Isaías 1 - Papang Yulni

Judá muihni dutni yamyang balna

¹ Isaías, Amoz walanibis, niningkana dai kidika Judá dawak Jerusalén yulni, bahang kidika mani balna yakat king kakana dai Uzías, Jotam, Acaz dawak Ezequías kaunah Judá sauni yakat.

² Dakanauh kisang dawak sau, Dawan yulwa kidika: “Yang walakibis balna muhnayang, kaunah muihbarak kalwi niking yakat yaklalauna.

³ Turuh almuk kidika daniwan yakat amangnilawi, kaput bik laih biriku kidika daniwan yaklauwi pa kalana kidika amanglawi; kaunah Israel laih yang tawanki muihni balna palni ki, kaunah amanglawas ki, dawak tanka bik duwas ki.”

⁴ ¡Alakaih, muih dutni yamyang balna, tawan as dutni manah trurukwa kidika, muih dudutni sulani balna dawak dutni yamyang walanibis balna! Dawan kaupak naikau alahuina, Israel Papangni holi kidika ruhmwi dadana.

⁵ Manna laih dutni manah yamnin kultamana, muihmana kidika wisnin pāni bik dis kalna. Tunamana bitik laih daknamanah ki, parasmana bitik laih witna.

⁶ Kalmana sutni kaupak tunamana kat yamni as bik diski manna muihmana kidika; mana dakna manah ki, mana wisna, pilau manah ki; muih as bik pilaumana kidika klin yamwi sitwaski, dawak dia kau bik salapwi sanni yamwas ki dalawa balna kidika.

⁷ Pamana kidika kauhmak wanilang manah kalna, dawak tawan nunuhni balna kidika dahlwi. Manna muhmatna yakat di dahna mana dai kidika kakaswi waihmanala balna. Bitik laih kauhmak wanilang manah kalna, Sodoma daukalpamna dai kapat.

⁸ Sayan laih alas kalahna sihm wain yanimak papusyakat ū labanni bin aslah sakkapat, sihm melón balna pasyakat nandakna as sakkapat, dawak bik sihm tawan nuhni as waihnila balna awaihdadakna kapat.

⁹ Dawan parasni nuhni duwa kidika mayang buas maidawas dai katlaih, waradika Sodoma dawak Gomorra kapat mawarang.

Prias as rahm yamnin kidika Papang yakat

¹⁰ Sodoma tunan muihni balna, Dawan yulni adika dakanauh; Gomorra muihni balna, yamni dakanauh mayang Mapapangki mana sumalwarang kidika.

¹¹ Dawan witing aput yulwi: “¿Aisyamta sakripais manas yang akat duaitamanah? Sakripais talnamanah yasuhdana kuts bustamana kidika dawak turuh almuk binina salani bustamana kidika; dawak turuh almuk, kuts almuk āni bik talkihyāwas ki.

¹² Manna yang muhkit akat aiwa mana, kaunah, ¿wais mana yulna yah watakki kidika kalmana kau ataknin?

¹³ Minit dis dini as parasni dis kidika duahaiwinih yang akat; wayauni kidika dukih yāwaski. Manna tawan yakat di yultamana waiku wisam dawak yak-urupdinin mani, kidika alasnina yamnin, kaunah yang dukih yawas ki muih dutni yamyang balna alas yayamwa kidika.

¹⁴ Yasuhdana waiku wisam alasnina yayamwa kidika dawak kalududuhwa kidika bik; ¡kidika yayamwa kidika dutni dakayang baisa wauhkih yawas ki!

¹⁵ Manna mamatna yulta tingmana dulauta mana kidika, manna kaupak mikpa kidika naikau latayang; wat wat mamatna yultanama bik yang dakasyang. Tingmana kidika ā manah kahna.

¹⁶ ¡Suhtanauh, klin alahwanauh! ¡Dutmana kidika yang mikpa kaupak latanauh! ¡Dutni yamtamana kidika datanauh!

¹⁷ ¡Yamni yamnin kidika lan alahwanauh, traitala lā kat yamtanauh, taihwa muihni balna yakat ilpni yamtanauh, warau niningyakat lā kat yamtanauh, yal tingmak rahmni kidika kalatanauh!”

¹⁸ Dawan aput yulwi: “Aiwanang adika yulni yulbaudanang. Dutmana kidika di as pauni kapat karang bik, yang lawik mukus pihni kapat yamki; asna pauni-sa kapat karang bik sīp butuni pihni kapat daki.

¹⁹ Yulki kat dakanama kat, adika sauni di minik tanit yamni yakwa kidika kastanama;

²⁰ kaunah ban kulnamna dutni dutanama kat, wār yakat dautanama.” Dawan witing yaklawi kaput yulna.

Dawan yaklauwi Jerusalén kidika maisihni dis yamna karang

²¹ ¡Ais yamta kaput yamna manh, tawan nuhni as barangni man dai kidika, waradika laih pukta yalni kapat kalnaman kidika! Tanit mani kau laih muihma balna kidika lā kat yayamwa dai, kaunah waradika laih muih iyang balna manah ki.

²² Man kidika lalah man dai, kaunah waradika laih bubuh kalnaman, wain yamni as man dai kaunah waradika laih was manah kalnaman.

²³ Kabamintma balna kidika muih dudutni ki dawak di malyang balna karak kalpapakwi. Di bitik kidika lalah yaklauwi dibakanwi dawak wawalwi muih yaklauwi di prisant diana atnin. Lā kat yayamwaski warau nining yakat, dawak yal tingmak rahmni kidika bik kukulwas ki.

²⁴ Kidika bahang, Israel Papangni Dawan parasni nuhni duwa kidika, yulwi: “Yang waihkila balna kidika lanina yamki. Yang biritik diyamki.

²⁵ Wattik yang tingki dulauki man namang yakat, dawak bubuhmana kidika bitik busmukki; kaput bik laih dutni dutaman kidika bitik klin yamki ki.

²⁶ Yamtingkat watta tama tuna balna yayamni duma, muhnilau dai kapat dawak la sumalyang muihni balna bik. Yang adika yamting usnit kat watwi manyak ma yuyulna karang ‘Tawan nuhni as lā kat’, ‘Tawan nuhni as barangni’.

²⁷ Yang lā kat yamtayang kau dawak laihtik yaktayang kidika karak Sayan muihni balna kidika laihtik yakki yang akat ainin yulni;

²⁸ kaunah muih kulninna dutni dawak dutni yamyang balna kidika laih imukki, dawakat yaruhmwi dadawa balna kidika bik dadauwarang.

²⁹ Pan balna bik manna yakat yakasasaldarang, manna lawa yamni dukih manawa kidika, dawakat kidika yakat bik dawan dauh balna yakat prinias yamta manna kidika.

³⁰ Manna laih pan as dauwak basni kusulawa kapat awanama, dawak bik dipulu dahna pāni as was-dis kapat awanama.

³¹ Muih al parasni kidika laih, unitak mana kalna karang, dawak witing warkni balna kidika laih kuh raiwa kapat karang: bupak laih dahlna karang, dawak muih as bik diskarang pina atnin.”