Hibru 1 - Papang Yulni

Papang, witing Walanibis munah yulbauna

¹ Tanit mani kau Papang yulbauna mamuihkibararak balna munah wat wat, dawak tanka sat sat karak prapit balna munah.

² Kaunah waradika mani witni balna kat, Walanibis munah yulmaibauwi, witing munah di balna kidika yamna, dawak witing yakat di balna kidika bitik kalana.

³ Witing kuduh Papang yaksihni yaringni kidika, sihm kidika laih Papang ampat kidika wayani, dawak di balna bitik witing yulni parasni nuhni karak laihwi duwa kidika. Madutki kaupak klin maiyamna usnitkat, makau kisang yakat kilwi yalahna, Papang trunni tingni palni yakat,

⁴ dawak insal balna karak tanit nuhni kalna, kat witing laih dipahni kapat wauhtaya tanit nuhni kulna kidika duna bahang witingna duduwa kidika karak dawakat.

Papang Walanibis al kidika insal balna karak tanit nuhni ki

⁵ Kat Papang wat as bik yulwas ki insal as kau: “Man laih yang Walakibis; warmani yang mayaknayang.” Dawak insal as bik yulni yulwasdai: “Yang laih witing papangni awaki, dawak witing laih yang walakbis karang.”

⁶ Kaunah pis ūk yakat, sau muihni balna muhnina yakat yakwi yulwi: “Papang innisal balna bitik witing yakat mamatna yultanauh.”

⁷ Insal balna yulnina, Papang yulwi: “Witing yamwi, innisal balna kidikawing kapat atnin, dawak kuh dahlwa kapat atnindini yamyang balna kidik.”

⁸ Kaunah Walanibis yulni laih yulwi: “Man kingma āwaman kidika laih,Papang,ban kaput karang, dawak kingkawa lāni kidikalā kat karang.

⁹ Di yamni kidika dalani talna, dawak dutni kidika waihla talna; kidika bahang Papang mayakwi duna,man Papangma, dawak alasna manah mabahngna kaltalyang yamni mana kidika karaktanit.”

¹⁰ Dawak bik yulwi: “Papang, tatuna kaupak sau adikayamnaman; dawak makau kisang kidika man yamnaman.

¹¹ Kidika balna bitik dis kalwarang, kaunah man laih ban sak-awama, kidika bitik laih asna kapat witwarang;

¹² ¡sip lamtas awama asna kapat, yakpamta ūk āma, muih as asnina ūk āwa kapat! Kaunah man laih ban man; sangmaka bik witwaski.”

¹³ Papang, insal balna kidika as kau bik diyulwasdai: “Tingkipal yak yalahtah, man waihmala balna bitik kalma dinit yakat āki kat.”

¹⁴ Kat insal balna bitik laih spirit, Papang dini yamyang balna, disihna laihwi yakwarang balna yakat ilp diana atnin.