahka dinina yamna.

Jisas muih mahni sikninanis kaupak yamni diyamna

³² Ma puklakwak, muih siknis duduwa balna, dawak walasa dilaihna balna kidika bitik duwi uina Jisas yakat,

³³ dawak tawan muihni balna bitik dūr yakat kalududuhna.

³⁴ dawak Jisas, witing siknis satni duduwa balna bitik kaupak yamni diyamna, muih balna bitik kau, dawak spirit dudutni mahni bik kangwi yakna; kaunah dawak spirit dudutni balna kidika yulbabauwasdai, kat witingna amanglalawadai bahang.

Jisas sumalna, sumamalwa ūni yakat

³⁵ Baisa yamni payahlawas, puksani kauna kat, Jisas kalahwi kiuna tawan nuhni kidika kaupak, alas kalahwi minityulna atnin.

³⁶ Saiman dawak kaltalyang yayamni balna karak kalpakwi Jisas walwi uina,

³⁷ dawak Jisas karak kalpakwi kalyuyulna: —Muih bitik man mawawalwi.

³⁸ Kaunah witing nangnitnalana: —Mayang mawanang pa ūk ulis yakat, kidika yakat bik sumalnik ki, kat kidika yulni alahwanayang bahang.

³⁹ Kaput laih Jisas kidika Galilea pāni bitik yakat likdai, dawak pa balna kau sumalnin ūni balna yakat kawi sumalna, dawak walasa balna bik kangwi yakna.

Jisas, lipar duyang as sikninis kaupak yamni kalyamna

⁴⁰ Muih al lipar duwa muihni as Jisas yaihnit yakat kiuna, dawak limbabahwi aput kalyulna: —Dukih mawakat, sipman yang sikkinis kaupak klin yāyamtah.

⁴¹ Jisas, kidika muihni yakat minikun talna; dawak tingni kau laihwi yulna: —Dukih yawi. ¡Klin kalawang!

⁴² Kidika minitni yakat lipar sikninis kidika disna, witing muihni kaupak, dawak klin kalna.

⁴³ Usnit kat Jisas yaklau kalparaswak mahka kiuna, dawak kalyulna:

⁴⁴ —Talah, muih as kau bik diyulwinih; kaunah sumalyang yakat yawah, dawak maisihni dis alahwanaman kidika, minitdis kalanin dini as duyawah Moses yaklau lā āna kaput, kidika laih sumalyang balna dinina.

⁴⁵ Kaunah kidika alni laih kiwi muih balna bitik yakat diyulna ais kalahna kalahna kidika. Kaput bahang Jisas kidika lāih tawan balna yakat kiwi kanin sip-awas dai, bahang ahni yakat watnadai, muih dis pāni yakat, kaunah pa ūk ūk kaupak uiwi kaltatalwādai.