Levítico 1 - Papang Yulni

Sakripais karauni kauna balna busnin kidika

¹ Kalpapakwa ūni labanni kaupak Papang yaklauwi Moses yakat kalyulna aput:

² “Israel balna yakat yuldibauta aput diyultah, witingna yang akat minit dis dini kidika tinglau kat duwi aiwarang kat, witingna tingninalau kaupak atnin ki.

³ “Tinglau as witing sakripais yamwa kidika witing tuniruh kaupak karang kat, kidika laih turuh almuk as yamni atnin, sakahwa-awas atnin. Kaput laih duna karang, bahang kidika laih Papang muhni yakat kalana atnin ki, kalpaknin ūni labanni kiukawa yakat,

⁴ witing tingni dulaunin ki tinglau tunan minit yakat. Kaput laih tinglau kidika duna karang, witing dutni balna bitik dawak disnin yulni.

⁵ Turuh almuk kidika, Papang muhni yakat laihwi dinimak dakwarang; usnit kat Aarón walanibis balna, sumalyang balna kidika yaklauwi ā kidika kalalana karang, dawak usnit kat minit yakat raraswarang, sakripais buswa pāni yaihnit balna kidika bitik rasna karang, kalpaknin ūni labanni kau yakat.

⁶ Tinglau as sakripais yamwa kidika laih unitak takwi yakpamwi dawi sahrwarang,

⁷ sumalyang balna kidika yaklauwi sakripais busnin pāni minit yakat kuh bibiwarang dawak pāni bik yayamwarang,

⁸ dimuihni dakna balna kidika kuh minit yakat ilna atnin, tunan kidika dawak bāni salani kidika bik.

⁹ Sakripais karauni kauna busnin duaiwa kidika laih bāni paskau balna dawak barahnimak balna kidika was kau suhnin karang, dawak sumalyang yaklauwi sakripais busnin pāni minit yakat ilwi, kidika laih walapni as karang Papang muhni akat.

¹⁰ “Agha, tinglau as sakripais buswa kidika witing tingnilau kaupak kat, sīpni pa, kidika awaskat kutsni karang kat, almuk atnin ki dawak sakahwa awas atnin ki,

¹¹ bahang kidika laih sakripais busnin pāni tingpal niningkauh yakat lāwi dinimak dakna atnin karang, Papang muhni tani yakat. Aarón walanibis balna, sumalyang kidika yaklauwi, tinglau āni kidika sakripais buswa pāni minit yakat dawak yaihnit yakat bik rarasna karang;

¹² usnit kat dimuihni kidika sahrwarang, dawak usnit kat sumalyang kidika yaklauwi dimuihni sarhna kidika kuh dahlwa minit yakat ilwarang, tunan dawak bāni bikis balna salani kidika bik.

¹³ Usnit kat sakripais karauni kauna buswa muihni kidika yaklauwi duwi kiwarang bāni dawak barahnimak balna kidika was kau suhwi dawi, dawak sumalyang kidika yaklauwi sakripais buswarang minitdis kalanin dini walapni as Papang yakat.

¹⁴ “Tinglau as sakripais buswa kidika Papang risnipik kau, kidika laih dilawani karang kat, buhtuku bikisni, kidika awaskat buhtuku wahmabin as atnin ki.

¹⁵ Sumalyang kidika yaklauwi sakripais busnin pāni minitluih yakat ilwarang: tunan kidika dakwi yakwarang, dawak āni kidika sakripais busnin pāni yaihnit yakat tiriswi yakwi dawi, ilwak buswarang.

¹⁶ Uknin kidika bitik yakpamwarang, dawak sakripais busnin pāni kidika makilwa niningyakauh ruhmwarang, yuldarang kat wan yakwi ududuhwa pāni yakat;

¹⁷ usnit kat dilawani kidika papus sahwarang, lawani sutni laihwi, kaunah sahwa kidika bitik laih silp yakwas karang, witni kat laih dilawa dai kidika ilwi buswarang, minitdis kalanin dini walapni as Papang yakat.