Judas 1 - Papang Yulni

Parasnin yulni

¹ Yang, Judas, Jisas Krais dini yamyang dawak Jims wirahni, Papang yaklau dalani ditalwa muihni balna yakat dawak diyulwakat aina muihni balna yakat bik ultayang, kidika balna laih Jisas Krais yaklau tanitna dakwi.

² Manna dalani dawak kulnin aslah lani kidika bik minitbayak dutanauh.

Alas yulni sumamalwa muihni balna

³ Yang wanaihki dalani balna, yang dukih yana manna dawak yang bik laihwi yaknin lani duda kidika yulni manna yakat wauhtaya manaulna atnik; kaunah waralaih yang lawik yamnik kidika yabukwi manna kalmana dinit buktik manayulna atnik rahm kulnin lani Papang dini balna yakat diana kidika yulni kalbauna atnamna.

⁴ Kat alas lani munah muih balna buas yakmaldi ka'yaklalana kidika balna yulnina ulna balna kidika yaklau uman muhnilau kau yuyulna dai pāt duduwarang kidika. Kidika balna laih dutni yamyang muihni balna, Mapapangki dalani lani duwa kidika alas lani munah duduwi sangnika as dutni yakat manah duwi uinin yulni, dawak Madakiwan Jisas Krais yakat bik taldas mayang atwi.

⁵ Manna uman amanglatamana karang bik, ismangnakatna atnik dukih yawi Dawan yaklau Egipto kaupak Israel tawanni kidika duwi yakna usnit kat, angdika muihni balna witing yakat kukulwas dai kidika laih dihimukna dai.

⁶ Dawak insal balna witingna panina duwas dawi witingna silp ūnina dadana kidika laih, Papang yaklau puksani yakat silak kau ban kaput atnin diduwi la nuhni yamwarang mani kat.

⁷ Sihm kidika insal balna kapat, Sodoma dawak Gomorra dawak yaihnit balna yakat tawan nunuhni balna kidika bik la munah kalduwas atnin lani yakat kakana dai, dawak di suhlsuhl atnin lani kidika duwi sau dini kidika niningyakat yaklalauna dai. Kidika yulni wah dalani ban kaput atnin kuhnipau kidika wawauhna dai dawak kidika balna bitik laih muih balna bitik yakat isningnapakna as kapat watna dai.

⁸ Kidika kaput karang bik, kidika muihni balna bik, kaminin manah yulni, witingna silp muihnina nuhni kidika dutni kakalwi, Dawan parasni kidika yamni tatalwas ki dawak parasni nuhni duyang balna yakat bik dutni diyuyulwi.

⁹ Insal Miguel witing palni, sitan niningyakat kalbauwa dai mani Moses muihni nuhni yulni kalbilwinah, dutni kalyulwi pāt yakat āwas dai, kaunah aput manah kalyulna dai: “¡Dawan yaklau mabilna karang!”

¹⁰ Kaunah kidika ahalni balna laih witingna di amanglalawas dini balna kidika yakat dutni yuyulwa dai; dawak sinsnina karak amanglalawa dini balna kidika laih, sihm di dauh balna sinsnina dis di amanglalawa kidika kapat ki, kidika laih witingna silp pātnina yulni yayamwi.

¹¹ ¡Alakaih witingna laih!, kat Caín usnit uhuina kidika yulni. Lalah duduna yulni naikau kalahwi uina, sihm Balaam, dawak Coré kapat, witingna laih muih dudutni kidika yulni dadauwi.

¹² Witingna laih asalnina diski manna dalani lani kasnin alasnina yamtamana kidika yakat, kidika yakat witingna laih alasna manah kakaswi dawak bik didiwi, rispik lani as bik dis. Witingna laih sīp maintalyang balna witingna muihnina manah maintatalwi. Witingna laih mukus balna was dis kat wing yaklau murwi duwi kiwa kidika kapat ki. Witingna laih pan balna minikwa mani kat mininikwas dadauna kat riknina kau dudutna kidika kapat ki.

¹³ Witingna laih sihm kuma parasni lalamwa kat luhusni kalahwa kidika kapat ki. Witingna laih yala balna ta didisna kat puksani yakat ban kaput atnin wawatna kidika kapat ki.

¹⁴ Enoc bik, witing laih Adam kaupak tiaskaubu dai kidika, Papang kaupak yul balna yulna dai adika muihni balna yulnina aput yulna dai mani: “Dawan yakat talnayang, witing innisal balna tausin tausin karak aiwakat

¹⁵ muih balna bitik yakat lanina yamna atnin dawak di dudutni balna yayamna kidika yulni pāt yakat disihna atnin dawak dutni yamyang balna kapat witing niningkauh yul dadasni balna yuyulna kidika yulni bik.”

¹⁶ Di balna bitik yulni dutni dakawi yuyulwi, di balna bitik kidika niningkauh yuyulwi dawak witingna dukih diawa dini kidika manah wawalwi. Ayangnina nuhni yamwi yulbabauwi, dawak muih ūk balna kidika laih yamni ditatalwi kidika balna kaupak duna atninna yulni.

Kulyang muihni balna yakat dibilnin kidika

¹⁷ Kaunah manna, wanaihki dalani balna, ismangnakattanauh Madakiwan Jisas Krais aposnitel balna yaklau

¹⁸ aput manayuyulna dai kidika: “Ma witni balna yakat sarahni yulyang muihni balna bangkarang ki, witingna laih amput dukih diawa kidika kaput yalalahna karang.”

¹⁹ Kidika balna ki sahwi kalahnin lani yayakwa kidika; witingna laih dukih diawa kidika ban wawalwi dawak Papang spiritni kidika bik diski.

²⁰ Kaunah manna, wanaihki balna dalani, manna rahm kulnin lani holi dutamana kidika yakat barangni lawanauh. Spirit Holi yaklau tamatna kawakat mamatna yultanauh.

²¹ Papang dalani lani duwa yakat yamni awanauh dawak Madakiwan Jisas Krais dalani lani duwa kidika karak, ban kaput sangka atnin lani mayawarang kidika yakat tahatanauh.

²² Rahm kukulwas muihni balna kidika yakat miniknakun ditalnauh.

²³ As as balna yakat laih kuhpau paskaupak dilaihta yaktanauh, dawak muih ūk balna yakat bik miniknakun ditalnauh, manna bik amung talnauh witingna yakat dawak witingna sangninaka dutni yulni praknina balna yakat dutni ka'yaklana kidika yulni dutni ditalnauh.

Witni yakat ayangni nuhni yamna

^24-25 Papang aslah kidika, mayang mailaihwi yakyang, witing laih maintalnin parasni duwi manna buknamna awas yulni, dawak maisihnidis dawak alasna karuk witing alasnina yaksihni muhni yakat manaduwi kiuna atnin yulni. Witing laih alasna yaksihni, nuhni, dawak parasni kidika bik duwakarang, Madakiwan Jisas Krais munah, muhnilau kau, waradika dawak ban kaput atnin yakat. Kaput karang.