Jonás 1 - Papang Yulni

Jonás Papang kaupak kirana

¹ Papang yaklauwi Jonás yakat kiuna, Amitai walanibis yakat, dawak aput kalyulna:

² “Nínive tawanni nuhni yakat yawah, dawak diyulta yang lawik kidika tawanni dispamki ki, kat yang muhki kat witingna dutnina kidika kiwi kana.”

³ Kauna Jonás, witing Papang kaupak yulni dakanin pāni yakat, nawatkauh laih kirinin yamna Papang kaupak dawak Jope kau kuring kaikawa tani yakat kuna, dawak kuring as sakdai Tarsis yakat, kaput laih witing mahka kiwarang minit kidika lauwi kuring pasyakat kana kiuna atnin.

⁴ Kauna Papang yaklauwi yamna wing parasni wauhna atnin, dawak kuma pasyakat wing parasni wauhna, bahang sip kapat dai kuring kidika bahwi dis yamnin.

⁵ Kuring waihyang balna kidika yamaduduna, dawak witingna bitik laih daninawan kau yuyulna. Witni kat, kuma kuring kidika ingni yamnin yulni di balna kidika bitik rumhahana waspa yakat. Dawak Jonás laih kuma kuring pasyakat kakiwi di pupuwa yakat yamni palni kamana dai.

⁶ Bahang kuma kuring tanituna kidika Jonás yakat kiwi kalyulna: —¿Man ais yamta yakat amatusmahn? ¡Lawa Papangma yakat yulta! Sip kat mayang akat mamikun maitalwi mailaih'yakwarang.

⁷ Dawak kuma kuring wauhyang balna laih biri biri yuyulna: —Mayang tanka waldarang wais yakat kalbukwarang pa adika dutni kalahwa. Adika tanka wawalwak, Jonás kidika yakat bukna dai.

⁸ Kaput dawak kalyuyulna: —Maiyulta, amput dawak adika dutni mayang akat kaina yah. ¿Ais warkni dutamahn? ¿Angkaupak aiwamahn? ¿Angdika pāni kaupak manh? ¿Ais nisan manh?

⁹ Jonás yaklauwi diyulna: —Yang laih hibru muihni yang, dawak Papang makau sakyakat mikit yultayang kuma yamna dawak sau yamna Daniwan yakat.

^10-11 Jonás yaklauwi diyulna, witing Papang muhni kaupak kiri, dawak witingna dakakana, kaput bik tatalna kuma kidika baisa parasni lalamna dawak yamaduwi yulwi dakakana: —¿Man ais yamta aput yamna manh? ¿Man yakat ais mayamdakat kuma adika lungni kalawarangyah?

¹² Jonás nangnitna lana: —Bahang kuma yakat yaruhm'ātanauh, kaput laih kuma kidika lungni kalna karang. Yang amanglatayang, adika wing parasni wauhwa adika laih yang dutki yulni manna mamatna yakat kaina.

¹³ Waihyang muihni balna kidika parasnina bitik wawaihna kung yakat kiuna atnin, kauna sip-awas dadana, kat kuma kidika baisa parasni lalamna bahang.

¹⁴ Kaput laih Papang yakat parasni yulwi yuyulna: “Papang, maidatang kat daunin awaski, adika alni yulni kaupak. Dawak witing kidika dutni as yamwas kat, witing dauwarang kidika mayang akat maikulwinih, kat Papang man laih yamtaman, amput yamnin kultaman yakat.”

¹⁵ Kaput yulwi dawi, Jonás kidika kuma yakat rumhahana, dawak kuma kidika lungni kalna.

¹⁶ Kidika talwi, witingna Papang yakat kulninna yamaduduna, kalkukulna dawak sakripais as yayamna, dawak pramis bik yayamna dai.

¹⁷ Kidika minitni yakat, Papang yaklauwi waspadini nuhni as yakna dai, bahang kidika yaklauwi Jonás yakat ukna. Dawak Jonás kidika waspadini bānipas yakat ma bās, pukta bās sakdai.